«Vylecieła z Łondana ŭ treciuju krainu». Što viadoma pra źniknieńnie Mielnikavaj praź miesiac pošukaŭ

Zajavu ab źniknieńni śpikierki Kaardynacyjnaj rady Anžaliki Mielnikavaj u polskuju palicyju padaŭ staršynia Narodnaha antykryzisnaha ŭpraŭleńnia Pavieł Łatuška. Heta adbyłosia 25 sakavika. Pavodle infarmacyi Svabody, na suviaź Mielnikava pierastała vychodzić jašče 21 sakavika. Publičnaja infarmacyja pra jaje źniknieńnie źjaviłasia praz try dni paśla padačy zajavy. Z taho času stała viadoma, što były muž Anžaliki razam ź ich supolnymi dziećmi znachodzicca ŭ Biełarusi, z fondu, jakim kiravała Mielnikava, mahli być źniatyja pryznačanyja Kaardynacyjnaj radzie i «Kibierpartyzanam» hrošy, a sama Anžalika vyjechała z Polščy jašče naprykancy lutaha.

24 krasavika ofis Paŭła Łatuški raspaŭsiudziŭ novyja źviestki, atrymanyja ad polskich pravaachoŭnikaŭ. Pavodle paviedamleńnia, Lublinski adździeł departamienta baraćby z arhanizavanaj złačynnaściu i karupcyjaj Nacyjanalnaj prakuratury Polščy raspačaŭ śledstva ŭ spravie pazbaŭleńnia voli ŭ dačynieńni da Anžaliki Mielnikavaj. Bolš padrabiaznaj infarmacyi polskija ŭłady pakul nie dajuć.

10 tysiač jeŭra za infarmacyju

Kiraŭnik inicyjatyvy ByHelp Alaksiej Lavončyk — adzin z tych, chto aktyŭna šukaje Anžaliku Mielnikavu. Jon abviaściŭ zbor srodkaŭ na hrašovuju ŭznaharodu dla taho, chto zmoža dać dakładnuju infarmacyju pra los Mielnikavaj paśla 25 sakavika, i źviarnuŭsia z zajavaj ab jaje źniknieńni ŭ brytanskija pravaachoŭnyja orhany.

«My pa-raniejšamu viedajem tolki, što jana prylacieła ŭ Łondan i vylecieła z Łondanu, — kaža Lavončyk u razmovie sa Svabodaj. — U adnu z «trecich krain». Tuju, kudy biełarusy zvyčajna nakiroŭvajucca, kali laciać ź inšych krain. Pakul mahu tolki tak skazać — vy sami možacie zdahadacca. Bolš pakul skazać nie mahu, praciahvajucca sproby vyznačyć, kudy Anžalika mahła palacieć dalej».

Pavodle jaho słovaŭ, asnoŭnaj krynicaj infarmacyi ciapier źjaŭlajucca źviestki, zdabytyja žurnalistami i aktyvistami. Jon miarkuje, što hetyja źviestki śviedčać pra prymusovy charaktar źniknieńnia śpikierki KR.

«Heta abo vykradańnie, abo prymus, — kaža Lavončyk. — Ja maju svaju teoryju, jak heta mahło adbycca, ale jana pakul śpiekulatyŭnaja. Spadziajusia, što kali ŭ paniadziełak my zapuścim uznaharodu za infarmacyju pra los Mielnikavaj, źjavicca čałaviek, jaki niešta skaža. Albo ludzi, hatovyja zahavaryć. Pakul da nas nichto kankretna nie źviartaŭsia. Byli vypadkovyja prapanovy, chtości pisaŭ u Telegram. Źviartali ŭvahu na peŭnych asobaŭ, ale kali ja prasiŭ kankretyki — jany źnikali. Pakul, na žal, tolki tupiki».

Lavončyk taksama adznačaje, što infarmacyi ad brytanskich pravaachoŭnikaŭ pra znachodžańnie abo pieramiaščeńni Mielnikavaj niama. Jon spadziajecca, što da 28 krasavika ŭdasca sabrać abiacanyja 10 tysiač jeŭra, i tady možna budzie publična prapanavać uznaharodu.

«Na žal, nas pakul nie apytvali»

Pošuki praciahvajucca i ŭ Narodnym antykryzisnym upraŭleńni, adkul Anžalika pryjšła ŭ KR. Pavieł Łatuška piša zvaroty ŭ polskija orhany, apošni adkaz pryjšoŭ 24 krasavika.

«My viedajem, što spravu pieradali pad nahlad Nacyjanalnaj prakuratury Polščy, joj zajmajecca departamient baraćby z arhanizavanaj złačynnaściu ŭ Lublinie, — raskazvaje Łatuška. — Ja źviartaŭsia da hienprakurora Polščy Adama Bodnara sa śpiecyjalnym listom, dzie prasiŭ, kab prakuratura ŭziała spravu pad nahlad. Mahčyma, hety list adyhraŭ rolu».

Pavodle Łatuški, praktyka pieradačy takich spraŭ u rehijony — zvyčajnaja reč u Polščy. U pryvatnaści, spravaj pra padbuchtorvańnie da zabojstva samoha Paŭła Łatuški zajmajecca departamient u Łodzi. Pryčyna pieradačy spravy Mielnikavaj u Lublin — pierahruzka varšaŭskaha adździeła abo toje, što spravy, źviazanyja ź biełaruskim kantekstam, časta traplajuć mienavita tudy.

«Praz tydzień paśla taho, jak ja daŭ pakazańni pra źniknieńnie Mielnikavaj u varšaŭskaj palicyi, ja nakiravaŭ rajonnamu prakuroru list z prośbaj daprasić dadatkovych śviedkaŭ, — kaža Łatuška. — My paznačyli proźviščy ludziej, jakija mohuć dać pakazańni. Ale pakul nas nie apytvali — takich dziejańniaŭ z boku prakuratury nie było».

Piśmovyja paćvierdžańni pahrozaŭ

Łatuška taksama płanuje dadatkova źviarnucca da polskich uładaŭ, kab atrymać bolš infarmacyi pra chod śledstva. Padstavaj stali dziejańni biełaruskich uładaŭ i pahrozy ŭ dačynieńni da siabraŭ Kaardynacyjnaj rady, u tym liku — da samoj Anžaliki.

«Nam udałosia znajści piśmovyja paćvierdžańni, što Anžalicy pahražali, — kaža jon. — Pahrozy byli represiŭnaha charaktaru. U krasaviku 2024 jana atrymała šerah paviedamleńniaŭ ad śpiecsłužbaŭ u miesiendžary. U nas u kamandzie jość praviła — paviedamlać pra takoje. My možam kazać i pra šantaž z vykarystańniem pahrozaŭ u dačynieńni da jaje blizkich. Jana nie ŭstupiła ŭ pierapisku, ale paviedamiła nam pra heta».

Łatuška taksama adznačaje, što paśla 25 sakavika jahonaja kamanda sprabavała źviazacca z rodnymi Mielnikavaj praz sacsietki, ale biezvynikova. Nichto ź jaje siabroŭ ci rodnych sam nie kantaktavaŭ ni ź im, ni z kamandaj.

«My stvaryli ŭ NAU śpiecyjalnuju hrupu, jakaja štodnia analizuje ŭsiu infarmacyju, jakaja źjaŭlajecca, — kaža Łatuška. — My šukajem jaje, choć našy mahčymaści abmiežavanyja. My nie možam pravodzić śledčyja dziejańni ŭ Polščy ci inšych krainach. Tym bolš — u Biełarusi. Ale niekalki čałaviek pracujuć nad hetym pastajanna».

Što da viersij źniknieńnia Mielnikavaj, Łatuška nie choča śpiekulavać.

«My zychodzim z tych faktaŭ, jakija jość, — kaža jon. — Ich niašmat, ale jany jość. My žyviom u realnaści vajny biez praviłaŭ z boku režymu, jaki viadzie baraćbu suprać demakratyčnych instytutaŭ. KR — prykład. Režym nie hrebuje nijakimi mietadami: represii, pahrozy blizkim. Jany zdoleli pasadzić samalot Ryanair, prymušajuć dyjasparu da supracoŭnictva, pahražajuć zabojstvami. Tamu biez upłyvu režymu źniknieńnie Anžaliki niemahčyma. U jakoj stupieni — nie viedaju. Ale ŭpłyŭ jość».

• 0
• 1
• 2
• 2
• 1
• 0
• 0
• 0