U Kupałaŭskim užo piać hadoŭ nie mohuć znajści akcioraŭ. Što prydumali hetym razam
Za piać hadoŭ, jakija prajšli paśla zvalnieńnia z Kupałaŭskaha teatra bolšaj častki trupy, ułady tak i nie prydumali, jak paŭnavartasna ich zamianić. Zaprošanyja akciory z Rasii pačynali svaju pracu, nie viedajučy biełaruskaj movy. Ale ŭ 2025 hodzie źjaviłasia novaja ideja — zaprašać na asobnyja śpiektakli akcioraŭ ź inšych biełaruskich teatraŭ. Pra heta redakcyi «Lusterka» paviedamili krynicy.
Hetaja infarmacyja paćvierdziłasia: žurnalisty praanalizavali sajt teatra i znajšli zhadku pra čatyroch takich akcioraŭ.
U kancy maja 2025 hoda adbudziecca premjera śpiektakla «Brama nieŭmiručaści» pavodle Kandrata Krapivy. Siarod zajaŭlenych akcioraŭ — Uładzimir Miščančuk i Ała Prolič. Apošniaja zadziejničana i ŭ śpiektakli «Dziadziečkaŭ son». Abodva daŭno ihrajuć u trupie Teatra-studyi kinaakciora.
Treci zaprošany akcior — Andrej Hładki, jaki z 2010 hoda pracuje ŭ Maładziožnym teatry. Jon udzielničaje ŭ dvuch śpiektaklach Kupałaŭskaha: «A zory tut cichija» i «Haračaje serca».
Čaćviorty akcior — Juryj Šałankoŭ, jaki z 2017 hoda taksama pracuje ŭ Maładziožnym teatry. Na sajcie Kupałaŭskaha jość jahonaja staronka, adnak nijakich rolaŭ niama. Mahčyma, jon ihraŭ u minułym u jakich-niebudź śpiektaklach, ci jaho ŭdzieł płanujecca ŭ budučyni.
Letam 2020 hoda bolšaja častka trupy zvolniłasia z Kupałaŭskaha ŭ znak pratestu suprać falsifikacyi vybaraŭ i hvałtu siłavikoŭ. Pracu administracyja zmahła adnavić tolki ŭ sakaviku 2021 hoda.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1515
Kamientary