Daktaroŭ, što lačyli Maradonu pierad śmierciu, buduć sudzić. Im pahražaje da 25 hadoŭ turmy

Maradona pamior 25 listapada 2020 hoda va ŭzroście 60 hadoŭ. Niepasredna pierad hetym jon pieranios apieracyju pa vydaleńni trombu ŭ hałaŭnym mozhu. Viadoma taksama, što jon prachodziŭ lačeńnie ad ałkaholnaj i narkatyčnaj zaležnaści.

Prakuratura krainy pačała śledčyja dziejańni suprać daktaroŭ i miedsiaścior nieŭzabavie paśla śmierci futbalista. Jašče ŭ 2021 hodzie kamisija z 20 ekśpiertaŭ, jakaja praviarała abstaviny jaho śmierci, pryznała dziejańni hrupy miedykaŭ «niedarečnymi, nieadekvatnymi i biezadkaznymi». Ekśpierty pryjšli da vysnovy (i na heta źviarnuŭ uvahu sud), što «šancy na vyžyvańnie Maradony byli b značna vyšejšyja», kali b jaho lačyli naležnym čynam u adpaviednaj miedycynskaj ustanovie (Maradona pamior doma).

Siarod tych, suprać kaho vyłučany abvinavačańni, — niejrachirurh Maradony Leapolda Łuke (jaki byŭ jaho asabistym doktaram), psichijatr i miedsiostry. Usie jany admaŭlajuć svaju vinu ŭ śmierci futbalista.

Padsudnym pahražaje ad vaśmi da 25 hadoŭ turmy, kali ich pryznajuć vinavatymi ŭ nienaŭmysnym zabojstvie, ździejśnienym z razumieńniem taho, što ich dziejańni mohuć pryvieści da śmierci čałavieka.

U druhoj pałovie svajoj karjery Maradona pakutavaŭ na zaležnaść ad kakainu i ŭ 1991 hodzie byŭ dyskvalifikavany na 15 miesiacaŭ paśla stanoŭčaha dopinh-testu na hety narkotyk.

Śmierć Maradony pahruziła Arhiencinu ŭ žałobu ŭ razhar pandemii COVID-19. Dziasiatki tysiač ludziej vystrailisia ŭ čerhi, kab raźvitacca z byłym forvardam «Boka Chunijors» i «Napali», kali trunu ź jaho ciełam vystavili ŭ prezidenckim pałacy.

Bolš za sotniu śviedak, u tym liku členy siamji Maradony i daktary, jakija lačyli jaho ciaham mnohich hadoŭ, vystupiać u sudzie ŭ pryharadzie Buenas-Ajresa San-Isidra.

Čakajecca, što słuchańni praciahnucca da lipienia.

Maradona byŭ znojdzieny miortvym u arandavanym domie ŭ elitnym rajonie Buenas-Ajresa, kudy jaho dastavili paśla vypiski z balnicy. Heta adbyłosia praz dva tydni paśla apieracyi.

Ustanoŭlena, što futbalist pamior ad sardečnaha prystupu.

Načnaja miedsiastra zajaviła, što bačyła «tryvožnyja prykmiety», ale atrymała zahad nie budzić Maradonu.

Dzionnaja miedsiastra, jakaja znajšła Maradonu miortvym, paprasiła, kab jaje sprava razhladałasia prysiažnymi asobna.

Prakurory abvinavačvajuć hrupu miedykaŭ u tym, što jany nastojvali na chatnim dohladzie, jaki nie adpaviadaŭ nieabchodnym patrabavańniam — naprykład, u domie nie było defibrylatara i pastajannaj prysutnaści miedykaŭ, jakija śpiecyjalizujucca na lačeńni ałkahalizmu i narkazaležnaści.

Abvinavačvańnie śćviardžaje, što futbalist byŭ kinuty na volu losu na praciahu «doŭhaha, pakutlivaha pieryjadu» — až da svajoj śmierci.

Pa słovach advakata syna Maradony, Dyhita Marya Bodry, siamja futbalista ličyć, što ŭciečka aŭdyja– i tekstavych paviedamleńniaŭ śviedčyć pra toje, što zdaroŭju zorki pahražała niepasrednaja niebiaśpieka.

Pavodle jaho słoŭ, paviedamleńni pakazvajuć, što stratehija miedycynskaj kamandy zaklučałasia ŭ tym, kab nie dać dočkam Dyjeha ŭmiešvacca, «bo kali b jany heta zrabili, [lekary] stracili b svaje hrošy».

Advakat psichijatra Ahustyny Kasačovaj, Vadzim Miščančuk, zajaviŭ, što aptymistyčna hladzić na mahčymaść apraŭdalnaha prysudu. Jon padkreśliŭ, što jaho padabaronnaja adkazvała tolki za psichičnaje zdaroŭje Maradony, a nie za jaho fizičny stan.

U rajonie Ła-Paternał u Buenas-Ajresie, dzie futbalist ź mianuškaj «Załaty chłopčyk» raskryŭ svoj talent, hulajučy za «Arhiencinas Chunijors» u 1970-ch hadach, napiaredadni sudovaha pracesu na ścienach źjavilisia hrafici z patrabavańniem: «Pravasudździe dla Dyjeha!»

«Usio hramadstva pavinna viedać… što adbyłosia nasamreč, chto jaho kinuŭ… i chto b ni byŭ vinavaty, pavinien panieści pakarańnie», — zajaviła ahienctvu AFP piensijanierka Childa Pierejra.

«Maradona nie zasłuhoŭvaŭ taho, kab pamierci tak, jak jon pamior, u adzinocie», — dadała jana.

• 1
• 0
• 0
• 2
• 0
• 0
• 0
• 0