Siabar maładości Łukašenki zastaŭsia kiraŭnikom fiederacyi handboła. Jon kiruje z 2006 hoda
Uładzimir Kanaploŭ zastaniecca na čale fiederacyi jak minimum da 2029 hoda.
Uładzimir Kanaploŭ zastaniecca kiraŭnikom Biełaruskaj fiederacyi handboła jašče jak minimum čatyry hady. Za jaho pieraabrańnie spravazdačna-vybarnaja kanfierencyja fiederacyi prahałasavała adnahałosna — 92 delehaty vystupili «za».
Kanaploŭ uznačalvaje fiederacyju z 2006 hoda. Nichto inšy ź biełaruskich spartyŭnych funkcyjanieraŭ nie moža pachvalicca takim aparatnym doŭhažycharstvam.
Na kanfierencyi kiraŭnik BFH zajaviŭ, što praces raźvićcia handboła ŭ Biełarusi prachodzić upeŭniena. Zbornyja i kłubnyja kamandy prymajuć udzieł u mižnarodnych turnirach.
Ale pad mižnarodnymi turnirami jon maje na ŭvazie matčy, hałoŭnym čynam, sa zbornymi Rasii. Usie biełaruskija kamandy paśla pačatku poŭnamaštabnaj vajny byli adchilenyja ad mižnarodnych spabornictvaŭ.
Kanaploŭ śćviardžaje, što kiraŭniki Mižnarodnaj i Jeŭrapiejskaj fiederacyj prymajuć namahańni dla vyrašeńnia pytańniaŭ ab dopusku biełaruskich kamand i pasłali svaje pryvitańni ŭdzielnikam kanfierencyi.
Uładzimir Kanaploŭ byŭ škłoŭskim učastkovym i siabram maładości Łukašenki. Jon byŭ pamočnikam palityka, kali toj pracavaŭ deputatam Viarchoŭnaha Savieta, arhanizoŭvaŭ vybarčuju kampaniju Łukašenki ŭ 1994 hodzie. Paśla jaho pieramohi Kanaploŭ staŭ niefarmalna druhim čałaviekam u krainie.
«Naša Niva» raskazvała, što ŭ niejki momant Kanaploŭ nastolki pavieryŭ u siabie, što vyrašyŭ stać prezidentam. Jon pačaŭ farmavać hrupoŭku i navat źjeździŭ u Maskvu na ahledziny. Ale Łukašenka hetuju inicyjatyvu zadušyŭ, sajuźnikaŭ svajho siabra pasadziŭ, a sam Kanaploŭ pajšoŭ z pasady śpikiera Pałaty pradstaŭnikoŭ i apynuŭsia ŭ apale. Ale post kiraŭnika BFH zachavaŭ.
U 2013 hodzie Kanaploŭ navat trapiŭ u SIZA pa spravie namieśnika hienprakurora Alaksandra Archipava. Na sudzie jon abyšoŭsia štrafam, ale atrymaŭ klajmo sudzimaha. A ŭžo ŭ 2022 hodzie krynicy «Našaj Nivy» havaryli, što Łukašenka viarnuŭ Kanaplova ŭ favor. Adnak pasadu ŭ sistemie jon z tych časoŭ tak i nie atrymaŭ.
Stary paplečnik Łukašenki paraŭnaŭ jaho z ajatałoj Chamiejni. Paraŭnańnie tak sabie
Druhoje pryšeście Kanaplova: Łukašenka viarnuŭ u favor byłoha najlepšaha siabra, jaki jaho ledź nie skinuŭ
«Razrucha i kryzis nijak nie źviazanyja z sankcyjami». Što nie tak ź listom Uładzimira Kanaplova da kiraŭnika suśvietnaha handboła
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary