«Levaja, chranična złaja». Dramatyčnaja historyja pakazała, da čaho davodzić isteryčnaje vykryćcio «seksualnych damahańniaŭ»

Jak piša Financial Times, u śniežni minułaha hoda deputat Bundestaha ad «Zialonych» Štefan Hielbchaar (Stefan Gelbhaar) byŭ vymušany admovicca ad udziełu ŭ vybarach praz abvinavačańni ŭ seksualnych damahalnictvach. Niahledziačy na toje, što palityk kateharyčna admaŭlaŭ usie abvinavačańni, cisk kaleh pa partyi prymusiŭ jaho adstupicca ad dalejšaha zmahańnia za deputacki mandat. Zdavałasia, jahonaja karjera była skončanaja.

Adnak niečakany pavarot padziej źmianiŭ usiu historyju. Jak vyśvietliłasia, asnoŭnaje śviedčańnie, na jakim trymałasia sprava, było ad niaisnaj žančyny.

Hetuju infarmacyju paćvierdziła dziaržaŭnaja niamieckaja radyjostancyja Rundfunk Berlin-Brandenburg (RBB), jakaja pieršapačatkova i ahučyła abvinavačańni.

Frau K.

Za falsifikacyjaj stajała Šyryn Krese (Shirin Kreße), adna z kiraŭnic «Zialonych» u Bierlinie, jakaja ŭ sacyjalnych sietkach apisvaje siabie jak «aŭtystka, levaja, chranična złaja». Jana dziejničała pad psieŭdanimam Anne K., a RBB pavieryła joj na słova, navat nie pravieryŭšy sapraŭdnaść piersony!

Krese stvaryła fejkavuju asobu, jakaja paklopničała na Hielbchaara, padaŭšy navat fiktyŭnaje prysiažnaje śviedčańnie. Paśla taho jak chłuśnia raskryłasia, Krese zajaviła pra svaju adstaŭku i vychad z partyi.

Hety skandał nie tolki vyklikaŭ chvalu abureńnia ŭnutry «Zialonych», ale i padarvaŭ davier da miechanizmaŭ abarony achviar seksualnych damahańniaŭ. Žanočyja pravaabarončyja arhanizacyi ŭžo aścierahajucca, što sapraŭdnyja achviary ciapier sutyknucca z bolšym niedavieram.

Prajava «kryminalnaj enierhii» 

Skandał zdaryŭsia napiaredadni vybaraŭ. Vice-kancler Hiermanii i lidar partyi Robiert Chabiek nazvaŭ toje, što adbyłosia, prajavaj «kryminalnaj enierhii» i adznačyŭ, što heta naniesła škodu nie tolki Hielbchaaru, ale i ŭsim žančynam, jakija sapraŭdy sutyknulisia z damahańniami.

Tym časam u partyi byŭ stvorany śpiecyjalny kamitet dla rasśledavańnia hetaj spravy, što śviedčyć pra imknieńnie źmiakčyć nastupstvy kryzisu.

Vypadak z Hielbchaar byŭ nie adzinym dla Krese. Jašče minimum dva chłuślivyja abvinavačvańni jana sfalsifikavała ŭ dačynieńni da inšych ludziej. Sam Hiełbchaar (advakat pa prafiesii) ciapier sudzicca sa svaimi adnapartyjcami i RBB. 

Pavialičyć

Mahčyma, Hielbchaar adnović svaju reputacyju, a Krese paniasie pakarańnie. Ale samaje strašnaje ŭ hetaj historyi toje, što jana padryvaje davier da realnych achviar seksualnych damahańniaŭ.

• 7
• 2
• 8
• 17
• 1
• 1
• 14
• 0