«Patryjotka Biełarusi» znajšła pryčynu taho, što ŭ krainie šmat ciažkachvorych dziaciej. Heta hiendar-paci
Palina Bazylova, kiraŭnica ansambla «Čaraŭnicy» i aktyvistka hramadskaha abjadnańnia «Patryjoty Biełarusi» zapościła abviestku pra zbor srodkaŭ dla dziaŭčynki z SMA. A potym vyrašyła parazvažać u storys, čamu zaraz u krainie stolki dzietak, jakim patrebna dapamoha.
Pryčyna vyjaviłasia niečakanaj: žančyna ŭpeŭniena, što vinoj usiamu hiendar-viečarynki, padčas jakich budučyja baćki źbirajuć šmat haściej i niejkim efiektnym sposabam daviedvajucca poł dziciaci (naprykład, łopajuć vialiki šar ci razrazajuć tort). Apošnija hady hiendar-paci stanoviacca ŭsio bolš papularnymi pa ŭsim śviecie, u tym liku i ŭ Biełarusi.
Ale ž «patryjotcy Biełarusi» heta vielmi nie padabajecca:
«Ja suprać hetych hiendarnych viečarynak. Ja za toje, kab ciažarnaja žančyna da apošniaha momantu nie afišavała svajo tajemnaje stanovišča. Niezdarma našy prodki heta zaŭsiody rabili − chavali šyrokimi spadnicami, šyrokimi sukienkami. Heta ŭsio nievypadkova. Tamu što, bačycie, zaraz stolki dzietak, jakija majuć patrebu ŭ zbory srodkaŭ».
Palina dadała, što kožny dzień jeździć u reabilitacyjny centr, dzie bačyć dzietak, jakim treba vielmi składanaje lačeńnie.
− Učora bačyła vielmi maładuju, jarkuju, pryhožuju paru — mužčyna i žančyna. U vačach pustata, biezdań, kryk ab dapamozie. A pobač śpiecyjalist vodzić ich dziciatka ŭ ekzaškilecie. Nie viedaju, ź jakoj pryčyny heta adbyvajecca. Ale, mahčyma, my sapraŭdy sami va ŭsim heta vinavatyja i nam treba niejak achoŭvać našych dziaciej jašče kali jany ŭnutry nas, dumki čyścić.
Nahadajem, što niadaŭna biełarusy sabrali amal $2 miljony dla maleńkaj Ryty Juškievič ź Lidy — mienavita stolki kaštuje adzin ukoł Zolgensma, jaki moža dapamahčy dzieciam z SMA.
Zaraz idzie zbor srodkaŭ na takija samyja leki dla trochhadovaj Vieraniki Chyłkoŭskaj (dziaŭčynka taksama maje dyjahnaz śpinalna-myšačnaja atrafija) — pakul ź nieabchodnych 1 miljona 819 tysiač dołaraŭ sabrana kala 440 tysiač. Pry hetym na zbor hrošaj zastałosia niašmat času, bo nieabchodna paśpieć zrabić ukoł da taho momantu, kali dzicia budzie važyć 13,5 kiłahramaŭ.
Mienavita na hety zbor apublikavała spasyłku Palina Bazylova pierad tym, jak vyrašyła parazvažać pra ŭpłyŭ hiendar-paci na zdaroŭje dziaciej.
Ciapier čytajuć
Na Šry-Łancy ŭ 37 hadoŭ pamior biełaruski kinapradziusar Andrej Matałyha1
Kamientary