«Paraiłasia ź siabroŭkaj-astrołaham». Biełaruskaja śpiavačka raskazała, jak naradžała ŭ Daminikanie

U Mieksicy Anhielina vykładała vakał. Jana navat udzielničała ŭ miascovaj viersii šou «Hołas». Biełaruska trapiła ŭ kamandu ispanskaha pop-śpievaka i ŭładalnika «Hremi» Davida Bisbala.

Letaś razam z mužam Anhielina znoŭ źmianiła miesca žycharstva — u hety raz para abrała Daminikanskuju Respubliku. Kala čatyroch miesiacaŭ tamu ŭ siamji naradziłasia dziaŭčynka. Pra svoj dośvied ciažarnaści i rodaŭ u Daminikanie Anhielina raspaviała na svaim jutub-kanale.

Śpiavačka daviedałasia pra svaju ciažarnaść u toj momant, kali haściła ŭ Biełarusi, i pieršyja čatyry miesiacy chadziła da biełaruskaj doktarki. A ŭžo paśla palacieła ŭ Daminikanu, płanujučy tam i naradzić.

— Tut niama radzilnych damoŭ, tut jość prosta balnicy, u jakich ty znachodziš svajho doktara i potym ź im naradžaješ. U mianie była meta znajści doktara, jaki blizki mnie pa duchu, kab ja mahła davierycca jamu.

Pavialičyć

Anhielinie na pošuki takoha doktara spatrebiŭsia litaralna tydzień. Jana prosta razmaŭlała z žančynami, jakija niadaŭna naradzili, i prasiła paraić śpiecyjalista. I amal kožnaja ź ich nazyvała imia adnaho i taho ž doktara. Zdajecca, nie biez honaru biełaruska adznačaje, što z hetym ža doktaram naradžała i pieršaja žonka rasijskaha repiera Cimaci.

— Mnie važna było, kab čałaviek mnie pasavaŭ jašče, tak skažam, pa vajbie. Varta adznačyć fakt, što jon mužčyna-hiniekołah, tamu mnie było vielmi važna zrazumieć, nakolki my ź im sychodzimsia, nakolki razumiejem adno adnaho. Litaralna ź pieršaha ž pryjomu ja adčuła, što hetamu čałavieku hatovaja daviarać. Bo ad jaho vieje niejkim ciapłom, utulnaściu, dabrom.

Na siomym miesiacy ciažarnaści ŭ Anhieliny znajšli simfizit. Praź jaho pryznačyli kiesarava. Zvyčajna apieracyju robiać za niekalki tydniaŭ da mierkavanaj daty rodaŭ. U śpiavački heta data prypadała na 15 studzienia, ale raniej rabić kiesarava jana admoviłasia. Paličyła, što naradžać u Novy hod nie vielmi dobraja ideja plus chacieła dačakacca, kali prylaciać baćki jaje i muža. Tamu budučaja maci ryzyknuła i pryznačyła datu apieracyi na toje samaje 15 studzienia.

razychodžańnie łonnaha sučlanieńnia padčas ciažarnaści

— Ja śpisałasia sa svajoj siabroŭkaj-astrołaham, my ž raźličyli natalnuju kartu, jana kaža, treba naradžać niedzie ŭ abied, u 11-12 hadzin.

Z hetaj infarmacyjaj Anhielina znoŭ źviarnułasia da svajho doktara — i jon pahadziŭsia zrabić kiesarava ŭ hety čas.

U dzień iks u artystki pačalisia schvatki. Jana nafarbavałasia i pajechała ŭ balnicu jak na śviata. Supravadžać jaje dazvolili mužu i maci. Biełaruska padkreślivaje: nijakich analizaŭ ci fluarahrafii ad ich nie patrabavali.

Padčas kiesaravaha dla Anhieliny pastavili muzyku, a dastali jaje dačku pad pieśniu, jakuju śpiavačka i jaje muž vielmi lubiać i časta śpiavajuć u mašynie — You Say Łaren Dejhł. Tak vyjšła vypadkova, i maładaja maci pačała płakać ad mocnych emocyj.

U balnicy jaje doŭha trymać nie stali. Kiesarava było ŭ sieradu, a ŭžo ŭ piatnicu śpiavačku vypisali. U vypadku naturalnych rodaŭ dadomu dazvalajuć jechać užo na nastupny dzień.

Umovami pałaty Anhielina vielmi zadavolenaja — usio vielmi sučasnaje, było davoli kamfortna, a praz akno možna było lubavacca palmami.

— Ja vielmi ščaślivaja, što ŭ mianie jość dośvied naradžeńnia dački ŭ takim pryhožym miescy, u takoj pryhožaj krainie.

Košt rodaŭ u Daminikanie zaležyć ad taho, ci majecie vy miascovuju strachoŭku. U Anhieliny strachoŭka była nie miascovaja, tamu jana asablivaj roli nie hrała.

— Kali ty pryjazdžaješ u balnicu, ty adrazu płaciš maksimalnuju sumu, jakaja tolki moža być (jany raśpisvajuć usio, što tearetyčna moža spatrebicca).

Pavialičyć

Anhielina pieraviała canu ŭ dalary i biełaruskija rubli: atrymałasia prykładna 9100 dalaraŭ, ci kala 30 tysiač biełaruskich rubloŭ. Ale pakolki ŭsio prajšło dobra, bieź niečakanych siurpryzaŭ i dadatkovych manipulacyj, u vyniku artystka zapłaciła za rody značna mienš. Jany kaštavali siamji 5695 dalaraŭ ci 18 730 biełaruskich rubloŭ.

Pavialičyć

Anhielina dała dačce imia, jakoje sama prydumała — Aliel. Adkul jano źjaviłasia, maładaja mama tłumačyła ŭ instahramie:

— Mnie zaŭsiody padabałasia imia Aryel, ale ja chacieła niešta asablivaje — dalikatnaje, lohkaje, bieź litary «r», ale z takim ža čaroŭnym hučańniem. Ja zamianiła litaru «r» na «ł». Tak i naradziłasia imia Aliel. U im złučany śviatło i čyścinia: «Ali» — lohkaść, «El» na iŭrycie — «Boh».

Nahadajem, što Anhielina Pipier jašče ŭ dziacinstvie zapisała pieśniu, jakaja dahetul zastajecca adnoj z samych papularnych u jutubie na biełaruskaj movie — «Dziaŭčynka biełarusačka». U jaje 2,9 miljona prahladaŭ.

• 3
• 3
• 1
• 7
• 1
• 0
• 0
• 0