Syn Asada raskazaŭ pra padziei napiaredadni ŭciokaŭ jaho baćki ź Siryi

U telehramie dniami źjaviŭsia kanał ad imia Chafieza Asada, syna Bašara Asada. U im apublikavany post pra apošnija hadziny siryjskaha dyktatara na radzimie. Chafiez taksama apublikavaŭ kružok-sełfi, jaki pavinien vieryfikavać kanał. 

Pa słovach Chafieza, kali b jaho siamja chacieła biehčy, to zrabiła b heta raniej, naprykład, u 2012 abo ŭ 2013 hodzie, kali «Damask znachodziŭsia praktyčna ŭ abłozie, padviarhaŭsia štodzionnym bambavańniam i pastajannaj pahrozie praniknieńnia terarystaŭ u jaho centr».

Chafiez śćviardžaje, što ni ŭ kaho z prezidenckaj siamji nikoli nie było płana (navat zapasnoha) pakinuć Damask, nie kažučy ŭžo pra Siryju. Adnak usio źmianiłasia paśla pryjezdu niejkaha rasijskaha čynoŭnika ŭ noč z 7 na 8 śniežnia.

Chafiez piša, što ŭ kancy listapada jon abaraniŭ dysiertacyju ŭ Maskvie. Tut ža znachodzilisia jaho maci Asma (jana lažała ŭ maskoŭskaj balnicy paśla apieracyi pa pierasadcy kaściavoha mozhu) i siastra Ziejn.

1 śniežnia Chafiez Asad vylecieŭ u Damask, kab padtrymać baćku i brata Karyma paśla paharšeńnia situacyi. 7 śniežnia, pa słovach Chafieza Asada, byŭ zvyčajny dzień. Jahony brat Karym zdavaŭ ekzamien pa matematycy ŭ Vyšejšym instytucie prykładnych navuk i technałohij u Damasku. Siastra Ziejn nieŭzabavie pavinna była pryjechać z Maskvy ŭ Damask. Abstreły pobač z Damaskam, pa słovach Chafieza, nikoha ź siamji Asada nie pałochali, pakolki heta było «znajomaj realnaściu, da jakoj pryvykli ź pieršych hadoŭ vajny». Armija źbirałasia abaraniać stalicu Siryi. Navat kali źjavilisia tryvožnyja viestki ab adstupleńni armii z Chomsa, zapeŭnivaje Chafiez, u siamji Asadaŭ nie było padrychtoŭki da adjezdu i nijakich prykmiet chutkaj evakuacyi.

«Usio źmianiłasia paśla paŭnočy, kali da nas dadomu ŭ rajonie Al-Małki prybyŭ rasijski čynoŭnik», — piša syn Bašara Asada.

Hety nieviadomy čynoŭnik, sa słoŭ Chafieza, pryjechaŭ u noč z 7 na 8 śniežnia ŭ prezidenckuju rezidencyju Bašara Asada i pieradaŭ nastojlivuju prośbu pierajechać u Łatakiju na niekalki dzion dla kantrolu za bajami ŭradavych vojskaŭ suprać uzbrojenaj apazicyi.

U mižnarodnym aeraporcie Damaska da Bašara Asada i dvaich jaho synoŭ dałučyŭsia brat byłoha prezidenta — Machier Asad. U try hadziny nočy na rasijskim vajskovym samalocie jany vylecieli na rasijskuju bazu ŭ aeraport Chmiejmim.

Paśla pryziamleńnia Asady pavinny byli adpravicca ŭ prezidenckuju rezidencyju ŭ rajonie Burdž Isłam za 40 kiłamietraŭ ad aeraporta. Adnak usie sproby źviazacca z rezidencyjaj akazalisia biespaśpiachovymi, pakolki na zvanki nichto nie adkazvaŭ.

U hety ž čas Bašar Asad staŭ atrymlivać paviedamleńni ab adstupleńni vajskoŭcaŭ ź linii frontu i padzieńni apošnich pakinutych pazicyj.

«Dniom kamandavańnie rasijskaj bazy prainfarmavała nas pra surjoznaść situacyi ŭ vakolicach. Jany paviedamili nam, što pakinuć bazu ŭžo niemahčyma, pakolki terarysty raspaŭsiudzilisia pa ŭsioj krainie, situacyja pahruziłasia ŭ chaos, i ŭsia suviaź z vajskovym kiraŭnictvam była stračana. Paśla kansultacyj z Maskvoj kamandavańnie bazy paviedamiła nam, što naš pieravod u Rasiju zapytany. Praź niekatory čas my sieli na rasijski vajskovy samalot, jaki nakiroŭvaŭsia ŭ Maskvu, dzie i pryziamlilisia paźniej tym ža viečaram», — napisaŭ Chafiez Asad.

• 1
• 0
• 27
• 3
• 4
• 1
• 2
• 0