Biełarusy zapuścili biaspłatny bot pa pošuku žylla ŭ Polščy. U płanach Hiermanija i inšyja krainy
Kamanda biełarusaŭ zapuściła biaspłatny telehram-bot pa pošuku žylla ŭ Polščy — @Rentai_pl_bot. Jon źbiraje danyja z płatformy anłajn-abjaŭ OLX i pradastaŭlaje varyjanty arendnaha žylla pa zapycie. Pakul bot pracuje tolki pa Polščy, ale stvaralniki płanujuć paźniej pašyrycca na ŭvieś Jeŭrasajuz. Pra hety prajekt telehram-kanał Dzik Pic pahavaryŭ z adnym sa stvaralnikaŭ bota Dzianisam Dybskim.
Što za bot
Bot vykarystoŭvaje naturalnuju movu dla pošuku kvater. Jak tłumačyć Dzianis, jon «pa sutnaści, maje znosiny z našaj bazaj i addaje vyniki karystalniku ŭ vyhladzie karotkaha apisańnia i z akcentam na tyja paramietry, jakija jamu patrebnyja».
Sutnaść technałohii — viektarny / siemantyčny pošuk, ałharytmičnaje filtravańnie i padrabiaznaja pieradapracoŭka danych.
Jak heta pracuje
Karystalnik piša na anhlijskaj movie zapyt nakštałt Show me 3-room apartments in Mokotów with a balcony and pet-friendly («Pakažy mnie 3-pakajovyja kvatery ŭ Mokotavie z bałkonam i mahčymaściu žyć z chatnimi žyviołami»), i bot dasyłaje vosiem adpaviednych varyjantaŭ. Kali treba bolš za vosiem, to treba napisać jašče adzin zapyt.
Na hety momant u bazie 37 tysiač kvater dla arendy ŭ Polščy. U budučyni bot budzie kamunikavać z karystalnikam, udakładniać detali i zadavać dadatkovyja pytańni, bo ŭ kožnaj kvatery bolš za 100 paramietraŭ — ad bałkona da voknaŭ na ŭschod.
Čamu zapyt pavinien być mienavita na anhlijskaj? Tamu što hetaja mova pakul pakazała najlepšy vynik u testach. Dzianis Dybski tłumačyć, što źviestki źbirajucca na polskaj movie z OLX, ale zatym standartyzujucca pad anhlijskuju, bo «byli kiejsy, kali mova źjaŭlałasia pieraškodaj dla finalnaj filtracyi».
«Pry hetym OpenAI dobra razumieje asnoŭnyja jeŭrapiejskija movy, — dadaje jon. — Ale my sutyknulisia z tym, što vyniki atrymlivajucca drennaj jakaści, kali danyja pieršapačatkova na adnoj movie, zachoŭvańnie ŭ bazie — na inšaj, a zapyt — uvohule na treciaj. Adnak u nas u płanach — dazvolić rabić zapyty na polskaj, na ruskaj i na anhlijskaj».
Na čym raspracoŭščyki buduć zarablać
Bot biaspłatny dla kančatkovych karystalnikaŭ i zastaniecca takim u budučyni. Manietyzacyja budzie iści za košt inšych biznes-madelaŭ.
«My chočam zarablać z analityki rynku, roznych partniorskich historyj, mahčyma, praz kamisijnyja historyi, — tłumačyć Dzianis. — Kali padklučym pošuk pa nieruchomaści na prodaž albo pa kamiercyjnaj nieruchomaści i ŭ nas budzie dastatkovy abjom trafiku, to zmožam pieratvaryć heta ŭ hrošy».
Surazmoŭca kaža, što ŭžo prykładna padličyŭ, u kolki jamu budzie abychodzicca infrastruktura bota. Ale ŭ jaho z kaleham vielizarny dośvied u parsinhu danych, i jany viedajuć, jak «zdabyvać dosyć vialiki masiŭ danych umoŭna niadoraha».
«U mianie jość svaja infrastruktura, tamu častkova my jaje tut pieravykarystali», — dadaje Dzianis.
Jakija płany
«Idej šmat, — kaža Dzianis. — Pry hetym da nas užo źjaviłasia cikavaść z boku parački ahienctvaŭ nieruchomaści, jakija šukajuć instrumient dla kiravańnia i pošuku vialikaj kolkaści abjektaŭ. Adsiul i źjaviŭsia zapyt pašyrycca na Jeŭropu. My mierkavali, što prosta zrobim nievialikuju sistemu na Polšču, ale potym apietyty vyraśli. My dakładna budziem rabić bot i na Hiermaniju, i na inšyja krainy».
Padklučeńnie nieruchomaści na prodaž, pa słovach Dzianisa, — pytańnie pary tydniaŭ. Ciapier kamanda choča zrazumieć mienavita niedachopy techničnaj realizacyi.
«Pakul testavali na nievialikaj hrupie ludziej. Zrabili niekalki iteracyj, ale razumiejem, što ŭžo možam zapuścić u publičny test», — kaža jon.
Mielnikava rychtavała svajo źniknieńnie i manipulavała atačeńniem. Pakul niajasna, ci dziejničała jana pa kamandzie ź Minska58
Kamientary