«Razumieŭ biełaruski bol apošnich stahodździaŭ». Pamior historyk Jan Ježy Mileŭski
19 lutaha ŭ Biełastoku pamior historyk Jan Ježy Mileŭski. Jamu było 73 hady. Jahonyja navukovyja intaresy zakranali nie tolki rodnuju Biełastoččynu, ale i susiedniuju Hrodzienščynu. Jaho dobra viedali i prymali ŭ biełaruskich histaryčnych asiarodkach, jon byŭ ščyrym siabram Biełarusi.
Jan Ježy Mileŭski atrymaŭ adukacyju ŭ Varšaŭskim univiersitecie, paśla čaho z pačatku 1980-ch pracavaŭ u Instytucie historyi Biełastockaha filijała Varšaŭskaha ŭniviersiteta, jaki ŭ 1997 hodzie byŭ pieraŭtvorany ŭ Biełastocki ŭniviersitet. Tam jon i pracavaŭ usio žyćcio da samaha vychadu na piensiju. U tym liku šmat hadoŭ jon zajmaŭ u roznych padraździaleńniach Biełastockaha ŭniviersiteta, źviazanych z historyjaj i humanitarystykaj, kiraŭničyja pasady.
Daśledčyja intaresy Mileŭskaha kancentravalisia na najnoŭšaj historyi Polščy i paŭnočna-ŭschodnich vajavodstvaŭ Polščy ŭ mižvajenny čas. Jahonaja navukovaja spadčyna naličvaje kala 300 publikacyj, vydadzienych nie tolki ŭ Polščy, ale i za miažoj, u tym liku ŭ Biełarusi. Značnaje miesca ŭ jahonych pracach zajmali daśledavańni, pryśviečanyja haradskim supolnaściam, takim jak Hrodna, Biełastok, Suvałki, a taksama polska-jaŭrejskim adnosinam u hady Druhoj suśvietnaj vajny.
Jan Ježy Mileŭski časta braŭ udzieł u navukovych kanfierencyjach, kruhłych stałach i tematyčnych sustrečach u Biełarusi, u pieršaj pałovie 1990-ch hadoŭ byŭ zaprošany ŭ polska-biełaruskuju kamisiju pa školnych padručnikach pa historyi.
Pra jaho ciopła ŭspaminajuć biełaruskija historyki. Tak, viadomy navukoviec z Hrodna Aleś Smalančuk napisaŭ u sacsietkach, što heta byŭ
«razumny i dobry čałaviek, vybitny historyk, jakoha vysoka canili ŭ Polščy, lubili i pavažali ŭ Biełarusi i Litvie. Nie šukaŭ vorahaŭ u historyi, razumieŭ biełaruski bol apošnich stahodździaŭ».
Kamientary