Uradženca akupavanaha Mielitopala pryhavaryli da 27 hadoŭ pa spravie ab sprobie atručvańnia vypusknikoŭ lotnaha vučylišča
Jahor Siamionaŭ nibyta sprabavaŭ pa zadańni ŭkrainskich śpiecsłužbaŭ ich atrucić z dapamohaj ałkaholu i tortu, dadaŭšy ŭ jaho mocnadziejny preparat.
Paŭdniovy akruhovy vajskovy sud Rasii pryhavaryŭ uradženca akupavanaha Mielitopala Jahora Siamionava da 27 hadoŭ kałonii pa abvinavačańni ŭ sprobie atručvańnia vypusknikoŭ lotnaha vučylišča ŭ Armaviry, piša Bi-bi-si.
Sud pryznaŭ 34-hadovaha Siamionava vinavatym pa artykułach «teraryzm» i «dziaržaŭnaja zdrada».
Pavodle viersii śledstva, u kastryčniku 2023 hoda Siamionaŭ pasprabavaŭ atrucić vypusknikoŭ Armavirskaha vyšejšaha vajennaha avijacyjnaha vučylišča z dapamohaj ałkaholu i torta, u jakija byŭ dadadzieny mocnadziejny preparat.
Jak śćviardžaje abvinavačańnie, Siamionaŭ, vykonvajučy zadańnie ŭkrainskich śpiecsłužbaŭ, nabyŭ 200 fłakonaŭ miedycynskaha preparata «Kardyamin» (stymulatar centralnaj niervovaj sistemy), 76 plašak viski, 40 plašak kańjaku i 20-kiłahramovy tort. Zatym jon z dapamohaj špryca ŭvioŭ preparat u napoi i tort i pryvioz ich u restaran, dzie prachodziła sustreča vypusknikoŭ vučylišča.
Dastaviŭšy pradukty, Siamionaŭ chutka syšoŭ, skazaŭšy, što ich pieradaŭ adzin z vypusknikoŭ, jaki nie zmoh prysutničać na sustrečy. Haściam heta padałosia padazronym, tamu jany nie stali sprabavać pačastunak i źviarnulisia ŭ FSB.
U toj ža dzień Siamionava zatrymali ŭ aeraporcie Staŭrapala.
Pavodle viersii śledstva, u 2022 hodzie jon staŭ hramadzianinam Rasii, a ŭ krasaviku 2023-ha jaho zavierbavali ŭkrainskija śpiecsłužby i daručyli arhanizavać zabojstva, paabiacaŭšy jamu 400 tysiač rasijskich rubloŭ (5 tysiač dalaraŭ).
Siamionaŭ pryznaŭ svaju vinu. Jaho sprava razhladałasia ŭ zakrytym režymie. Abvinavačvańnie prasiła pryhavaryć jaho da pažyćciovaha źniavoleńnia.
Kamientary