Ipateka 100%. Jak inžynier — «daśviedčany mihrant» — buduje ŭ Niderłandach kvateru

Ajcišnik žyvie ŭ arendnaj kvatery, ale ŭ nastupnym hodzie moža pierajechać va ŭłasnaje žyllo. U 2024 hodzie jon atrymaŭ ipateku na nabyćcio novaha žylla. Dom pakul na stadyi budaŭnictva, jaho płanujuć pabudavać da kanca 2026 hoda. Ałan raspavioŭ devby.io pra asablivaści atrymańnia ipateki ŭ Niderłandach na novaje žyllo.

Ipateka pakryvaje 100% koštu žylla

 — U Niderłandach možna atrymać da 100% koštu žylla ŭ ipateku plus hrošy na pačatkovaje abstalavańnie žylla. Takaja ipateka dastupnaja nie tolki hramadzianam, ale i zamiežnikam z DNŽ.

Maksimalnaja suma ipateki budzie zaležać ad vašaha zarobku i enierhietyčnaj markiroŭki žylla. U novaha žylla jana zvyčajna vysokaja — A+++ ci vyšej. Tamu maksimalna daduć navat trochu bolš za vaš biahučy 5-kratny hadovy zarobak. A biahučy minimalny zarobak daśviedčanaha mihranta va ŭzroście 30+ prykładna 73717 jeŭra ŭ hod, uklučajučy adpačynkavyja vypłaty.

Biahučy adsotak pry 100% ipatecy na 30 hadoŭ u apošnija hady — kala 4% ź fiksacyjaj na 10 hadoŭ. Taksama vam dazvalajecca dobraachvotna vypłačvać bolš — da 10% koštu žylla ŭ hod.

U krainie taksama isnuje Nacyjanalnaja ipatečnaja harantyja (NHG). Kali žyllo kaštuje mienš za 477000 jeŭra (450000 jeŭra dla žylla ź mienšaj enierhaefiektyŭnaściu) — ipateka padpadaje pad NHG i adsotak budzie trochu mienš (stanam na luty 2025 — kala 3,6% pry tych ža ŭmovach).

Ź ciaham času, kali vy vypłacicie značnuju častku ipateki (naprykład, 10%), suadnosiny pamiž sumaj pazyki i koštam žylla palapšajucca. Akramia taho, rost cenaŭ na rynku nieruchomaści taksama palapšaje hetyja suadnosiny, bo košt vašaha žylla pavialičvajecca, a suma pazyki zastajecca raniejšaj.

U abodvuch vypadkach bank pieraaceńvaje ryzyku i moža prapanavać vam bolš nizkuju staŭku. Heta mahčyma navat u pieryjad dziejańnia fiksavanaj staŭki, ale patrabuje zvarotu ŭ bank z adpaviednaj zajavaj.

Hrošy na 30 hadoŭ

 — Mnie vydali ipateku na 30 hadoŭ pad 4,12% ź pierahladam staŭki praz 10 hadoŭ na 100% koštu kvatery. Pryblizny košt trochpakajovaj kvatery (haścioŭnia + 2 spalni) kłasa M u domie — 475000 — 570000 jeŭra. 2-pakajovyja S byli ad 390 000 da 415 000 jeŭra. Mahu skazać, što heta trochu tańniej, čym bolšaść prapanoŭ.

Treba adznačyć, što košt kvatery ŭžo ŭklučaje košty ziamli, nataryusa i ŭsie źviazanyja padatki (21% PDV). I ipateka pakryvaje ŭsie vydatki.

Kali kuplać novaje žyllo ŭ bujnych haradach, ziamla ŭ bolšaści vypadkaŭ budzie znachodzicca va ŭłasnaści municypaliteta. Za arendu ziamli treba budzie płacić erfpacht. Heta moža być 600 jeŭra ŭ hod, a ŭ centry Amsterdama ja bačyŭ i bolš za 10000.

U inšym vypadku ziamla budzie va ŭłasnaści ŭładalnika nieruchomaści. U maim vypadku ziamla kaštavała 46% koštu kvatery. Ziamla pieradavałasia va ŭłasnaść u nataryusa sumiesna z padpisańniem akta ipateki.

U dzień nabyćcia ziamli bank aŭtamatyčna adkryŭ budaŭničy depazit (bouwdepot). Častku hrošaj ipateki bank pieraličyŭ za ziamlu na śpiecyjalny rachunak nataryusa, a astatniuju častku — na budaŭničy depazit.

Na niavykarystanyja hrošy budzie naličvacca taki ž samy adsotak, pad jaki bank vydaŭ ipateku. Heta moža doŭžycca maksimalna 30 miesiacaŭ. Takim čynam, u pačatku vy budziecie atrymlivać hrošy ad banka trochu bolš za pałovu taho, što płacicie za karystańnie ipatekaj. Hetyja hrošy bank aŭtamatyčna zaličyć pry štomiesiačnaj apłacie ipateki.

Afarmleńnie ipateki

 — Umovy va ŭsich bankach prykładna adnolkavyja. Ale praściej atrymać tam, dzie absłuhoŭvaješsia. Ja afarmlaŭ ipateku ŭ banku ABN Amro, dzie ŭ mianie jość biahučy zarpłatny rachunak.

Paśla zaćviardžeńnia ipatečnaj uhody jon biaspłatna dasłaŭ kredytnuju kartku Gold. Nijakich pytańniaŭ pra biełaruski pašpart nie było.

Patrebnyja dakumienty sabraŭ za tydzień, pracaŭnica banka kazała, što moj vypadak byŭ samy chutki na jaje pamiaci.

Ad mianie patrabavali nastupnyja dakumienty:

• kopija pašparta i DNŽ;
• vypiska z rachunku;
• forma paćviardžeńnia ad pracadaŭcy;
• forma pracoŭnaha strachavańnia ad pracadaŭcy;
• apošni zarpłatny list;
• padpisany kantrakt na nabyćcio žylla;
• vypiska ź piensijnaha fondu za apošni hod — atrymlivajecca na sajcie;
• vypiska ź dziaržaŭnaj piensijnaj ustanovy — atrymlivajecca na sajcie;
• historyja pracy ŭ Niderłandach — atrymlivajecca na sajcie;
• dakumienty ad zabudoŭščyka;
• zapoŭnieny apytalnik;
• infarmacyja ab nataryusie, jaki budzie afarmlać nabyćcio ziamli i ipatečny akt. (Nataryus byŭ vybrany pradaŭcom).

Padpisańnie kantrakta

 — Kantrakt padpisvaŭ u maklera pradaŭca. Svajho maklera nie najmaŭ. Makler pradaŭca prachodziŭ pa ŭsich punktach kantraktaŭ — na nabyćcio ziamli i na budovu.

Paśla padpisańnia kantraktu na nabyćcio ziamli i kantrakta na budoŭlu žylla ŭ maklera, pakupniku dajecca tydzień na rozdum, kali kantrakt mahčyma skasavać biez nastupstvaŭ.

Taksama ŭ kantrakcie ahavorany finansavy punkt, pa jakim dajecca 2 miesiacy na pošuk finansavańnia. Kali finansavańnie nie znojdziena, kantrakt mahčyma skasavać taksama bieź finansavych nastupstvaŭ dla pakupnika.

Dla hetaha treba prademanstravać chacia b adnu admovu ad banka ci ipatečnaj firmy. U inšych vypadkach pakupnik abaviazany vypłacić peŭnuju damoŭlenuju ŭ kantrakcie sumu, zvyčajna 10% ad sumy kantrakta.

Darečy, u kantrakcie byŭ ślizki momant. U vypadku kali kampanija nie paśpiavała da damoŭlenaj daty pradać 80% kvater u domie i tamu atrymać kančatkovy dazvoł ad municypalitetu na pačatak budoŭli, ja vymušany byŭ by płacić peŭny kamiercyjny adsotak (7% hadavych) ad sumy koštu ziamli.

Potym, kali dazvoł nie atrymany, ja b mieŭ mahčymaść skasavać kantrakt ci apłacić hety adsotak u dadatak da ahulnaha koštu kvatery. Heta mianie vielmi naściarožyła.

Ale niezaležny kansultant, jakoha ja znajšoŭ, skazaŭ, što takaja praktyka zredku sustrakajecca, ale budaŭničaja firma viadomaja i jany taksama zacikaŭleny jak maha chutčej atrymać dazvoł. Kali hetaja data nastupiła, dazvołu jašče nie było, i praz 25 dzion ja atrymaŭ list, što ŭsie farmalnaści byli vykanany, a tyja 7% jany vyrašyli nie spahaniać z pakupnikoŭ. Taki voś cud.

Košty afarmleńnia ipateki

 — Aformić ipateku kaštavała 1950 jeŭra, ź jakich 750 jeŭra — košt afarmleńnia, 1200 jeŭra — košt pracy daradcy.

Paradu možna nie atrymlivać, kali zdać banku test na viedańnie zakonaŭ ab ipatecy (tolki na niderłandskaj movie).

• 363 jeŭra — praca sinchronnaha pierakładčyka.
• 1470 jeŭra — ceny nataryusa, kudy ŭklučany jaho pasłuhi i taksama raznastajnyja vydatki (zapisy ŭ kadastr i h. d.).

Košty rehistracyi nabyćcia ziamli byli ŭklučany ŭ košt kvatery.

Hetyja košty nataryus prysyłaje notaj, jakuju treba apłacić da vizitu. Inakš nataryus nie maje zakanadaŭčaj mahčymaści pačać pracavać z dakumientami.

Sumu cany za ziamlu bank pieravodzić nataryusu biez udziełu pakupnika na śpiecyjalny rachunak nataryusa (rachunak treciaj asoby). Kali nataryus zarehistravaŭ usio ŭ kadastry, jon atrymlivaje mahčymaść pieraličyć hrošy pradaŭcu.

Pryblizna tak vyhladaje ŭhoda. Kali spaźnicca na damoŭlenuju sustreču z nataryusam ci nie apłacić notu — heta budzie kaštavać niekalki tysiač i moža mieć inšyja niehatyŭnyja nastupstvy (tyja 7%) dla pakupnika.

Padatki

 — Padatak na nabyćcio novaha žylla składaje 0%. U inšych vypadkach heta 2%, kali kuplaješ dla siabie, i 10,4% dla inviestycyjnaha nabyćcia. Suma, jakuju vy vypłačvajecie jak adsotak pa pazycy, traplaje pad padatkovy vylik. Zaraz heta kala 37%. Taksama pad vylik padpadajuć bankaŭskija i nataryjalnyja vydatki na afarmleńnie ipateki.

Što ŭvachodzić u košt kvatery

 — Kvatera budzie ŭ čystavym azdableńni. Pra toje, kolki ŭkładvajuć u pačatkovaje azdableńnie, mnie nieviadoma, ličby mohuć być roznyja — chtości i 200 tys. hatovy ŭkłaści.

U košt kvatery ŭvachodzić aciapleńnie i achaładžeńnie padłoh, sistema prymusovaj vientylacyi z rekupieracyjaj pavietra, a taksama z datčykami CO₂, vanna i prybiralnia ź plitkaj i santechnikaj, raźviedzienaja elektryka, huka– i ciepłaizalacyja, škło HR+++, bałkon sa štučnym aśviatleńniem, mižpakajovyja dźviery i ŭvachodnyja dźviery z zamkom. Ciapło i choład dom biare z-pad ziamli pa hieatermalnaj technałohii.

Taksama buduć razietki, vyklučalniki, termastaty, razvodka sietkavaha drotu, pažarnaja sihnalizacyja. Za asobny košt mahčyma dakamplektavać źniešnimi elektryčnymi raletami na vokny, rehulatary vientylacyi dla adnoj spalni i haścioŭni (jakaja sumieščana z kuchniaj), termarehulatary dla kožnaha pakoja.

• 5
• 2
• 0
• 1
• 0
• 0
• 0
• 0