Sotni rubloŭ, kab efiektna daviedacca poł budučaha dziciaci: biełarusy robiać usio bolš maštabnyja hiendar-paci
Ludzi ŭ Biełarusi hatovyja zamović samalot ci damovicca z chakiejnym kłubam «Dynama-Minsk», kab efiektna paviedamić blizkim ludziam, kaho jany čakajuć — chłopčyka ci dziaŭčynku. Starajucca ŭsie: ad dalnabojščykaŭ da žonak futbalistaŭ.
Skrynšot videa ŭ tyktoku
Pažarnaja mašyna
Aficyjna ŭ biełaruskaha MNS niama takoj pasłuhi, jak arhanizacyja hiendar-paci. Ale ž kali budučy tata ci mama pracujuć u hetaj struktury, dyk niama ničoha niemahčymaha.
U tyktoku dastatkova rolikaŭ, jak u Minsku dy inšych haradach dla vyśviatleńnia poła dziciaci vykarystoŭvajuć pažarnuju mašynu. Ratavalnik uklučaje brandspojt i pa koleru pieny (papiarednie ŭ pienaŭtvaralnik dadajuć farbavalnik) usio stanovicca zrazumieła.
Treba adznačyć, što nie ŭsim kamientataram u tyktoku taki kreatyŭ daspadoby. Naprykład, siamja ratavalnika z Žodzina sioleta nabrała 260 tysiač prahladaŭ i bolš za 17 tysiač łajkaŭ. Ale ž znajšlisia tyja, chto aburyŭsia tym, što słužbovy aŭtamabil vykarystoŭvajuć dla zabavy supracoŭnika.
«Minsk-Arena»
U minułym śniežni ŭpieršyniu hiendar-paci adbyłosia padčas matča chakiejnaha minskaha «Dynama». Tady na lod «Minsk-Areny» vyjšaŭ chakiejny trenier Maksim Antonienka (jaho tata — chakieist Aleh Antonienka, udzielnik troch Alimpijad) z žonkaj Karynaj. Budučy baćka ŭdaryŭ pa šajbie, i ŭsie pabačyli błakitny dym. Tysiačy hledačoŭ na trybunach burna radavalisia za paru. Rolik nabraŭ u instahramie 935 tysiač prahladaŭ i 70 tysiač łajkaŭ.
Darečy, siamja Antonienkaŭ užo stała baćkami: chłopčyk u ich naradziŭsia na Vialikdzień.
Samalot u niebie
Užo nie pieršy hod hiendar-paci ładziać na aeradromie «Lipki», što la Minska. Atrymlivajecca jak u kino: samalot vypuskaje ružovy ci błakitny dym, kali lacić nad budučymi baćkami, a hości ŭ zachapleńni robiać šmat fota i videa padziei dla sacsietak.
Možna padumać, što takaja luksavaja viečaryna budzie kaštavać prykładna vahon hrošaj, ale nie: 30 chvilin znachodžańnia samalota ŭ pavietry kaštujuć 620 rubloŭ, a hadzina — 820 rubloŭ.
Letaś kampanija, jakaja ładzić hiendar-paci ŭ niebie, paviedamiła, što moža rabić takija śviaty pobač ź lubym vialikim horadam Biełarusi, kab baćkam i ich haściam nie pryjšłosia jechać u stalicu. Košt zaležyć ad taho, kolki kiłamietraŭ treba pralacieć samalotu dla miesca iks. Darečy, tak užo śviatkavali, naprykład, u Lidzie.
BMW i fajery
Niadaŭna ŭ tyktoku zavirusiłasia videa, u jakim siamja biełaruskaha dalnabojščyka ładziła hiendar-paci. Furu dla hetych met vykarystoŭvać nie stali — abyšlisia dvuma adnolkavymi BMW.
U adnym aŭtamabili palili fajery siniaha koleru, u druhim — ružovaha. Kali da budučych baćkoŭ pajechała mašyna, adkul valiŭ sini dym, jany pačali radasna skakać i abdymacca.
Videa nabrała 4,2 miljona prahladaŭ u tyktoku i kala 375 tysiač łajkaŭ. Kamientatary byli ŭ zachapleńni. Najbolš papularny kamientaryj taki: «Takaja prykolnaja ideja, ale pry hetym nie darahaja, nie pakazušnaja, a takaja ščyraja». U adkaz niechta pažartavaŭ: «Tak, sapraŭdy nie darahaja, nabyć dva BMW».
27-pavierchovy biznes-centr
U minułym listapadzie siamja ź Minska, kab daviedacca pra poł dziciaci, vyrašyła skarystacca biznes-centram «Futurys», jaki znachodzicca kala stancyi mietro «Barysaŭski trakt». Spačatku na budynku źjavilisia siłuety budučych baćkoŭ, potym pačaŭsia 10-siekundny adlik, zatym nadpis «U vas…». Narešcie 27-paviarchovik staŭ całkam ružovym i raskryŭ intryhu: «Dziaŭčynka».
Tady pasłuha kaštavała prykładna 1100 rubloŭ. Rolik nabraŭ u tyktoku bolš za miljon prahladaŭ i kala 77 tysiač łajkaŭ. Darečy, niadaŭna dziaŭčyncy, pra čakańnie jakoj daviedalisia mnohija minčuki, spoŭniŭsia miesiac.
Treba adznačyć, što biznes-centr «Futurys» užo karystajecca papularnaściu ŭ budučych baćkoŭ stalicy: čas ad času ŭ sacyjalnych sietkach źjaŭlajucca anałahičnyja roliki z hiendar-paci.
Hołas «budučaha dzicia»
Davoli papularny ciapier u Biełarusi varyjant hiendar-paci: kali byccam by prosta z matčynaha žyvata kaža budučaje dzicia. Tak, naprykład, pra svajho syna daviedalisia bijatłanisty Anton i Dzinara Smolskija.
Kaštuje zapis kreatyŭnaha aŭdyja ŭ biełaruskich firmach ad 50 da 150 rubloŭ. Prapanujuć takuju pasłuhu i rasijskija kampanii (abiacajuć, što zapisvać ahučku budzie sapraŭdy maleńkaje dzicia — možna navat abrać uzrost, čym maładziejšaje dzicia, tym daražejšaja pasłuha). Rasijanie prosiać pryblizna ad 110 da 150 rubloŭ.
Niadaŭna takuju fišku vykarystoŭvała žonka byłoha futbalista Viačasłava Hleba Volha. Para vyrašyła sumiaścić śviatkavańnie dnia naradžeńnia budučaha taty i hiendar-paci. Adbyvałasia ŭsio ŭ staličnym restaranie «Anioły».
Dla haściej intryha zaciahnułasia. Spačatku para adčyniła vializarnuju skryniu — i ničoha nie daviedałasia, bo šary vylecieli jak błakitnyja, tak i ružovyja. Potym «dziciačy hołas z Volhi» źviartaŭsia da baćkoŭ i taksama ničoha nie skazaŭ pa sutnaści pytańnia.
Narešcie para ŭsio ž łopnuła vialiki šar, i stała zrazumieła, što siamja čakaje naradžeńnia syna. Alaksandr Hleb byŭ tak rady za brata, što kinuŭsia abdymać jaho, ledź nie adcisnuŭšy budučuju mamu, adnak u apošni momant usio ž spyniŭsia.
Sama Volha z hiendar-paci zrabiła sapraŭdnuju pijar-kampaniju. Jana arhanizavała rozyhryš pryzoŭ ad sponsaraŭ. Błohierka abiacała pakazać finalny rolik z hiendar-paci tolki paśla taho, jak źbiarecca 5000 udzielnikaŭ konkursu. Ahułam jaje videa z tematyčnaj viečaryny nabrali ŭ instahramie bolš za miljon prahladaŭ.
Kamientary