Źniknieńnie śpikierki KR Anžaliki Mielnikavaj. Usio važnaje, što viadoma na hety momant

Anžalika Mielnikava (u dziavoctvie Bialevič). Naradziłasia ŭ Niaśvižy. Skončyła Minski dziaržaŭny linhvistyčny ŭniviersitet i Biełaruski dziaržaŭny ekanamičny ŭniviersitet. U 2011—2018 pracavała ŭ «Koka-Koła Bieŭrydžyz Biełaruś», apošnija dva hady — namieśnicaj hienieralnaha dyrektara pa suviaziach z hramadskaściu. Paśla pajšła ŭ dekretny adpačynak. U 2020-m paśla dvuch zatrymańniaŭ na pratestach razam z mužam i dziećmi vyjechała va Ukrainu, a paśla ŭ Polšču. Dałučyłasia da NAU jak śpiecyjalist pa kamunikacyjach, z časam uźniałasia da pasady śpikierki Kaardynacyjnaj rady. U razvodzie, maje dźviuch dačok: Hannu (13 hadoŭ) i Taćcianu (7 hadoŭ).

Čytajcie archiŭnaje intervju: «Pazvaniŭ ministr: Anžalika, kudy ty lezieš?» Byłaja top «Koka-Koły» raskazvaje, jak stała śpikierkaj Kaardynacyjnaj rady

Pavialičyć

Tajamničaje źniknieńnie Mielnikavaj i jaje muža

Pra źniknieńnie śpikierki Kaardynacyjnaj rady Anžaliki Mielnikavaj jaje siabry paviedamili ŭviečary 28 sakavika.

U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Pa infarmacyi polskich siłavikoŭ, jana pakinuła Polšču niekalki tydniaŭ tamu.

Chutčej za ŭsio, havorka idzie prykładna pra 10 sakavika. U hety dzień śpikierka adpraviła paviedamleńnie ŭsim delehatam KR, u jakim papiaredziła pra chvarobu: 

«U mianie ŭskładnieńnie paśla kavidu, i siońnia paćvierdziłasia zapaleńnie lohkich. Ciapier ja na ŭkołach i antybijotykach. Kali ŭźniknie niešta sapraŭdy važnaje i terminovaje, ja zaŭsiody budu na suviazi i zmahu ŭdzielničać u nieadkładnych naradach / zvankach praz Zoom. Ale prašu pastavicca z razumieńniem — ja budu na balničnym bližejšyja dva tydni».

Ci nasamreč Mielnikava chvareła? Niezrazumieła. Adnak u lubym razie z abvieščanym «zapaleńniem lohkich» jana adpraviłasia ŭ aeraport i, nie papiaredziŭšy nikoha, palacieła ŭ Łondan.

Ci byli z Anžalikaj jaje dźvie małyja dočki, jakija žyli ź joj? Adkazu na hetaje pytańnie pakul niama.

Prykładna ŭ hetyja ž dni były muž śpikierki, ajcišnik Andrej Mielnikaŭ, taksama vyjechaŭ z Varšavy. Jon viarnuŭsia ŭ Biełaruś.

Pavialičyć

Hrašovaje pytańnie

U kancy 2022 hoda, jašče da źjaŭleńnia ŭ Kaardynacyjnaj radzie, Anžalika Mielnikava stała zasnavalnicaj fondu Białoruś Liberty. U skład jaho kiraŭnictva ŭvachodziła pradstaŭnica «Kibierpartyzanaŭ» Julijana Šamietaviec.

Jak vyśvietliłasia, Mielnikava zajmałasia pošukam hrantavaha finansavańnia dla «Kibierpartyzanaŭ».

Kaardynacyjnaja rada, jakuju ŭznačalvaje Mielnikava, nie maje nijakaha jurydyčnaha statusa. Faktyčna heta prosta niejki kłub pa intaresach. Adnak kali ŭdzielniki KR znajšli finansavańnie pad jaho, to vyrašyli atrymlivać hrošy ad donaraŭ mienavita na rachunak taho samaha Białoruś Liberty.

U liście, jaki Mielnikava na raźvitańnie adpraviła siabram KR, paviedamlałasia, što nieŭzabavie pavinny pryjści hrošy ad donara. Pa słovach krynicy «Našaj Nivy», havorka idzie pra pieršy tranš — pamieram kala 100 tysiač jeŭra.

Kali Mielnikava źnikła, akazałasia, što nichto nie moža pravieryć stan rachunkaŭ. Ci pryjšli hrošy na KR? Ci Mielnikava ich źniała albo pieraviała? Adkazu na hetyja pytańni niama. Nie mohuć pravieryć svoj rachunak i «Kibierpartyzany».

Sam fakt taho, što KR atrymlivaje takija niemałyja hrošy, staŭ niečakanaściu dla niekatorych delehataŭ. Jany byli ŭpeŭnienyja, što KR pracuje biaspłatna.

Pavialičyć

Reakcyja prapahandy

Infarmacyja pra źniknieńnie Mielnikavaj źjaviłasia ŭviečary ŭ piatnicu. Nie majučy mietadyčak, prapahandysty nie viedali, jak reahavać. Na praciahu suboty vymalavałasia dźvie linii.

Častka pamyjnych prałukašenkaŭskich telehram-kanałaŭ prosta pierakazvaje infarmacyju ź niezaležnych miedyja, dadajučy kpiny i ździeki ź niedarečnaj situacyi.

Blizki da KDB prapahandyst ANT Ihar Tur sprabuje šmatznačna namiakać, što da źniknieńnia Mielnikavaj mohuć być datyčnyja biełaruskija śpiecsłužby, a jana, maŭlaŭ, pracavała jak ahient prykryćcia. Ci heta surjoznyja zajavy, ci žartaŭlivy blef, niezrazumieła. Nijakaj kankretyki ŭ jaho słovach nie hučyć.

Vyniki

Dzie znachodzicca Anžalika Mielnikava? U apazicyi niama adkazu na heta pytańnie. Ci isnuje jon u biełaruskaj dziaržavy, pakaža čas. Jak minimum u ich jość mahčymaść spytać pra jaje los u byłoha muža śpikierki.

Polskija siłaviki rasśledujuć spravu ab źniknieńni žančyny, ale pakul nie infarmujuć hramadskaść pra infarmacyju, jakuju atrymlivajuć z Łondana. Kudy palacieła Mielnikava dalej, jaki kančatkovy punkt jaje tajamničaha padarožža — hałoŭnaje pytańnie na hety momant.

• 2
• 1
• 8
• 34
• 3
• 3
• 1
• 0