Va Ukrainie raspačali kryminalnuju spravu praz traŭmavanuju ŭ Dubai 20-hadovuju Maryju Kavalčuk
Kavalčuk znachodzicca ŭ špitali ŭ Dubai, dzie jana pieraniesła niekalki apieracyj. Stan dziaŭčyny stabilny, pahrozy žyćciu niama.
Palicyja Ukrainy raspačała kryminalnuju spravu pa fakcie handlu ludźmi ŭ spravie 20-hadovaj Maryi Kavalčuk, jakaja atrymała ciažkija traŭmy ŭ Dubai.
Dziaŭčyna źnikła ŭ Dubai na pačatku sakavika. Rodnyja i siabry šukali jaje, i praz tydzień jaje znajšli ŭ ciažkim stanie na ŭzbočynie darohi. Zaraz jana znachodzicca ŭ balnicy, jaje žyćciu ničoha nie pahražaje, pra heta Bi-bi-si Ukraina paviedamiła Hałoŭnaje śledčaje ŭpraŭleńnie Nacpalicyi.
«Pavodle infarmacyi ŭ ŚMI, śledčyja Nacyjanalnaj palicyi va Lvoŭskaj vobłaści raspačali asobnaje kryminalnaje rasśledavańnie pa prykmietach złačynstva, praduhledžanaha častkaj 1 artykuła 149 Kryminalnaha kodeksa Ukrainy», — havorycca ŭ paviedamleńni.
Hety artykuł praduhledžvaje adkaznaść za handal ludźmi, a taksama nabor, pieramiaščeńnie paciarpiełych z metaj ekspłuatacyi. U palicyi adznačajuć, što ciapier idzie daśledčaje rasśledavańnie, padrabiaznaści jakoha nie ahałošvajucca.
Kavalčuk znachodzicca ŭ špitali ŭ Dubai, dzie jana pieraniesła niekalki apieracyj. Stan dziaŭčyny stabilny, pahrozy žyćciu niama.
Tydzień tamu pres-słužba MZS Ukrainy paviedamiła Bi-bi-si Ukraina detali situacyi ź dziaŭčynaj. Pra jaje taksama pisali zachodnija ŚMI, spasyłajučysia na krynicy. Maci dziaŭčyny zajaviła pra jaje źniknieńnie. Šerah miedyja nazyvali Maryju madellu z OnlyFans.
«20 sakavika konsulstva Ukrainy ŭ Dubai atrymała zvarot ad hramadzianki Ukrainy nakont źniknieńnia jaje dački i adrazu pačało pošuki va ŭzajemadziejańni ź miascovaj palicyjaj», — raspaviali ŭ MZS.
Konsuły vyśvietlili, što 12 sakavika paciarpiełaja trapiła ŭ adzin ź miedycynskich centraŭ u Dubai. Supracoŭniki konsulstva naviedali špital i daviedalisia, što hramadzianka Ukrainy atrymała traŭmy i znachodziłasia ŭ ciažkim stanie.
«Padčas śledčych dziejańniaŭ miascovaja palicyja papiarednie ŭstanaviła, što paciarpiełaja atrymała paškodžańni, vierahodna, upaŭšy z vyšyni na zabaronienaj budaŭničaj placoŭcy. Miascovyja pravaachoŭniki adkryli kryminalnuju spravu i pravodziać rasśledavańnie», — raspaviali ŭ MZS.
Dypłamaty padkreślivajuć, što miascovyja ŭłady całkam sadziejničajuć paciarpiełamu boku i supracoŭničajuć z konsułami.
«Ukrainskija konsuły taksama damovilisia ź miascovymi ŭładami ab padtrymcy maci paciarpiełaj hramadzianki Ukrainy. Konsulstva znachodzicca na pastajannym kantakcie z svajakami paciarpiełaj, jaje advakatam i pradstaŭnikami kampietentnych orhanaŭ AAE, trymaje spravu pad kantrolem», — dadali ŭ MZS.
Maci dziaŭčyny Hanna paviedamiła, što ŭ dački zafiksavali šmatlikija pierałomy.
«Jość nazva hatela, dzie jaje bačyli. I jość papiaredniaje miesca žycharstva — taksama hatel. Jość zdahadka, što jana chadziła na viečarynu. Ale pramoŭtar, jaki arhanizoŭvaŭ hetyja viečaryny, jaje nie bačyŭ. Mašu znajšli ŭ balnicy ŭ ciažkim stanie. Jana biez dakumientaŭ, biez telefona, bieź ničoha. Try apieracyi jana pieraniesła. I jana nie moža havaryć», — raspaviała žančyna žurnalistam.
Pavodle ŚMI, 9 sakavika dziaŭčyna naviedała zabaŭlalnaje mierapryjemstva, dzie paznajomiłasia z dvuma mužčynami — nibyta pradstaŭnikami madelnaha biznesu.
10 sakavika jana paviedamiła maci, što zastaniecca ŭ ich na noč, a ŭžo 11 sakavika pavinna była vylecieć u Tajłand. Ale paśla hetaha pierastała vychodzić na suviaź.
Uradženka Lvova Maryja Kavalčuk taksama brała ŭdzieł u mižnarodnaj akcyi «Boris for Peace!», pryśviečanaj palitołahu Barysu Kaharlickamu, jakoha ŭ Rasii asudzili na 5 hadoŭ pa artykule ab «apraŭdańni teraryzmu».
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary