Tramp uvioŭ 25-pracentnyja pošliny na ŭvieś impart stali i aluminiju ŭ ZŠA
«Našaj krainie treba, kab stal i aluminij vyrablalisia ŭ Amierycy, a nie za miažoj», — zajaviŭ Tramp paśla padpisańnia.
Prezident ZŠA Donald Tramp zrabiŭ čarhovy krok u handlovaj vajnie z susiedziami i inšymi krainami śvietu: jon uvioŭ, jak i abiacaŭ napiaredadni, 25-pracentnyja pošliny na ŭvieś impart stali i aluminiju ŭ ZŠA, dapaŭniajučy ŭžo isnujučyja pošliny na mietały, piša Bi-bi-si.
«Našaj krainie treba, kab stal i aluminij vyrablalisia ŭ Amierycy, a nie za miažoj», — zajaviŭ Tramp paśla padpisańnia. Na pytańnie žurnalista, ci nie vyrastuć z-za pošlin ceny ŭnutry ZŠA, jon adkazaŭ: «U vyniku budzie tańniej».
«Heta važnaja sprava. My pačynajem viartać Amierycy jaje byłoje bahaćcie […] Pryjšoŭ čas našaj cudoŭnaj pramysłovaści viarnucca ŭ Amieryku. Heta pieršy krok z mnohich», — dadaŭ Tramp.
Novyja pošliny ŭvodziacca na stal i aluminij z usich krain biez vyklučeńnia.
Donald Tramp taksama paćvierdziŭ, što ŭ bližejšyja dva dni maje namier uvieści pošliny na impart z tych krain, jakija abkładajuć pošlinami amierykanskuju pradukcyju.
Akramia taho, prezident ZŠA paviedamiŭ, što ŭ dalejšym moža abkłaści dadatkovymi pošlinami impart lekaŭ i kampjutarnych čypaŭ.
Na pytańnie pra mahčymyja miery ŭ adkaz z boku inšych krain Tramp adkazaŭ: «Ja nie suprać».
Padčas svajho pieršaha prezidenckaha terminu Tramp uvioŭ pošliny ŭ pamiery 25% na impart stali i 10% na impart aluminiju z Kanady, Mieksiki i Jeŭrapiejskaha sajuza. Praz hod ZŠA dasiahnuli pahadnieńnia z Kanadaj i Mieksikaj pra admienu hetych taryfaŭ, choć padatki na impart ź ES zastavalisia ŭ sile da 2021 hoda.
Dah Ford, premjer-ministr kanadskaj pravincyi Antarya, dzie skancentravana vytvorčaść stali ŭ Kanadzie, abvinavaciŭ Trampa ŭ «źmianieńni aryjenciraŭ i pastajannym chaosie, jaki padviarhaje ryzycy našu ekanomiku».
Ab namiery ŭvieści pošliny Tramp zajaviŭ u niadzielu, i ŭžo ŭ paniadziełak heta pryviało, u pryvatnaści, da padzieńnia akcyj najbujniejšych paŭdniovakarejskich vytvorcaŭ stali i aŭtamabilaŭ. Paŭdniovaja Kareja źjaŭlajecca bujnym eksparcioram stali ŭ ZŠA.
Impartnyja pošliny — heta klučavaja častka ekanamičnych pohladaŭ Trampa: jon razhladaje ich jak sposab zabiaśpiečyć rost ekanomiki ZŠA, abaranić pracoŭnyja miescy i pavialičyć padatkovyja pastupleńni.
Raniej u hetym miesiacy Tramp zajaviŭ ab uviadzieńni 25-pracentnych pošlin na ŭvieś impart z Kanady i Mieksiki, ale, parazmaŭlaŭšy ź lidarami hetych krain, pahadziŭsia adkłaści hety płan na 30 dzion.
Jon taksama ŭvioŭ novyja pošliny ŭ pamiery 10% na ŭsie kitajskija tavary, što ŭvoziacca ŭ ZŠA. Piekin u adkaz uvioŭ svaje ŭłasnyja taryfy, jakija ŭ paniadziełak ustupili ŭ siłu.
Kamientary