Niešta dziŭnaje adbyvałasia ŭnačy ŭ Navahrudskim kaściole. I ŭžo nie ŭpieršyniu
U noč na 23 lutaha ŭ katalickim chramie śviatoha Archanioła Michała i ŭ krypcie kaścioła ŭ Navahrudku praviali «načnuju misteryju». Jaje ŭdzielniki ŭ śpiecyjalnych płaščach, sa śviečkami chadzili pa terytoryi śviatyni, słuchali ŭ paŭzmroku arhan, spuskalisia da trunaŭ manachaŭ, piša Katolik.life.
Akazałasia, što heta svojeasablivaja ekskursija dla turystaŭ, jakaja pazicyjanujecca jak «samaja tajamničaja i niezvyčajnaja ekskursija Biełarusi» i padajecca mienavita jak misteryja — heta značyć, relihijnaja mistyčnaja praktyka.
Vyhladaje heta tak: «Na horad spuskajecca noč, u cišyni razdajecca zvon kaścielnaha zvona, usio hučniej i hučniej čutnaja muzyka, ź nizieńkaj dźviercy, što viadzie kudyści ŭ padziamielle, vychodzić manach-daminikaniec u svaim čornym ubory. Misteryja pačałasia…»
«Heta ekskursija dla tych, chto nie baicca zazirnuć u hłybiniu ŭłasnaj dušy, kab vyjavić daŭno nabalełaje, što točyć svajoj niavyznačanaściu abo sumnievam. Ekskursija niasie ŭ sabie fiłasofski padtekst, jaki prabirajecca ŭ samyja dalokija kutki śviadomaści», — havorycca ŭ anonsie.
Udzielnikam abiacajuć «mahčymaść adčuć na siabie, jak žyli i słužyli ŭ Navahrudku manachi-daminikancy 400 hadoŭ tamu»:
«Vy niby apynieciesia ŭ samym sercy manaskaha ordena, adčujecie siabie ŭ Siaredniavieččy, nadzieniecie płaščy, voźmiecie ŭ ruki śviečki i adpraviciesia ŭ paŭzmroku tajamničymi kalidorami kaścioła. Razam z manachami spuściciesia ŭ kryptu, dzie znajšli svoj apošni supakoj daminikancy».
Padkreślivajecca, što «fota i videazdymka padčas misteryi zabaronienyja, kab zachavać tajamničuju atmaśfieru».
Upieršyniu ekskursiju pačali pravodzić u siaredzinie 2024 hoda — jaje arhanizavaŭ dziaržaŭny turystyčny infarmacyjny centr Navahrudka. Zatym ekskursiju «Navahrudskaja misteryja» staŭ pravodzić minski turapieratar.
Kamientary