U kałonijach pačali prymusova śpisvać usie hrošy z asabistych rachunkaŭ asudžanych
Pravaabarončy resurs Mayday team atrymaŭ niekalki śviedčańniaŭ z roznych kałonij, što z rachunkaŭ asudžanych tam stali zdymać amal usie najaŭnyja hrošy. Časam razmova idzie pra sotni dalaraŭ u ekvivalencie. Pryčyna — orhany prymusovaha vykanańnia (OPI) pačali nakiroŭvać u kałonii pradpisańni na biezumoŭnaje spahnańnie srodkaŭ.
Źmieny ŭ zakanadaŭstvie byli pryniatyja jašče 15 lipienia 2021 hoda. Mienavita tady z artykuła 108 Pracoŭnaha kodeksa, jaki rehuluje abmiežavańni na ŭtrymańni z zarabotnaj płaty, była całkam vyklučanaja norma, jakaja abmiažoŭvała pamier prymusovych utrymańniaŭ na pakryćcio škody, pryčynienaj złačynstvam.
Da niadaŭniaha času hrošy z rachunkaŭ asudžanych na vypłatu štrafaŭ i pazovaŭ śpisvalisia tolki ź ich zhody — jany pisali zajavu, u jakoj paznačali, jaki pracent možna zdymać paśla źjaŭleńnia srodkaŭ na rachunku.
Adnak ciapier u kałonii pačali pastupać pradpisańni ad OPI, jakija patrabujuć biezumoŭnaha śpisańnia ŭsioj sumy, niezaležna ad žadańnia asudžanaha. Kiraŭnictva kałonij tłumačyć, što ŭsie srodki, jakija pastupajuć na rachunak, buduć aŭtamatyčna zdymacca, pakul nie budzie poŭnaściu pahašany štraf abo pazoŭ.
Varta adznačyć, što hrošy ad svajakoŭ nie źjaŭlajucca zarabotnaj płataj, tamu padlahajuć poŭnamu spahnańniu. Tamu paśla źjaŭlańnia novaj praktyki svajaki asudžanych prosta bajacca pierasyłać im hrošy.
Asudžanyja mohuć vykarystoŭvać tolki ad 30% da 50% svajho zarobku, jaki jany atrymlivajuć u pramysłovaj zonie kałonii. Ale paśla ŭsich utrymańniaŭ zvyčajna im zastajecca ŭsiaho kala 10 rubloŭ.
Kamientary
I jejo nado kačať !