Mieniedžarka «Koka-koły», jakaja pajšła ŭ palityku. Što viadoma pra źnikłuju śpikierku KR Anžaliku Mielnikavu

Źnikli i dzieci Mielnikavaj, ź jakimi jana žyła ŭ Varšavie. Ci byli jany ź joj, kali jana adlatała, nieviadoma. Były muž Anžaliki znachodzicca nie ŭ Polščy.

Apošnim časam Mielnikava kazała, što nibyta mocna zachvareła, padzialilisia z «Našaj Nivaj» jaje kalehi. U pačatku lutaha jana paviedamiła im, što praz stan zdaroŭja nie moža zajmacca spravami Kaardynacyjnaj rady.

Pavialičyć

Kaardynacyjnaja rada

Anžaliku Mielnikavu abrali śpikierkaj Kaardynacyjnaj rady 3 sklikańnia ŭ lipieni 2024 hoda. Vyłučałasia jana sa śpisu «Kamandy Łatuški i Ruch «Za Svabodu».

4 lutaha 2025 ŭ kanale KR źjaviŭsia apošni post z udziełam Mielnikavaj. U im śpikierka KR raspaviadała pra vyniki Forumu Kaściuški ŭ Hdańsku.

Dźvie adukacyi i paśpiachovaja karjera ŭ Biełarusi

38-hadovaja Anžalika Mielnikava naradziłasia ŭ Niaśvižy, skončyła MDŁU i BDEU. Pracavała śpiecyjalistkaj u halinie kamunikacyi i pierakładčycaj-refierentkaj. Da 2018 hoda była namieśnicaj hienieralnaha dyrektara «Koka-Koła Bieŭrydžyz Biełaruś».

U intervju Anžalika kazała, što i jana, i muž-ajcišnik u Biełarusi dobra zarablali. Pabudavali kvateru, mahli adpačyvać siamjoj niekalki razoŭ na hod. U 2018 hodzie Mielnikava syšła ŭ dekretny adpačynak, ciažarnaja druhoj dačkoj.

Da 2020 hoda žančyna asabliva nie cikaviłasia palitykaj u krainie. Ale z pratestami Mielnikava zaniałasia aktyvizmam u rodnym horadzie, kudy pierajechała padčas karanavirusu. Za ŭdzieł u maršy i viełaprabieh sa ściahami jaje dvojčy sudzili pa administracyjnych artykułach. Pakolki ŭ Anžaliki małyja dzieci, joj davali štrafy.

U vieraśni 2020 hoda siamja źjechała ź Biełarusi.

Emihracyja i palityčnaja dziejnaść

Spačatku biełarusy pierajechali ŭ Kijeŭ, a zatym u Polšču pa IT-prahramie Poland. Business Harbour. U Mielnikavaj jość polskija karani, praź jakija jana adrazu atrymała pastajanny dazvoł na žycharstva.

U Biełastoku žančyna vučyła polskuju movu, prajektny mieniedžmient i zajmałasia dziećmi. Tam ža pačała aktyŭničać u fondzie «Biełaruś-2020». Hety fond sumiesna z «Krainaj dla žyćcia» ŭ 2020 hodzie arhanizoŭvaŭ u Biełastoku šełtar dla palityčnych uciekačoŭ ź Biełarusi.

Niekalki hod Mielnikava supracoŭničała z Paŭłam Łatuškam. Spačatku jak pierakładčyca i aŭtarka tekstaŭ, paśla — zaniałasia prajektnym mieniedžmientam i stała daradcaj pa stratehičnych pytańniach.

Pavialičyć

U śniežni 2022 hodu jana zasnavała ŭ Polščy fond Belarus Liberty. Pra dziejnaść hetaj arhanizacyi ŭ internecie niašmat infarmacyi. U jaje naziralnuju radu, aproč Mielnikavaj, uvachodzić Uljana Šamietaviec, pradstaŭnička «Kibierpartyzan».

Z mužam Mielnikava raźviałasia praz toje, što toj «pierastaŭ padtrymlivać aktyŭnaść i padzialać pohlady».

U Kaardynacyjnaj radzie Mielnikavu ličyli «čałaviekam Łatuški».

• 1
• 0
• 4
• 8
• 1
• 3
• 1
• 1