U Maskvie tydzień nie pracuje mabilny internet, biznes tracić miljardy
Maskva tydzień žyvie ŭ stanie maštabnaha mabilnaha błekaŭtu. Z 5 sakavika ŭ centralnych rajonach stalicy RF praktyčna całkam źnik mabilny internet. Pavodle krynic u IT-śfiery, Maskva stała placoŭkaj dla samaha maštabnaha teściravańnia sistemy «biełych śpisaŭ». Kali raniej rasijskaja cenzura pracavała pa pryncypie «zabaroniena toje, što ŭ śpisie», to novaja madel (jakuju aktyŭna vykarystoŭvaje Iran) pracuje naadvarot: zabaroniena ŭsio, akramia dazvolenaha.
U centralnych rajonach Maskvy ŭžo tydzień nie pracuje mabilny internet. Apieratary zajaŭlajuć, što ad ich ničoha nie zaležyć. Ułady nie nazyvajuć terminaŭ, kali pieraboi skončacca, tłumačačy heta kłopatam pra biaśpieku. Mahčyma, da stalicy dajšli vučeńni pa adładcy pracy «biełych śpisaŭ», jakija iduć z kanca 2025 hoda pa ŭsioj krainie, piša BBC.
Danyja Centra manitorynhu i kiravańnia sietkaj suviazi ahulnaha karystańnia, padparadkavanaha Raskamnahladu, śviedčać, što prablemy ŭźnikajuć u abanientaŭ šerahu apierataraŭ, u tym liku «vialikaj čaćviorki» — MTS, «Biłajna», «MiehaFona» i T2.
Ułady pra heta nie papiaredžvali. Pieršyja prablemy z mabilnym internetam karystalniki zaŭvažyli ŭviečary 5 sakavika. Spačatku — u Paŭdniovaj administracyjnaj akruzie, paviedamlała vydańnie «Kod Durava», a zatym i ŭ centralnaj častcy horada.
Karystalniki adznačali, što pracavali sajty z «biełaha śpisa» ŭchvalenych uładami servisaŭ, jakija pavinny być dastupnyja navat pry adklučeńniach. VPN nie dapamahaje ich abyści. Praŭda, adzin z žycharoŭ Maskvy, ź jakim parazmaŭlała vydańnie, raspavioŭ, što ŭ jaho nie pracujuć navat sajty sa «śpisa».
«Pryčym u adnym i tym ža miescy suviaź moža źnikać i źjaŭlacca, ale momanty źjaŭleńnia zvyčajna mienš praciahłyja, čym momanty jaje niedastupnaści», — dzivicca tamu, što adbyvajecca, maskvič.
Pavodle jaho słoŭ, u mietro suviaź taksama to źnikaje, to źjaŭlajecca, pryčym usio pracuje lepš zazvyčaj za Kalcavoj linijaj mietrapalitena: «U mianie siońnia z ranicy ŭ rajonie stancyi «Biełaruskaja» była suviaź, a ŭ mietro, pa-mojmu, nie było ŭ asnoŭnym. Potym ja vyskačyŭ u rajonie stancyi «Pavialeckaja», znoŭ była suviaź, a potym źnikła».
Z-za pierabojaŭ maskvič nie zmoh vyklikać i taksi.
Surazmoŭca Bi-bi-si z servisu taksi raspavioŭ, što kiroŭcaŭ złuje toje, što adbyvajecca.
Servisy zamovy taksi prymajuć miery, kab pracavać biez mabilnaha internetu. Naprykład, «Jandeks» prapanuje kiroŭcam vychodzić na liniju i prymać zamovy z dapamohaj telefona, patelefanavaŭšy i vybirajučy opcyi naciskańniem ličbaŭ na kłavijatury i atrymlivajučy sms-paćviardžeńni.
Hazieta «Kommiersant» sa spasyłkaj na krynicy pisała, što mabilnyja apieratary abmiažoŭvajuć suviaź pa patrabavańni ŭładaŭ. 6 sakavika apieratary paviedamlali, što suviaź źnikaje pa niezaležnych ad ich pryčynach. Nichto nie viedaje ničoha i pra toje, kolki heta moža praciahnucca, śćviardžajuć krynicy vydańnia The Bell na rynku.
7 sakavika suviaź stali adklučać, vidać, u zonach pakryćcia, a nie pa rajonach. Tak, na adnym baku vulicy internet i mabilnaja suviaź mahli być, na inšym — nie.
Analiz vydańnia «Ahienctva» pakazaŭ, što adklučeńni zakranajuć pierš za ŭsio centralnyja rajony Maskvy.
Padobnyja pieraboi, ale nie ŭ takim maštabie, nazirajucca i ŭ centry Pieciarburha. Adzin z žycharoŭ horada raspavioŭ vydańniu, što pa-za centram usio pracuje narmalna, navat telehram biez VPN.
10 sakavika pres-sakratar prezidenta Rasii Dźmitryj Piaskoŭ skazaŭ, što abmiežavańni źviazany z «zabieśpiačeńniem biaśpieki», a na nastupny dzień dadaŭ, što adklučeńni zakonnyja i praciahnucca stolki, kolki treba.
Straty dla biźniesu surazmoŭca «Kommiersanta» na IT-rynku aceńvaje ŭ sumu ad 3 da 5 młrd rub.
Siarod tych, chto paciarpieŭ najbolš — kurjerskija słužby, karšerynh, roźničny handal z mabilnymi terminałami apłaty. Na hetym fonie praciahvaje raści kolkaść padklučeńniaŭ pravadnoha internetu.
Čamu heta adbyvajecca?
Vydańnie RBK sa spasyłkaj na krynicu na rynku infabiaśpieki paviedamiła, što ŭłady testujuć «biełyja śpisy». Hetuju technałohiju pačali prymianiać vosieńniu 2025 hoda, kab źmiakčyć dla ludziej nastupstvy adklučeńniaŭ mabilnaha internetu, jakija ŭłady tłumačać baraćboj z nalotami ŭkrainskich dronaŭ.
Kali papiarednija mietady cenzury pracavali pa pryncypie «ŭsio dazvolena, što nie zabaroniena», to «bieły śpis» dziejničaje pa pryncypie «ŭsio zabaroniena, akramia dazvolenaha». Tak, naprykład, błakujuć internet u Iranie. Pavodle zadumy, heta dazvalaje ludziam zachodzić na niekatoryja resursy, kali niama mabilnaha internetu. Śpis takich resursaŭ abnaŭlaje Minličby.
Zaraz u hetym pieraliku sajty dziaržstruktur, niekatoryja bujnyja banki, servisy dastaŭki, taksi, markietpłejsy, a taksama prapahandysckija ŚMI.
Pracu «śpisaŭ» pakul nie naładzili. Pa-pieršaje, jany nie rehłamientavanyja nijakim zakonam, pa-druhoje, z taho času, jak jany stali dziejničać, karystalniki pastajanna skardziacca na toje, što jany albo nie funkcyjanujuć, albo robiać heta ź pierabojami. Tym nie mienš niekatoryja kamientatary miarkujuć, što «śpisy» — heta pra vobraz budučaha izalavanaha ad śvietu Runetu, čym i tłumačycca hipoteza pra toje, što padziei ŭ Maskvie — heta adładka pracy hetaj technałohii. Ułady nikoli hetaha nie paćviardžali i tłumačać lubyja zboi mierami biaśpieki.
Da hetaha času takija bujnyja prablemy ź internetam u rasijskaj stalicy zdaralisia tolki ŭ mai 2025 hoda paśla nalotaŭ ukrainskich dronaŭ. Zatym adklučać mabilny internet pačali pastajanna pa ŭsioj krainie. Niekatoryja harady žyli biez mabilnaha internetu miesiacami.
Kamientary
A ŭ kłasyčnaj realnaści sankcyi za 4 hady pryviali da taho, što uŭsie abstalavańnie jakoje absłuhoŭvaje mabilny internet vypracavała, a zamianić niama čym. Tym bolš što durnyja ruskija praciahvajuć kuplać novuju techniku, jakaja vykarystoŭvaje bolš i bolš resursaŭ štohod. Małajcy, praciahvajcie razburać infrastrukturu :)