Aramatyčnyja śviečki takija ž škodnyja, jak vychłapnyja hazy aŭtamabilaŭ

Navukoŭcy z ZŠA vyśvietlili, što aramatyčnyja pradukty, takija jak voskavyja pałoski i aramatyčnyja biezahniavyja śviečki, mohuć być hetak ža škodnymi, jak i tradycyjnyja krynicy zabrudžvańnia, jakija my zvykła ŭsprymajem jak niebiaśpiečnyja, pieradaje partał New Atlas.

Pavodle daśledavańnia, nahravańnie aramatyčnych voskaŭ pryvodzić da ŭzajemadziejańnia terpienaŭ (arhaničnych złučeńniaŭ, jakija adkazvajuć za vodary raślin i śpiecyj) z azonam u pamiaškańni, u vyniku čaho ŭ pavietry źjaŭlajucca nanačaścicy, zdolnyja pranikać hłyboka ŭ lohkija i navat traplać u kroŭ.

Vyniki analizu pakazali, što spalvańnie adnoj aramaśviečki na praciahu 5 chvilin moža ŭtvaryć da adnaho miljona takich nanačaścic na kubičny santymietr pavietra, što supastaŭna z uzroŭniem, jaki vypracoŭvajecca hazavymi plitami ci dyzielnymi ruchavikami. Pryčym vykarystańnie niearamatyčnych śviečak nie vyklikała takoj reakcyi.

«Adnoj z najbolš niebiaśpiečnych charaktarystyk nanačaścic, jakija ŭtvarajucca pry vykarystańni aramatyčnych śviečak, źjaŭlajecca ich zdolnaść hłyboka pranikać u dychalnuju sistemu. Navukoŭcy adznačajuć, što bolšaść čaścic pamieram mienš za 100 nanamietraŭ zastajucca ŭ vierchnich dychalnych šlachach, ale niekatoryja mohuć traplać u kroŭ i dasiahać unutranych orhanaŭ, u tym liku hałaŭnoha mozhu, pryvodziačy da raźvićcia roznych zachvorvańniaŭ, takich jak astma, insult, kahnityŭnyja rasstrojstvy i hetak dalej.

Padobnyja efiekty nazirajucca i pry praciahłym uździejańni zabrudžanaha pavietra z transpartnych vychłapaŭ, što dakazana šmatlikimi daśledavańniami pra ŭpłyŭ haradskoha smohu na zdaroŭje ludziej», — padkreślivajuć navukoŭcy.

Asablivaści ŭździejańnia hetych nanačaścic na arhanizm čałavieka pakul zastajucca nie da kanca vyvučanymi, ale ŭžo zaraz možna kazać, što vykarystańnie aramatyčnych śviečak i voskaŭ varta razhladać jak aktyŭnuju krynicu chimičnych źmien u pavietry žyłych pamiaškańniaŭ. U adroźnieńnie ad vychłapnych hazaŭ, jakija, choć i škodziać, ale pastupova vyvodziacca viatrami i atmaśfiernymi apadkami, aramatyčnyja pradukty drenna vyvietryvajucca i ŭpłyvajuć niepasredna na tych, chto znachodzicca ŭ pamiaškańni.

Uličvajučy ŭsio heta, navukoŭcy rajać znajści bolš biaśpiečnyja sposaby palapšeńnia pavietra ŭ pamiaškańni: častaje naturalnaje pravietryvańnie, umieranaje vykarystańnie dyfuzaraŭ z naturalnymi efirnymi alejami (naprykład, łavanda, čajnaje dreva, miata) ci vykarystańnie pryrodnych pachaŭ biez spalvańnia i chimikataŭ (suchija travy, kvietki, cytrusavyja łupiny, karyca, vanil).

• 1
• 0
• 0
• 0
• 5
• 1
• 0
• 0