Rekanstrukcyja kinateatra «Maskva» zavieršyłasia napiaredadni Dnia Pieramohi. Uračystaje adkryćcio — siońnia 7 maja, pišuć Minsk-naviny.
Abnaŭleńnie budynka pačałosia ŭ 2023 hodzie.Budaŭniki, jakija zajmalisia abnaŭleńniem budynka, nieadnarazova raspaviadali, što pry padrychtoŭcy prajekta architektary addavali pieravahu niestandartnym rašeńniam.
— «Maskva» — sapraŭdy ŭnikalny kinateatr. Pry budaŭnictvie vykarystoŭvalisia najpraściejšyja inžyniernyja rašeńni. Ich navat vyvučali ŭ VNU, siońnia tak užo nie budujuć. Z-za niestandartnaj płaniroŭki kožny dzień na placoŭcy nie byŭ padobny na papiaredni: davodziłasia rehularna sutykacca z novymi zadačami, šukać aptymalnyja vychady ź situacyi, — dzialilisia śpiecyjalisty.
Zroblena niamała: zamienieny dach, «pieraźbirali» dźvie leśvicy, uzmacnili niekatoryja kanstrukcyi, demantavali praktyčna ŭsie ŭnutranyja pieraharodki i technałahičnaje abstalavańnie, ustalavali prytočna-vyciažnyja kamiery i santechniku, fasad adnavili amal u pieršapačatkovym vyhladzie. Sam budynak ablicavali kieramahranitam, što imituje pryrodny marmur. Plitku dla ablicoŭki śpiecyjalna dla «Maskvy» vyrabiła adno z profilnych minskich pradpryjemstvaŭ. Staroje vitražnaje škleńnie zamianili na enierhaefiektyŭnaje multymiedyjnaje, abnavili ŭsie śviacilni. Pry hetym zastalisia niekranutymi 15 miednych ščytoŭ nad uzroŭniem druhoha paviercha, što simvalizujuć respubliki SSSR.
Asnoŭnyja źmieny zakranuli ŭnutranaje ŭbrańnie. Naprykład, za košt pierapłaniroŭki zamiest dvuch załaŭ buduć pracavać čatyry: dva na 48 i pa adnym na 654 i 233 miescy. Pavodle słoŭ śpiecyjalistaŭ, pa funkcyjanalnaści i techničnych mahčymaściach jany ničym nie sastupajuć załam u bolš «maładych» kinateatrach horada. Ich asnaścili najnoŭšymi prajektarami i hukavymi sistemami, zdolnymi zabiaśpiečyć vysokuju jakaść vyjavy i hučańnia, a taksama zručnymi kresłami. Pakłapacilisia i pra ludziej z abmiežavanymi mahčymaściami — dla kamfortnaha pieramiaščeńnia ŭstalavany śpiecyjalnyja padjomniki.
Pieraŭtvareńni zakranuli i ahulnyja prastory. Praŭda, niekatoryja paznavalnyja elemienty interjera ŭsio ž nie čapali. U viestybiuli zachavalisia pavierchni, azdoblenyja marmuram i hranitam, a taksama kałony, častkova leśvicy z parenčami, padłohi i nie tolki. Pierad pačatkam rabot ich nakryli achoŭnymi materyjałami. Bieź źmianieńniaŭ pakinuli i vitraž «Maskva — stalica našaj Radzimy», jaki maje historyka-kulturnuju kaštoŭnaść. Adnavili isnujučyja šklanyja elemienty dekoru, što ŭpryhožvajuć kalidory. Niekatoryja detali dla ich vyrablalisia na zamovu.
Akramia taho, dobraŭparadkavali terytoryju, što prymykaje da kinateatra. Ukłali plitku, na niekatorych učastkach dadali taktylnaje pakryćcio, krychu abnavili fantan, ustalavali łaŭki i skamiejki.
Paśla adkryćcia «Maskvy» naviedvalniki zmohuć nie tolki ŭdzielničać u śpiecyjalnych pakazach i fiestyvalnych prahramach, ale i padsiłkavacca ŭ kaviarni. Taksama praduhledžana kovorkinh-prastora dla sustreč, znosin i sumiesnaj pracy moładzi. Darečy, u dzień adkryćcia — 7 maja — budzie dziejničać śviatočnaja źnižka 50 % na kvitki.
«Maskvu» ŭviali ŭ ekspłuatacyju nieŭzabavie paśla Alimpijady-80. Kinateatr staŭ pieršym šyrokafarmatnym u Biełarusi, dzie raźmiaścilisia dva zały. Jany byli raźličanyja na 260 i 1 070 miescaŭ.
Juraś Ziankovič raskazaŭ pra svajo vyzvaleńnie i šlach u ZŠA6
Kamientary