Centralnuju rolu ŭ arhanizacyi pieramovaŭ z amierykancami adyhraŭ muž Natalli Piatkievič. Čamu jon?

Zvyčajna byvaje tak, što armii dypłamatyčnych pasiarednikaŭ hadami rychtujuć hlebu dla sustrečy pieršych asobaŭ. Asabliva kali jość razychodžańni ŭ pohladach na pryncypovyja rečy. Tady, pa standartach Vienskaj škoły, treba znajści miescy, ź jakimi zhodnyja ŭsie baki, raskinuć vakoł ich mościki, pa jakich pierajści da inšych pytańniaŭ.

Novy amierykanski prezident ličyć takuju strukturu nieefiektyŭnaj, rakiruje paradak zhodna ź biznes-padychodam: spačatku my damovimsia pra asnoŭnyja pryncypy ŭ vuzkim kole, a dypłamaty chaj potym užo padhaniajuć svaju rabotu pad rašeńni darosłych. 

Łukašenka ŭ pieralik hetych «darosłych», z kim Tramp rašaje spravy naŭprost, nie ŭvachodzić. Ale jamu taksama dastałasia chutkaja i kankretnaja prapanova: usie palityčnyja ŭ abmien na asłableńnie sankcyj z mahčymaściu praciahnuć dyjałoh.

Kali bačyć u sustrečy namieśnika pamočnika dziaržsakratara ZŠA z Alaksandram Łukašenkam niejkuju ŭvierciuru da źnižeńnia hradusa kanfrantacyi, to adno z hałoŭnych adroźnieńniaŭ ad papiarednich takich pavarotaŭ u tym, što Ministerstva zamiežnych spraŭ jak instytut amal vyklučany z pracesu pieramovaŭ. 

Na sustrečy Łukašenki z Krysam Śmitam nie było ni biełaruskaha ministra zamiežnych spraŭ Maksima Ryžankova, ni jahonych namieśnikaŭ. U hety dzień ministr davaŭ intervju BiełTA pa vynikach kamandziroŭki ŭ Livan i raskazvaŭ pra hatoŭnaść Biełarusi pastaŭlać tudy techniku.

Možna skazać, što Łukašenka dabiŭsia taho, čaho chacieŭ: MZS jak viedamstva z najmacniejšymi prabiełaruskimi i prajeŭrapiejskimi instynktami ad palityčnych pytańniaŭ adchilenaje, a zajmajecca haspadarčymi, «prasoŭvańniem biełaruskaj pradukcyi na źniešnich rynkach». MZS pieratvaryłasia ŭ taki «adździeł markietynhu na źniešnich rynkach».

Pavialičyć

U toj ža čas, vyhladaje, što centralnuju rolu ŭ arhanizacyi pieramovaŭ z amierykancami adyhraŭ muž Natalli Piatkievič, šmathadovy rezident Ńju-Jorka, były pamočnik Alaksandra Łukašenki i pradstaŭnik Biełarusi ŭ AAN Valancin Rybakoŭ. Mienavita ź im sustrakaŭsia Łukašenka napiaredadni vizitu amierykanskaha hościa.

U hetym fakcie chtości moža pabačyć źjaŭleńnie novaha mocnaha kandydata na miesca ministra zamiežnych spraŭ. 

Dla Rybakova takaja pieramiena była b pažadanaj chacia b i z asabistych pryčyn — jon užo paŭhoda žyvie ŭ adryvie ad upłyvovaj žonki.

U toj ža čas Ryžankoŭ — lohka zamianialny ministr, u jakoha niama mocnych kankurentnych pieravah. Jon vialikaja fihura ŭ Biełarusi, ale niezaŭvažnaja ŭ śviecie.

Vopyt Ryžankova ŭ asnoŭnym administratyŭny, a nie dypłamatyčny, i skancentravany jon unutry krainy. 

Z momantu skančeńnia ŭniviersiteta ŭ 1994-m Ryžankoŭ sumarna adpracavaŭ za miažoj niapoŭnyja 6 hod: čatyry ŭ Izraili (1996—2000) i dva ŭ Polščy (2003—2005).

Staryja znajomstvy ŭ Izraili (kali jany i mahli z kimści zaviazacca va ŭčorašniaha studenta) siońnia nieaktualnyja.

Z Polščy Ryžankova vysłali ŭ adkaz na vysyłku polskich dypłamataŭ ź Minska. Ale niečym Maksim tak daŭsia ŭ znaki palakam, raz tyja nie dali pryznačyć jaho pasłom u Rumyniju, napisaŭšy razhromnuju charaktarystyku dla kaleh pa Jeŭrasajuzie. 

Z 2020 hoda Ryžankoŭ pad sankcyjami, na papiarednich pasadach u Administracyi prezidenta jon byŭ siarod architektaraŭ kanfrantacyi ź Jeŭropaj, a ŭ statusie ministra, kažuć, nie zrabiŭ ničoha dla naładžvańnia chacia b mižasabovych kantaktaŭ. Ryžankoŭ zusim nie viedaje ZŠA, redka byvaŭ u Amierycy.

Miž tym dobraje viedańnie amierykancaŭ — mocny bok Rybakova. Jon — dypłamat daśviedčany.

U 1994 hodzie paśla Linhvistyčnaha jon prajšoŭ trochmiesiačnyja kursy pry Dziarždepie ZŠA. 2001—2005 pravioŭ u ZŠA. Z 2006 pa 2013 byŭ pamočnikam Łukašenki. Z 2013 pa 2017 — namieśnikam Makieja. Z 2017 pa ciapierašni čas, amal rekordny pieryjad, — pradstaŭnik Łukašenki ŭ AAN. 

Paśla śmierci Aleha Kraŭčanki Rybakoŭ — samy vopytny dypłamat na amierykanskim kirunku. U toj ža čas dla rasijan jon svoj, bo naradziŭsia va Ufie. 

Ale hałoŭny momant — rola Natalli Piatkievič, žonki Rybakova. Jana apraŭdała nadziei Alaksandra Łukašenki. Krynicy «Našaj Nivy» kažuć, što jon mocna zadavoleny tym, jakuju vybarčuju kampaniju jana arhanizavała.

I kali Dźmitryj Kruty pierasiadzie ŭ kresła premjer-ministra, to Piatkievič — naturalny kandydat, kab uznačalić Administracyju prezidenta.

Precedentu, kab adnačasova žonka i muž, muž i žonka zajmali dźvie nastolki važnyja pasady, u Biełarusi jašče nie było. Ale vyklučać taki varyjant niamožna.

U toj ža čas nielha vyklučać, što Rybakoŭ ci Piatkievič mohuć sabie praciahvać kuryravać kantakty z Zachadam na inšych pasadach, a ministr — Ryžankoŭ ci inšy — budzie sabie paśpiachova zajmacca prodažam traktaroŭ. Tym bolš što Minsk žyvie čakańniem abvału rasijskaj ekanomiki.

Bolšaść biełarusaŭ skažuć, što niama nijakaj roźnicy ŭ tym, chto ministr. Usio adno jak Łukašenka skaža — tak i budzie. I heta praŭda.

Ale tut treba zrabić dapuščeńnie na histaryčny momant: siońnia, kali va Ukrainie z udziełam ZŠA rašajecca los śvietu, ź im i los Łukašenki taksama, ź im — i losy biełarusaŭ taksama. I tamu i ministr, jaki zdolny pra niešta havaryć i viedaje z kim havaryć i jak havaryć, lepšy, čym ministr, jaki na toje nie zdolny.

Što adnaznačna — los mahčymaj ździełki z ZŠA «źniaćcio častki sankcyj uzamien za vyzvaleńnie častki palitviaźniaŭ» nie budzie zaležać ad taho, chto budzie zajmać pasadu ministra zamiežnych spraŭ Biełarusi. Jon budzie zaležać ad situacyi na ŭkrainska-rasijskim froncie i prahnozaŭ stanu rasijskaj ekanomiki. Kali datacyi z Rasii patencyjna źmienšacca, Alaksandr Łukašenka sam spynić kanfrantacyju z Zachadam.

Bolš pra Natallu Piatkievič hladzicie ŭ videafilmie «Našaj Nivy»:

• 8
• 1
• 16
• 4
• 1
• 1
• 4
• 1