U Francyi amal kožnaja piataja dziaŭčyna sprabavała niehieteraseksualnyja adnosiny

Francuzskija sacyjołahi praviali apytańnie 10 tysiač maładych ludziej va ŭzroście ad 18 da 29 hadoŭ. Heta pieršy vypadak, kali daśledavańnie było źviernuta da hetaj uzrostavaj katehoryi. Ź niekatorymi vyvadami znajomić vydańnie Le Monde.

Kab atrymać najbolš poŭnaje ŭjaŭleńnie pra seksualnaje žyćcio maładych ludziej, daśledčyki adyšli ad tradycyjnaj mietadałohii. Raniej takija apytańni ŭ asnoŭnym zasiarodžvalisia na miedycynskich aśpiektach i pytańniach hramadskaha zdaroŭja (naprykład, zaściaroha i vienieryčnyja zachvorvańni). Adnak taki padychod ihnaravaŭ sacyjalny kantekst seksualnaści.

U svaim daśledavańni francuzskija vučonyja prymianili «relacyjny padychod», razhladajučy seksualnaść nie asobna, a ŭ ramkach sacyjalnych i emacyjnych suviaziaŭ. Kab ułavić hetyja źmieny, kamanda raspracavała śpiecyjalnuju ankietu.

Pa słovach aŭtaraŭ, sučasnaja moładź bolš nie abmiažoŭvajecca tolki dźviuma krajnaściami — tradycyjnymi ramantyčnymi adnosinami i vypadkovymi seksualnymi suviaziami. Pamiž hetymi krajnaściami ŭźnikła mnostva pramiežkavych farmataŭ, jakija majuć peŭnuju praciahłaść, ale nie abaviazkova ŭklučajuć u siabie ramantyčnyja pačućci.

Moładź vynajšła novyja terminy dla abaznačeńnia hetych pramiežkavych suviaziaŭ, jakija razmyvajuć miežy pamiž siabroŭstvam i kachańniem i źbivajuć z pantałyku starejšaje pakaleńnie: «siabroŭstva z bonusami», «rehularny seks-partnior», «siabroŭstva z pryvilejami», «seks-frend», «mucim». Ab svaim udziele ŭ takich «stabilnych, ale nie ramantyčnych» adnosinach na praciahu apošniaha hoda paviedamiła 15% apytanych.

Hetyja suviazi ŭźnikajuć u kantekście pavieličeńnia kolkaści seksualnych partnioraŭ: u 2023 hodzie bolš za tracinu (35%) ludziej va ŭzroście 25—29 hadoŭ zajavili, što mieli prynamsi dziesiać partnioraŭ za svajo žyćcio.

Najbolšyja źmieny zaŭvažny siarod žančyn, jakija značna bolš, čym raniej, uciahnutyja ŭ seksualnaje žyćcio pa-za adnosinami.

Uražvajuć i źmieny ŭ seksualnaj aryjentacyi: 19% maładych žančyn identyfikujuć siabie nie jak hieterasieksuałki, tady jak u 2006 hodzie takich było mienš za 3%.

Adnak, navat pry tym, što moładź sprabuje razburyć tradycyjnuju madel pary, jana nie admaŭlajecca ad jaje całkam: dvoje z troch (66%) udzielnikaŭ apytańnia zajavili, što mieli taki dośvied ciaham apošnich dvanaccaci miesiacaŭ.

Vyniki svajho daśledavańnia vučonyja pradstavili ŭ knizie «Seksualnaść budučaha» («La sexualité qui vient»), jakaja vyjšła ŭ hetym miesiacy.

U dalejšym aŭtary chočuć daśledavać, jak novyja farmaty suviaziej, papularnyja siarod 18—29-hadovych, buduć raźvivacca z časam. Ci buduć «siabry z bonusami» i «stabilnyja, ale nie ramantyčnyja» adnosiny supravadžać hetych ludziej u darosłym žyćci? Ci stanuć takija madeli normaj i dla inšych uzrostavych hrup? Ci, naadvarot, z časam maładyja ludzi viernucca da bolš tradycyjnych ujaŭleńniaŭ ab pary?

• 3
• 1
• 0
• 0
• 1
• 1
• 0
• 1