U Ministerstvie adukacyi padviali vyniki hramadskaha abmierkavańnia pa prajekcie pastanovy ŭrada «Ab paradku ažyćciaŭleńnia samastojnaj prafiesijnaj dziejnaści pa navučańni». U vyniku praktyčna ŭ kožny punkt byli ŭniesieny źmieny, piša sb.by,
U pačatku krasavika byŭ apublikavany prajekt pastanovy ŭrada, jaki ŭnosiŭ źmieny ŭ rabotu samazaniatych u śfiery navučańnia. Pastupiła bolš za 200 paviedamleńniaŭ-vodhukaŭ. Najbolš dyskusij vyklikaŭ punkt, što repietytarstva pavinna pravodzicca indyvidualna z kožnym spažyŭcom pasłuhi, adznačaje dyrektar Departamienta kantrolu jakaści adukacyi Minadukacyi Volha Rybaklučava:
— Uvahu źviartali na ŭsie kanstruktyŭnyja zaŭvahi i prapanovy, tamu ŭ vyniku praduhledzieli mahčymaść akazańnia pasłuh repietytara i nastaŭnika-defiektołaha ŭ mini-hrupach kolkaściu da čatyroch čałaviek.
Rezanans u hramadstvie taksama vyklikała prapanova vykarystoŭvać pry akazańni repietytarskich pasłuh tolki zarehistravanyja ŭ Biełarusi servisy. Niekalki varyjantaŭ padobnaha prahramnaha zabieśpiačeńnia, zasnavanaha na vobłačnych technałohijach, užo ciapier paśpiachova prymianiajucca ŭ dziejnaści jurydyčnych asob, tłumačyć ekśpiert:
— Ale jany pakul nie adaptavanyja dla raboty ź fizičnymi asobami ŭ poŭnym abjomie. Tamu my paličyli zakanamiernym unosić źmieny ŭ hetym pytańni tolki paśla taho, jak budzie zabiaśpiečana rabota biełaruskich internet-placovak. Na dadzienym etapie norma vyklučana.
Jašče adna prapanova — repietytary pavinny ŭpeŭnicca, ci zaličany navučeniec u dziciačy sad, škołu, kaledž abo ŭniviersitet. Norma zachoŭvajecca, ale ŭ zručnym farmacie. Repietytaru nie treba zachoŭvać nijakich kopij paśviedčańniaŭ abo daviedak. Praviła adno: pierad pačatkam supracoŭnictva piedahoh abaviazany aznajomicca z dakumientami, jakija paćviardžajuć status navučenca.
Jašče adzin tezis — navučańnie (biez realizacyi adukacyjnych prahram) pracy na kampjutary, a taksama zaniatki pa vyjaŭlenčym mastactvie, tancach, chareahrafii, ihry na muzyčnych instrumientach, vakale, aratarskamu mastactvu mohuć pravodzicca tolki ŭ dačynieńni da paŭnaletnich spažyŭcoŭ pasłuhi. Heta prapanova zastajecca ŭ prajekcie pastanovy. Jana, darečy, taksama vyklikała šyrokaje abmierkavańnie, adznačaje Volha Rybaklučava:
— Sprava ŭ tym, što tezis niapravilna interpretavali, paličyŭšy, što repietytaram płanavali całkam abmiežavać pracu ź dziećmi, što absalutna nie adpaviadaje rečaisnaści.
«Nieabchodna pamiatać, što repietytar nie navučaje, jon akazvaje kansultacyjnyja pasłuhi, dapamahaje ŭ navučańni. I kali dzicia atrymlivaje asnoŭnuju adukacyju ŭ himnazii abo kaledžy mastactvaŭ, to repietytar zmoža akazvać jamu kansultacyjnyja pasłuhi. Ale kali dzicia płanuje zajmacca tancami, skažam, z nula, to da kansultacyi hety vid tvorčaj dziejnaści ŭžo nie adniesieš. Tut nieabchodnaja adukacyjnaja prahrama», — skazała čynoŭnica.
«Pa sutnaści, heta norma ŭžo dziejničaje: dla raboty ź dziećmi pavodle Kodeksa ab adukacyi nieabchodna być zarehistravanym u jakaści jurydyčnaj asoby, ustanovy adukacyi abo inšaj arhanizacyi. Inšych varyjantaŭ siońnia niama. Indyvidualnyja pradprymalniki nie mohuć realizoŭvać adukacyjnyja prahramy ŭ dačynieńni da niepaŭnaletnich.
Usie adredahavanyja momanty adlustravany ŭ novym prajekcie pastanovy, jakoje ŭžo nakiravana na paŭtornaje ŭzhadnieńnie zacikaŭlenym respublikanskim orhanam dziaržaŭnaha kiravańnia — u Ministerstva kultury, Ministerstva ekanomiki, Nacyjanalny centr abarony piersanalnych danych i inš.», — dadała Rybaklučava.
Kamientary