Paŭdniovakarejskaja raźviedka śćviardžaje, što va Ukrainie zahinuli 300 vajskoŭcaŭ z KNDR
Paŭdniovakarejskaja raźviedka zajaŭlaje, što ŭ Kurskaj vobłaści zahinuli kala 300 vajennych KNDR. Jašče 2700 atrymali ranieńni, piša Yonhap sa spasyłkaj na viedamstva.
Raźviedka ličyć, što paŭnočnakarejskija vajennyja niasuć «masavyja straty» z-za taho, što «nie razumiejuć sučasnych mietadaŭ viadzieńnia vajny».
U śniežni 2024 hoda Nacyjanalnaja raźviedvalnaja słužba Respubliki Kareja zajaŭlała, što ŭ Kurskaj vobłaści zahinuli 100 vajennych z KNDR, a tysiača sałdat byli paranieny.
9 studzienia prezident Ukrainy Uładzimir Zialenski paviedamiŭ, što KNDR straciła čatyry tysiačy vajennych zabitymi i paranienymi.
11 studzienia jon apublikavaŭ fatahrafii dvuch paŭnočnakarejcaŭ, jakich bajcy USU ŭziali ŭ pałon u Kurskaj vobłaści. Pavodle źviestak paŭdniovakarejskaj raźviedki, jany słužyli ŭ Hałoŭnym upraŭleńni raźviedki KNDR.
Zialenski paviedamiŭ, što Ukraina hatova pieradać pałonnych paŭnočnakarejskich sałdat Kim Čen Ynu, kali jon arhanizuje ich abmien na ŭkrainskich vajennych, jakija znachodziacca ŭ rasijskim pałonie.
Prezident Ukrainy apublikavaŭ videa z dopytam pałonnych z KNDR. Adzin ź ich na pytańnie pra toje, ci viedaje jon, što vajuje suprać Ukrainy, adkazvaje, što kamandziry kazali im pra vučeńni. Druhi sałdat kaža, što jahonyja svajaki nie viedajuć, dzie jon znachodzicca.
Kamientary