Kiroŭcy byli ćviarozyja. Što viadoma pra avaryju aŭtobusa pad Varšavaj, u jakoj paciarpieŭ biełarus
Aŭtobus biełaruskaj kampanii VisitTour ranicaj 29 krasavika trapiŭ u dvajnuju avaryju kala varšaŭskaha aeraporta. U palicyi raskazali telekanału «Biełsat», što viadoma pra zdareńnie.
Aŭtobus, jaki kiravaŭsia ź Minsku va Urocłaŭ, jechaŭ pa chutkasnaj trasie S2 pad Varšavaj, kala aeraportu imia Frederyka Šapena. Kala 3-j hadziny nočy aŭtobus źjazdžaŭ na trasu S79, źjechaŭ z darohi na pavarocie, urezaŭsia ŭ aharodžu i pierakuliŭsia na bok. Na miesca zdareńnia pryjechali rataŭniki. Padčas akazańnia dapamohi paciarpiełym u pažarnuju mašynu ŭrezaŭsia hruzavik.
U vyniku dźviuch avaryj paciarpieli i trapili ŭ špitali 14 čałaviek, uva ŭsich traŭmy, jakija nie pahražajuć žyćciu, skazali «Biełsatu» ŭ palicyi. U špitalach hramadzianie Biełarusi i Ukrainy, taksama byŭ špitalizavany adzin pažarnik, jaki ŭžo pakinuŭ špital.
Raniej pres-sakratar Mazavieckaj vajavodskaj stancyi Meditrans kazaŭ, što paciarpieli 17 čałaviek: 15 z aŭtobusa i dvoje ź inšych mašynaŭ. U aŭtobusie było 26 čałaviek i kiroŭca. Paciarpieli ŭ asnoŭnym žychary Ukrainy, ale taksama adzin biełarus, adzin ispaniec i troje palakaŭ. Samamu maładomu ŭdzielniku avaryi 17 hadoŭ, najstarejšamu — 59. Za rulom hruzavika, jaki ŭrezaŭsia ŭ pažarnuju mašynu, byŭ 49-hadovy hramadzianin Ukrainy.
Jakija byli pryčyny avaryi, śledčyja zmohuć skazać pa vynikach rasśledavańnia: palicyja nie vyklučaje, naprykład, pieravyšeńnie chutkaści ci toje, što kiroŭca zasnuŭ za rulom. Kiroŭcy aŭtobusa i ciažkavika byli ćviarozyja, dadali ŭ palicyi: u vydychanym pavietry nie zarehistravali ałkaholu.
Pasažyrskija aŭtobusy, što jeduć ź Biełarusi ŭ Polšču, niaredka vymušanyja stajać u čerhach na miažy šmat hadzinaŭ. Pavodle čatu pra pierachod miažy, ciapier ź biełaruskaha boku ŭjezdu ŭ Polšču čakaje 70 aŭtobusaŭ. Raniej vyklikanaja hetym stomlenaść kiroŭcaŭ nazyvałasia pryčynaju padobnych avaryj.
U kampanii VisitTour admovilisia kamientavać zdareńnie. Nie mieli nijakaj infarmacyi i ŭ ambasadzie Biełarusi ŭ Polščy. Ale ŭ Ministerstvie zamiežnych spravaŭ Biełarusi zajavili, što pasolstva hatovaje akazać biełarusam usiu nieabchodnuju konsulska-pravavuju dapamohu. Telefon dla pilnaj suviazi: +48 660 012 074.
Ciapier čytajuć
Ina Kulej: Milinkievič pieramoh śmierć, ale šlach da poŭnaha adužańnia niablizki4
Kamientary