MUS pakazała videa z zatrymanymi za kamientary ŭ adras «žycharoŭ cudoŭnaj krainy Pakistan». Pahražaje kryminałka
Ministerstva ŭnutranych spraŭ apublikavała aficyjnuju zajavu nakont čutak ab nibyta złačynstvach pakistancaŭ u Biełarusi. A jašče apublikavała videa z zatrymanymi chłopcam i dziaŭčynaj.
Alaksandr Łukašenka paśla sustrečy z premjeram Pakistana zajaviŭ, što moža zaprasić u Biełaruś 150 tysiač rabotnikaŭ z hetaj krainy. Tema, naturalna, raźlaciełasia pa internecie.
Na dniach u sacsietkach pačali raspaŭsiudžvacca čutki ab tym, što pakistancy niby ŭžo prybyvajuć u Biełaruś i ździajśniajuć tut złačynstvy, u tym liku zhvałtavańni. Tyktokiery pačali zapisvać videa ab tym, jak siabie abaranić.
Masła ŭ ahoń padliło videa bojki studentaŭ uschodniaj źniešnaści ŭ Homieli. Pieršapačatkova pisali, što pabilisia pakistancy, ale pa infarmacyi siłavikoŭ bojku z-za dziaŭčyny zładzili studenty z Maroka.
Napiaredadni MUS vypuściła niekalki abviaržeńniaŭ na kamientary i čutki ŭ internecie i pahražała kamientataram pakarańniem. Siońnia viedamstva apublikavała jašče adnu aficyjnuju zajavu.
«Na roznych internet-resursach praciahvaje raspaŭsiudžvacca fejkavaja i pravakacyjnaja infarmacyja na temu ŭjezdu ŭ Biełaruś 150 tysiač hramadzian Pakistana. Ukidy taksama źmiaščajuć śćviardžeńni, što pakistancami ŭžo ździejśnieny šerah złačynstvaŭ.
U hetaj suviazi MUS aficyjna zajaŭlaje: mihracyjnyja patoki z Pakistana adsutničajuć, roŭna jak i złačynstvy, ździejśnienyja vychadcami z hetaj dziaržavy», — havorycca ŭ zajavie.
U MUS adznačyli, što ŭžo vyjavili «aktyŭnych pravakataraŭ, jakija naŭmysna sprabavali napružvać stanovišča ŭ krainie i manipulavać hramadskaj dumkaj». Siłaviki pahražajuć kryminalnymi artykułami za «razvarušvańnie mižnacyjanalnaj varožaści i destabilizacyju situacyi ŭ krainie».
Napiaredadni blizki da siłavikoŭ kanał upieršyniu za doŭhi čas apublikavaŭ videa z zatrymanymi za kamientary i roliki ŭ tytoku maładymi ludźmi. Na kamieru 18-hadovaha chłopca i 20-hadovuju dziaŭčynu prymusili prasić prabačeńnia za raspaŭsiudžvańnie fejkaŭ i «hnieŭnyja kamientary na adras žycharoŭ cudoŭnaj krainy Pakistana».
U jakim statusie znachodziacca maładyja ludzi, nieviadoma. Ale siłaviki pahražajuć «niešmatlikimi terminami za «žarty» na temu pakistancaŭ.
Ciapier čytajuć
Chto staić za pravakatyŭnaj supołkaj DoŁHB? Zdajecca, niepałochanyja školniki3
Kamientary
Do etoho, hnobili tolko dla toho, čtoby chorošo było łukašienko i russkim!