The Sunday Times paćvierdziła vypadak kanibalizmu ŭ rasijskaj armii

Hety vypadak staŭ viadomy dziakujučy razmovie aficera i lejtenanta Uładzisłava Razikava, namieśnika kamandzira 5‑j asobnaj hvardziejskaj motastrałkovaj bryhady. Pierachopy pieradała ŭkrainskaja raźviedka.

Vajskoŭcy razmaŭlali ŭ Telegram u listapadzie 2025 hoda pobač ź Mirnahradam u Danieckaj vobłaści. Zaŭvažanaha ŭ kanibaliźmie nazyvajuć pa pazyŭnym Chramy, jon słužyŭ u 95‑m pałku 5‑j bryhady.

Nienazvany aficer raspaviadaje pra «incydent».

«Karaciej, adzin naš zabiŭ dvuch inšych, i jon pasprabavaŭ… jon adrezaŭ nahu i ŭžo sprabavaŭ źjeści», — kaža aficer. Zatym jon apisvaje, jak Chramoha znajšli dvoje vajskoŭcaŭ, jakich adpravili rasśledavać jaho adsutnaść.

«U rešcie rešt, siońnia jany pajšli i znajšli miesca, dzie jon zaciahnuŭ ich u padvał, adrezaŭ nahu i ŭžo siadzieŭ tam, prakručvajučy praź miasarubku ci niešta ŭ hetym rodzie, u sprobie źjeści… Jon adkryŭ ahoń. Jany zabili jaho», — kaža aficer.

Aficer taksama adpraviŭ Razikavu fatahrafii nahi i źniasilenaha sałdata. Zhodna z analizam The Sunday Times, fatahrafii nie byli zhienieravanyja abo adredahavanyja z dapamohaj ŠI.

Niezaležny vajenny chirurh patłumačyŭ vydańniu, što małavierahodna, što ranieńni, jakija bačnyja na fotazdymkach, atrymany ŭ vyniku vajennych dziejańniaŭ. «Heta vyhladaje tak, nibyta heta było adrezana z dapamohaj vostraha naža», — skazaŭ chirurh.

Na fatahrafii cieła Chramoha bačna, što jon mocna źniasileny.

Atrymaŭšy zdymak, Razikaŭ pierapytaŭ: «Ich nie kormiać ci što? Ja nie razumieju». Aficer adkazaŭ, što «našy chutka pačnuć jeści adzin adnaho» i što «ŭsie siadziać na hałodnych pajkach».

Razikaŭ udzielničaje va ŭvarvańni jak minimum z pačatku 2023 hoda, pra što śviedčać danyja vyciečak baz danych.

Prakramloŭskija ŚMI zhadvali jaho jak namieśnika kamandzira 5‑j asobnaj hvardziejskaj motastrałkovaj bryhady imia Alaksandra Zacharčanki 51‑j ahulnavajskovaj armii ŭ składzie hrupoŭki vojskaŭ «Centr». U lipieni 2025 hoda jon raspaviadaŭ TASS pra ŭkrainskich raźviedčykaŭ u Mikałajeŭcy, u kastryčniku taho ž hoda — pra zachop pasiołka Maskoŭskaje ŭ DNR.

The Sunday Times raspaviadaje jašče pra try pierachoplenyja paviedamleńni rasijskich vajskoŭcaŭ, u jakich abmiarkoŭvalisia vypadki kanibalizmu.

U razmovie ad 3 krasavika 2025 hoda sałdat z pazyŭnym Most z 54‑ha mataryzavanaha strałkovaha pałka skardzicca svajmu aficeru. «Kali b jon byŭ čałaviekam, to jon moh by zastacca tak doŭha, jak jon zachoča, ale jon jeŭ trup, čałaviečaje miasa. Ja musulmanin. Ja nie chaču, kab chtości nakštałt jaho zachodziŭ da mianie ŭ chovanku», — kaža vajskoviec.

U inšaj razmovie 8 kastryčnika 2025 hoda kamandzir 1437‑ha mataryzavanaha strałkovaha pałka vinavacić adnaho sa svaich padnačalenych. «Čamu ty, bł…, jasi chachłoŭ? Spynisia, bł…, jeści ludziej», — pryvodzić The Sunday Times jaho cytatu.

U jašče adnym paviedamleńni ŭ Telegram ukrainskija chakiery znajšli zahad 55‑mu mataryzavanamu strałkovamu pałku: «Nijakaha ałkaholu! Nijakich narkotykaŭ! Nijakich pierasoŭvańniaŭ biez dakumientaŭ! Nijakaha kanibalizmu!».

U śniežni 2025 hoda Hałoŭnaje ŭpraŭleńnie raźviedki Minabarony Ukrainy apublikavała zapis, na jakim čuvać jak mužčyna kaža, što hatovy zabić «kahości maładoha». «Ja nažy natačyŭ, mnie ŭsio adno, kaho rezać, žerci chaču», — kazaŭ čałaviek.

Uletku HUR apublikavaŭ zapis pieramoŭ pra toje, što vajskoviec z pazyŭnym Brełok zabiŭ i źjeŭ naparnika. «Brełok jaho zavaliŭ, a potym jeŭ nach*j dva tydni», — kaža mužčyna na zapisie.

Pasolstva Rasii ŭ Łondanie zajaviła vydańniu, što nie bačyć «padstaŭ dla kamientaryjaŭ». Pradstaŭnik skazaŭ: «Toje, što vy apisali, — heta vydumki, pradastaŭlenyja ŭkrainskaj vajennaj raźviedkaj — arhanizacyjaj, funkcyja jakoj zaklučajecca ŭ vytvorčaści prapahandy, a nie ŭ zbory faktaŭ».

• 6
• 1
• 12
• 17
• 8
• 1
• 0
• 1