3 sakavika, pražyŭšy ŭsiaho 48 hadoŭ, pamierła historyk i teołah Kaciaryna Łaŭrynienka. 25 lutaha jana trapiła ŭ balnicu z dvuchbakovaj pnieŭmanijaj i ad chvaroby tak i nie ačuniała, piša Katolik.life.
Kaciaryna Łaŭrynienka naradziłasia 23 lutaha 1977 hoda ŭ haradskim pasiołku Ruba pad Viciebskam.
U 1999 hodzie skončyła Viciebski dziaržaŭny ŭniviersitet imia Mašerava pa śpiecyjalnaści «Historyja. Biełaruskaja mova i litaratura», u 2002-m — aśpiranturu Biełaruskaha dziaržaŭnaha ŭniviersiteta, u 2010-m — mahistraturu Lublinskaha katalickaha ŭniviersiteta imia Jana Paŭła II.
U 2005 hodzie abaraniła kandydackuju dysiertacyju na temu «Katalicki Kaścioł u hramadska-palityčnym žyćci PNR u 1970—1989 hadach». Aŭtarka šmatlikich navukovych i papularnych publikacyj u asnoŭnym na temy, źviazanyja z historyjaj Katalickaj carkvy.
Pačynajučy z 2003 hoda šmat hadoŭ pracavała na kafiedry suśvietnaj historyi i suśvietnaj kultury Viciebskaha dziaržaŭnaha ŭniviersiteta imia Mašerava. Zvolniłasia adtul paśla padziej 2020 hoda. U toj čas jana adkryta kamientavała hramadska-palityčny kryzis u Biełarusi ŭ pryviazcy da Katalickaj carkvy.
U apošnija hady Kaciaryna Łaŭrynienka pracavała ŭ strukturach Katalickaj carkvy, vykładała historyju i kananičnaje prava.
«Jana vielmi lubiła žyvioł, apiekavałasia imi. Była dobrym, čułym čałaviekam. Lubiła chadzić u piešyja pilihrymki, fatahrafavać piejzažy rodnaha kraju», — raskazała pra Kaciarynu jaje siabroŭka.
Na staroncy ŭ sacsietcy apošni jaje dopis byŭ z prośbaj ab malitvie ŭ suviazi z chvarobaj. Praz tydzień žančyna pamierła, a apošnija dni była biez prytomnaści, znachodziłasia na štučnaj vientylacyi lohkich.
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary
Navat niama słoŭ... Jašče nie tak daŭno stelefanoŭvalisia, spadziavalisia ŭbačycca. Vielmi lubiła katoŭ. Navat kali pryjazdžała ŭ Hłybokaje, to kuplała ježu biazdomnym katam.