Spartsmieny nosiać płastyr na nosie, kab lepš dychać. Ci sapraŭdy heta dapamahaje?

Płastyry-pałoski dla nosa pieražyvajuć novuju chvalu papularnaści. Ich rekłamujuć jak prosty sposab palehčyć nasavoje dychańnie, a časam im prypisvajuć i zdolnaść pavyšać spartyŭnyja vyniki. Ale śpiecyjalisty, ź jakimi pahavaryli žurnalisty Tagesspiegel, kažuć, što raźličvać na dadatkovy kisłarod dziakujučy takoj pałoscy nie varta.

Pry zvyčajnym dychańni ŭ stanie spakoju nasyčeńnie kryvi kisłarodam u zdarovaha čałavieka i tak składaje kala 95-100%. Tamu istotna pavialičyć kolkaść kisłarodu, jaki atrymlivaje arhanizm, pry dapamozie płastyru faktyčna niama jak.

Peŭny efiekt, adnak, jość. Pałoska pamianšaje supraciŭ pry ŭdychu praz nos, tamu čałavieku sapraŭdy moža zdavacca, što dychać stała lahčej. Dla biehuna heta moža mieć i nievialiki psichałahičny efiekt, asabliva na pačatku dystancyi. Ale pry surjoznaj fizičnaj nahruzcy situacyja mianiajecca.

Jak tłumačać śpiecyjalisty, u zvyčajnych umovach čałaviek prapuskaje praź lohkija prykładna 35 litraŭ pavietra za chvilinu. Padčas intensiŭnaha biehu abo spabornictvaŭ hety pakazčyk moža vyraści da 150 litraŭ. Pry takoj nahruzcy čałaviek usio bolš pačynaje dychać rotam — niezaležna ad taho, naklejenaja ŭ jaho na nosie pałoska ci nie.

Navukovyja daśledavańni taksama nie pakazvajuć prykmietnaha ŭpłyvu takich płastyraŭ na spartyŭnyja vyniki. U mietaanalizie 19 daśledavańniaŭ, apublikavanym u 2020 hodzie, aŭtary nie vyjavili ŭpłyvu pałosak ni na maksimalnaje spažyvańnie kisłarodu, ni na častatu sardečnych skaračeńniaŭ. Istotna nie źmianiałasia i subjektyŭnaje adčuvańnie nahruzki.

Jak pracuje płastyr

Pryncyp dziejańnia nasavych pałosak davoli prosty. U ich ubudavanyja pruhkija elemienty, jakija imknucca viarnucca ŭ pieršapačatkovuju formu i tamu krychu raściahvajuć kryły nosa ŭ baki.

Takim čynam pašyrajecca tak zvany nasavy kłapan — samaje vuzkaje miesca ŭ nosie. Mienavita na jaho moža prypadać ad pałovy da dźviuch tracin usiaho supracivu pavietra pry nasavym dychańni.

Tamu ŁOR-śpiecyjalisty ličać, što sama ideja ŭździejańnia na hety ŭčastak u pryncypie słušnaja. Ale hetym mahčymaści płastyru i abmiažoŭvajucca.

Kali čałavieku ciažka dychać nosam praz aciok nasavych rakavin, skryŭlenaj nasavoj pieraharodki, palipaŭ abo chraničnaha zapaleńnia pazuch, pałoska nie likviduje pryčyny prablemy.

Pravieryć, ci moža jana chacia b krychu dapamahčy, možna prostym sposabam: palcami źlohku paciahnuć ščoki ŭ baki. Kali paśla hetaha dychać nosam stanovicca prykmietna lahčej, miechaničnaje pašyreńnie nasavoha kłapana sapraŭdy moža dać peŭny efiekt.

Ale pry častych prablemach z dychańniem śpiecyjalisty rajać nie spadziavacca na płastyry, a źviarnucca da doktara i vyśvietlić pryčynu.

Pavialičyć

Ci jość pabočnyja efiekty

Pavodle ekśpiertaŭ, klej, jakim pałoska trymajecca na nosie, u niekatorych ludziej moža vyklikać kantaktnuju ekzemu. Pry zdymańni płastyru taksama možna paškodzić pavierchnievy słoj skury.

Adnak bolš istotnaj prablemaj miedyki ličać padmanlivaje adčuvańnie, što prablema ŭžo vyrašanaja. Kali čałavieku paśla naklejvańnia pałoski stanovicca krychu lahčej dychać, jon moža vyrašyć, što lačeńnie jamu bolš nie patrebnaje.

Jość, praŭda, hrupa ludziej, jakim takija pałoski sapraŭdy mohuć spatrebicca nie dziela sportu. Heta ciažarnyja žančyny, u jakich uźnikajuć ciažkaści z nasavym dychańniem. Dla ich miechaničnaja pałoska ŭ niekatorych vypadkach moža być najlepšym pieršym varyjantam, čym nazalny sprej.

A papularnaść płastyraŭ siarod biehunoŭ śpiecyjalisty šmat u čym tłumačać psichałohijaj i rytuałam. Dla kahości takaja pałoska stanovicca častkaj spartyŭnaha vobrazu i daje adčuvańnie, što jon lepš padrychtavany da startu.

I, mahčyma, mienavita ŭ hetym jaje hałoŭny efiekt.

• 4
• 0
• 0
• 1
• 2
• 0
• 0
• 0