Makron paabiacaŭ zrabić Francyju stalicaj jeŭrapiejskaha štučnaha intelektu. Z dapamohaj dypfejku z saboj u hałoŭnaj roli VIDEA
Pa słovach prezidenta Francyi padčas paryžskaha samitu pa štučnym intelekcie, jaki adkryvajecca ŭ paniadziełak, Francyja abvieścić pra pačatak pryvatnych inviestycyj u svoj siektar štučnaha intelektu ŭ pamiery 109 miljardaŭ jeŭra, piša Bi-bi-si.
Hetaja suma ŭklučaje 20 młrd jeŭra, jakija kanadskaja inviestycyjnaja kampanija Brookfield źbirajecca ŭkłaści ŭ francuzskija prajekty štučnaha intelektu, a taksama finansavyja ŭkładańni Abjadnanych Arabskich Emirataŭ, jakija, jak čakajecca, u bližejšyja hady składuć da 50 młrd jeŭra. Pra heta Makron raspavioŭ u niadzielnym intervju viaščalnaj kampanii TF1.
Jelisiejski pałac paviedamiŭ, što inviestycyi AAE buduć uklučać finansavańnie centra apracoŭki danych. Pa danych haziety La Tribune de Dimanche, bolšaja častka inviestycyj Brookfield taksama pojdzie na budaŭnictva centra apracoŭki źviestak.
Na dumku analitykaŭ, Jeŭropa pakul adstaje ŭ honcy štučnych mazhoŭ nie tolki ad ZŠA, ale i ad Kitaja, jaki niadaŭna ździviŭ śviet i ŭzrušyŭ fondavyja rynki padazrona tannym, kali vieryć kitajskim ličbam, čat-botom DeepSeek, jaki pa mnohich paramietrach nie sastupajuć, a dzie-nidzie i praŭzychodnym zachodnija anałahi.
U kancy studzienia prezident ZŠA Donald Tramp abviaściŭ, što kampanii OpenAI, SoftBank Group i Oracle inviestujuć 500 młrd dalaraŭ u prajekt Stargate — infrastrukturu štučnaha intelektu — na praciahu nastupnych čatyroch hadoŭ, kab dapamahčy Złučanym Štatam apiaredzić Kitaj i inšych supiernikaŭ.
Tramp nazvaŭ Stargate najbujniejšym prajektam u śfiery ŠI u historyi, jaki demanstruje vielizarny patencyjał Amieryki. Pavodle jaho słoŭ, u ramkach prajekta budzie stvorana nie mienš za 100 tysiač pracoŭnych miescaŭ i buduć pabudavany centry apracoŭki danych pa ŭsioj krainie. Ułady ŭžo prystupili da vyvučeńnia patencyjnych placovak dla ich.
Pa słovach Makrona, 109 młrd jeŭra dla Jeŭropy — suma, całkam supastaŭnaja z paŭtryljonnymi inviestycyjami ŭ Stargate, tym bolš što na pieršym etapie ŭ amierykanski prajekt budzie ŭkładziena tolki 100 młrd dalaraŭ. Centry apracoŭki danych pradastaŭlajuć kampanijam, jakija pracujuć u halinie štučnaha intelektu, vielizarnuju jomistaść dla zachoŭvańnia danych i vyličalnuju mahutnaść dla raspracoŭki i zapusku svaich sistem.
ŠI patrabuje vielizarnaj kolkaści enierhii dla zabieśpiačeńnia pracy masiŭnych centraŭ apracoŭki danych (centr, jaki pabudujuć na arabskija hrošy, budzie spažyvać 1 hihavat), i Francyja pazicyjanuje siabie jak idealnaha kandydata — prykładna 70% patrebaŭ krainy ŭ elektraenierhii hienierujuć paraŭnalna «čystyja» atamnyja stancyi.
Napiaredadni samitu Makron u jakaści rekłamy apublikavaŭ u sacsietkach dypfejki z saboj u hałoŭnaj roli, zhienieravanyja štučnym intelektam.
U adnym jon tančyć pad chit 1980-ch hadoŭ «Voyage Voyage» francuzskaj śpiavački Desireless, u inšym zdymajecca ŭ špijonskaj kamiedyi z Žanam Dziužardenam, u trecim — čytaje rep i tančyć u styli francuzskaha vykanaŭcy Nekfeu.
U niejki momant u kadry źjaŭlajecca sapraŭdny Makron u kaściumie i halštuku i kaža: «Vydatna zroblena».
«Kali kazać bolš surjozna, to z dapamohaj štučnaha intelektu my možam zrabić niekalki vielmi važnych rečaŭ: źmianić achovu zdaroŭja, enierhietyku, žyćcio našaha hramadstva, — praciahvaje jon. — Francyja i Jeŭropa pavinny być u centry hetaj revalucyi, kab vykarystoŭvać usie mahčymaści, a taksama prasoŭvać našy pryncypy».
U kancy klipa štučny Makron źjaŭlajecca ŭ vyhladzie amierykanskaha televizijnaha hieroja bajevikoŭ Makhajviera, viadomaha svajoj źniešnaściu i znachodlivaściu.
«Nu dakładna. Heta ja», — kamientuje sapraŭdny Makron.
Post Makrona ŭ Instagram nabraŭ bolš za 168 tysiačy łajkaŭ, niekatoryja karystalniki vykazali zachapleńnie «krutoj» i niazmušanaj manieraj pavodzin prezidenta.
-
U Litvie stabalnikaŭ premirujuć niemałymi hrašyma. A ich nastaŭnikaŭ — jašče bolšymi. Ale sioleta sistema ledź nie złamałasia
-
Alijeŭ paraiŭ Ukrainie nie zhadžacca na akupacyju. Z-kanały zaklikajuć rychtavacca da vajny z Azierbajdžanam
-
U pasažyrskaha Boeing 767 padčas palotu ŭ ZŠA zahareŭsia ruchavik
Kamientary