Pieramovy pa ŭkrainskim pytańni z amierykancami viadzie «samy niebiaśpiečny čałaviek Rasii»
Navat na piku chałodnaj vajny špijony nie padmianiali saboj dypłamataŭ. Pucin źmianiŭ usio. Chto taki hienierał-pałkoŭnik Siarhiej Biasieda, jaki staŭ hałoŭnym sakretnym pieramoŭnikam Kramla?
Historyju hienierał-pałkoŭnika Siarhieja Biasiedy, jaki jašče letaś ananimna sustrakaŭsia z amierykancami ŭ hatelach, zabraniravanych pad falšyvymi imionami, kab damovicca ab abmienie źniavolenymi, a ciapier pieratvaryŭsia ŭ publičnaha pierahavorščyka Kramla pa ŭkrainskim pytańni, raskazvajuć žurnalisty The Wall Street Journal.
Kab stvaryć jaho partret, jany pahavaryli ź ciapierašnimi i byłymi dypłamatami i supracoŭnikami raźviedki z Rasii, ZŠA, Jeŭropy i Blizkaha Uschodu, jakija pracavali z hienierałam na praciahu troch dziesiacihodździaŭ.
Analityki adznačajuć: toje, što zamiest MZS pieramovy viaduć śpiecsłužby — unikalny vypadak. Navat na piku chałodnaj vajny špijony nie padmianiali saboj dypłamataŭ. Pucin źmianiŭ usio.
Pavodle słoŭ raźviedčykaŭ i dypłamataŭ, jakija siadzieli ź im za stałom pieramovaŭ, sam fakt udziełu Siarhieja Biasiedy — čałavieka, što dapamahaŭ płanavać uvarvańnie va Ukrainu, — źjaŭlajecca vyraznym sihnałam dla Kijeva: Pucin nie admoviŭsia ad svajoj mety — damahčysia palityčnaha kantrolu nad Ukrainaj. I hetaja meta nieprymalnaja ni dla Kijeva, ni dla bolšaści jeŭrapiejskich stalic.
Kijeŭ vinavacić Biasiedu ŭ tym, što jon uznačalvaŭ kampaniju pa padryvie namahańniaŭ Ukrainy vyzvalicca z-pad upłyvu Kramla. Pavodle ŭkrainskich źviestak, pierad pačatkam poŭnamaštabnaj vajny ŭpraŭleńnie FSB pad kiraŭnictvam Biasiedy źbirała sacyjałahičnuju infarmacyju z Ukrainy, kab padmacavać u Kramli rašeńnie pra ŭvarvańnie.
Jašče raniej, padčas padziej 2014 hoda, jak śćviardžajuć byłyja ŭkrainskija čynoŭniki, Biasieda byŭ zadziejničany ŭ apieracyi, jakaja skončyłasia rasstrełam dziasiatkaŭ mirnych, prajeŭrapiejskich pratestoŭcaŭ. Kreml ža śćviardžaŭ, što jon znachodziŭsia ŭ Kijevie tolki dziela achovy rasijskaha pasolstva.
Kali kiraŭnika ŭkrainskaj vajskovaj raźviedki hienierał-lejtenanta Kiryłu Budanava ŭ 2023 hodzie spytali, kaho z rasijcaŭ jon ličyć najbolš niebiaśpiečnym, toj spačatku admoviŭsia adkazać, a potym nazvaŭ Biasiedu: «Jon zrabiŭ dla Ukrainy šmat zła».
Chto jon — «Baron» z FSB
Biasieda pačynaŭ u KDB jašče ŭ 1970-ja, prykładna tady ž, što i Pucin. U 1980-ch małady aficer Biasieda pracavaŭ u «amierykanskim adździele» KDB, jaki sačyŭ za ahientami ZŠA ŭ Maskvie. Praz hetuju pracu Biasieda faktyčna ŭdzielničaŭ u stvareńni sakretnaha kanała suviazi pamiž KDB i CRU. Heta byŭ niefarmalny, nieaficyjny kanał, praź jaki, niahledziačy na napružańnie chałodnaj vajny, možna było ŭrehulavać niejkija krytyčnyja pytańni ci pieradavać infarmacyju pa-za publičnaj dypłamatyjaj.
Adzin z amierykanskich čynoŭnikaŭ, jaki sustrakaŭsia ź Biasiedaj u štab-kvatery KDB na Łubiancy, nazvaŭ jaho «kurataram varvaraŭ» — čałaviekam, da jakoha ZŠA mahli źviarnucca, kab jon strymaŭ samych ahresiŭnych i niekantralujemych aficeraŭ FSB.
Pavodle źviestak rasijskaha rasśledvalnaha sajta Agentura.ru, u rozny čas Biasieda pracavaŭ u sakretnym padraździaleńni Departamienta kantrraźviedvalnych apieracyj, jakoje, jak raskryła The Wall Street Journal, stajała za aryštami žurnalista vydańnia Hierškoviča i inšych amierykancaŭ.
Paśla taho, jak Uładzimir Pucin staŭ prezidentam, Biasieda pierajšoŭ na pracu ŭ departamient, jaki kuryruje Administracyju prezidenta. Ź minułaha hoda hienierał źjaŭlajecca daradcam dyrektara FSB Alaksandra Bortnikava.
Raniej jon uznačalvaŭ Piataje ŭpraŭleńnie FSB — mienavita jano adkazvaje za suviazi śpiecsłužby z zamiežnymi partniorami, u tym liku z amierykanskimi viedamstvami. U skład hetaha ŭpraŭleńnia ŭvachodzić Departamient apieratyŭnaj infarmacyi — padraździeł źniešniaj raźviedki FSB, jaki, pavodle źviestak ZŠA i byłych rasijskich siłavikoŭ, adyhraŭ klučavuju rolu ŭ płanavańni ŭvarvańnia Rasii va Ukrainu.
Biasieda ŭvachodzić u vuzkaje koła čynoŭnikaŭ, jakija majuć pramy vychad na Pucina, jaki źjaŭlajecca adzinym centram pryniaćcia rašeńniaŭ.
Jon dobra razmaŭlaje na ispanskaj movie, jakoj navučyŭsia padčas słužby na Kubie. Svaju mianušku «Baron» hienierał atrymaŭ dziakujučy lubvi da indyvidualnaha pašyvu kaściumaŭ i zvyčcy kuryć cyhary — taksama vynik jaho słužby na Kubie.
Klučavaja fihura samych sakretnych misij
Na Zachadzie pra jaho mała što viadoma, ale žurnalisty WSJ vyśvietlili, što Biasieda adyhraŭ važnuju rolu ŭ niekatorych samych sakretnych misijach Rasii.
Tak, kali ŭ 2022 hodzie ŭ Słavienii byli aryštavany rasijskija špijony Dulcavy, jakija vydavali siabie za zvyčajnych arhiencincaŭ, jon asabista palacieŭ u krainu, kab damahčysia lepšaha abychodžańnia ź imi. Hienierał uhavaryŭ miascovyja śpiecsłužby raźmiaścić dziaciej na prastornaj vile i dać mahčymaść štodzionnych videazvankoŭ maci.
Jaho rola va ŭzajemadziejańni z amierykancami asabliva vyrasła paśla taho, jak tradycyjnyja dypłamatyčnyja kanały abrynulisia z pačatkam vajny va Ukrainie. Siarhiej Biasieda staŭ adnym ź niešmatlikich rasijskich čynoŭnikaŭ, jakim było dazvolena naŭprost kantaktavać z amierykancami.
Jaho sustrečy z pradstaŭnikami CRU prachodzili tajemna — u kanfierenc-załach hatelaŭ pa ŭsioj Jeŭropie i Blizkim Uschodzie, biez telefonaŭ. U vyniku hetych pieramovaŭ u 2022 hodzie adbylisia hučnyja abmieny źniavolenymi: rasijski handlar zbrojaj Viktar But i narkakurjer Kanstancin Jarašenka byli viarnutyja ŭ Rasiju, a ZŠA atrymali baskietbalistku Brytni Hrajnier i byłoha marpiecha Trevara Ryda.
U 2024 hodzie Biasieda arhanizavaŭ najbujniejšy abmien, u vyniku jakoha byli vyzvaleny 24 čałavieka, uklučajučy žurnalista WSJ Evana Hierškoviča.
U adroźnieńnie ad jaho, kiraŭnik MZS Rasii Siarhiej Łaŭroŭ i jaho namieśnik Siarhiej Rabkoŭ byli faktyčna adsunutyja ad udziełu ŭ pieramovach ab abmienie źniavolenymi.
Paśla taho, jak rasijski blickryh va Ukrainie pravaliŭsia, źjavilisia źviestki, što Pucin nibyta pakaraŭ Biasiedu i adpraviŭ u znakamituju turmu Lefortava. Ale praź niekalki tydniaŭ jon znoŭ źjaviŭsia na pieramovach, pažartavaŭšy cytataj z Marka Tvena: «Čutki pra maju śmierć mocna pierabolšanyja».
Rasijski MZS i FSB nie kamientujuć rolu Biasiedy. Aficyjna jon nie fihuruje ŭ śpisie kiraŭnikoŭ śpiecsłužby, i jahonyja fatahrafii — redkaść. Ale mienavita hety hienierał ciapier — centralnaja fihura ŭ kantaktach pamiž Kramlom i Zachadam.
I, jak adznačaje The Wall Street Journal, jaho viartańnie śviedčyć pra toje, što Pucin pa-raniejšamu stavić na ludziej śpiecsłužbaŭ — navat u pytańniach, ad jakich zaležyć vajna i mir.
Jak na zamovu FSB płanavali vykraści Chrysta Hrozieva — detali špijonskaj apieracyi, jakaja ciahnułasia dva hady
Vykrytyja ŭ Brytanii špijony źbiralisia vyvieźci ŭ Rasiju žurnalista Chrysta Hrozieva, jaki dapamahaŭ Navalnamu
U Italii aryštavali rasijskich špijonaŭ. Adnoj z zadač było stvareńnie karty miescaŭ, nie achoplenych videanazirańniem
Kamientary