Čynoŭniki rychtujuć źmieny dla repietytaraŭ — mohuć zabaranić Zoom i vialikija hrupy

Ministerstva adukacyi vyniesła na abmierkavańnie zakonaprajekt, jaki moža istotna abmiežavać pracu biełaruskich repietytaraŭ, vykładčykaŭ i łahapiedaŭ. Abmierkavańnie novaha dakumienta praciahniecca da 10 krasavika. Pakul heta tolki prajekt zakona, to-bok prapanova ŭładaŭ, jakaja jašče nie dziejničaje.

Što prapanujuć

Kali zakonaprajekt prymuć, to vykładać anłajn dazvolać tolki praz «vykarystańnie infarmacyjnych sietak, sistem i resursaŭ, raźmieščanych na terytoryi Biełarusi i zarehistravanych u vyznačanym paradku». Takija papularnyja servisy, jak Zoom, Google Meet, Microsoft Teams nie adpaviadajuć hetamu patrabavańniu.

Repietytary buduć mieć abaviazak infarmavać spažyŭcoŭ pra «akazańnie pasłuh biez dakumientaŭ, jakija paćviardžajuć jakaść pasłuh i biaśpieku». A taksama na patrabavańnie spažyŭcoŭ pakazvać dakumienty pra svaju adukacyju.

Nastaŭniki-łahapiedy, defiektołahi, tyfła– i surdapiedahohi zmohuć akazvać pasłuhi tolki indyvidualna, nie ŭ hrupach.

Na repietytara taksama prapanujuć uskłaści abaviazak vykonvać «maralnyja i etyčnyja normy», biez tłumačeńnia, što heta značyć.

Źmiest repietytarskich pasłuh musić adpaviadać adukacyjnaj prahramie, jakuju ŭ hety momant zasvojvaje vučań u svajoj ustanovie adukacyi (dziciačy sadok, škoła, VNU). U dakumiencie nie tłumačycca, što rabić, kali hety vučań darosły čałaviek i nie zajmajecca va ŭstanovie adukacyi ŭ dadzieny momant.

Vučyć pracy na kampjutary, a taksama mastactvu, tancam, vakału, aratarskamu majsterstvu možna budzie i biez adpaviednaści adukacyjnaj prahramie, ale tolki darosłych vučniaŭ. Što rabić, kali ŭ školnaj prahramie ničoha niama pra aratarskaje majsterstva ci tancy — nie tłumačycca.

Repietytary, kali hety zakonaprajekt uchvalać, buduć zmušanyja vykładać tolki indyvidualna ci ŭ hrupach, nie bolšych za 4 čałavieki.

Biełaruskija anałahi Zoom i Google Meet

U Biełarusi jość anałahi servisaŭ dla videakanfierencyj i zvankoŭ anłajn. Adzin z takich servisaŭ — videozvonok.by ad kampanii «BiełPrajektKansałtynh».

Hety servis prapanuje standartny funkcyjanał dla padobnych prahram: zapis videa, kanfierencyi, pieradača fajłaŭ, demanstracyja prezientacyj dy inšaje. Biaspłatnaja viersija prahramy maje abmiežavańni — da 10 udzielnikaŭ. U markiecie Google Play, praź jaki raspaŭsiudžvajucca prahramy pad Android, u hetaha servisu tolki 10+ spampavańniaŭ.

Na staroncy, pryśviečanaj prahramie, taksama nie napisana, kolki klijentaŭ joju karystajucca.

Jašče kampanija «Mabilny servis» sumiesna z Naveksoft u 2020 hodzie stvaryli prahramu dla videakanfierencyj Navek Meet. Pra jaje vypusk u śviet pisali dziaržaŭnyja ŚMI, prahramu rekłamavali dziaržaŭnyja ŭstanovy adukacyi.

Prahrama dastupnaja i ciapier, choć kampanija «Mabilny servis» užo nie isnuje, a Naveksoft na svaim sajcie navat nie zhadvaje pra zrobleny niekali servis dla videakanfierencyj.

Reakcyja

Na aficyjnym forumie, dzie prajekt zakona vynieśli na abmierkavańnie, źjaviłasia šmat pytańniaŭ ad karystalnikaŭ. Samyja častyja:

— Navošta abmiažoŭvać kolkaść vučniaŭ da čatyroch, kali, naprykład, vučni majuć padobnyja prahały ŭ viedach, a indyvidualnyja zaniatki naohuł kaštujuć daražej?

— Jak možna abmiažoŭvać źmiest navučańnia ŭ repietytara tolki adukacyjnymi prahramami ŭstanoŭ adukacyi, bo darosłyja ž taksama chodziać da repietytaraŭ, kab vyvučyć tuju samuju zamiežnuju movu?

— Kali repietytary pracujuć z zamiežnymi vučniami, navošta im biełaruskija adukacyjnyja prahramy?

— Čym zamianić papularnyja prahramy dla anłajn-zaniatkaŭ, čamu ŭ dakumiencie nie padajucca alternatyvy?

• 0
• 2
• 3
• 4
• 1
• 0
• 1
• 0