Archiŭ VEHA pačynaje pracu nad druhim tomam knihi «Ruiny Biełarusi» i zaprašaje dzialicca zdymkami ź siamiejnych archivaŭ

Prajšoŭ amal hod paśla vydańnia pieršaha toma «Ruin». Za hety čas kniha trapiła ŭ biblijateki pa ŭsim śviecie, atrymała premiju Najpiękniejsze Polskie Książki 2025, adnaho z najbolš prestyžnych kulturnych konkursaŭ u Polščy, jaki z 1957 hoda arhanizuje Polskaje tavarystva knihavydaŭcoŭ (PTWK).

Kniha taksama ŭvajšła ŭ šort-list Fotograficzna Publikacja Roku, i była pradstaŭlena na vystavach u Muzeum Sztuki Nowoczesnej, Instytut Fotografii Fort i Łódź Fotofestiwal 2026. Heta nie stolki śpis uznaharod, kolki paćviardžeńnie taho, što historyja, zachavanyja ŭ siamiejnych albomach, moža mieć značeńnie daloka za miežami asobnaj siamji. 

Aŭtary prajekta VEHA — niezaležny ličbavy archiŭ viernakularnaj fatahrafii XX stahodździa, jaki źbiraje i daśleduje vizualnuju historyju Biełarusi praź siamiejnyja fotaarchivy. Siońnia anłajn-archiŭ źmiaščaje bolš za 3000 unikalnych fotazdymkaŭ z sotniaŭ roznych krynic i rehularna papaŭniajecca novymi materyjałami.

Čamu źjaŭlajecca druhi tom? 

Pieršy tom «Ruin Biełarusi» staŭ daśledavańniem taho, jak fatahrafija moža zachoŭvać pamiać pra miescy, jakija źnikajuć. U pracesie pracy stała zrazumieła, što materyjałaŭ značna bolšy za mahčymaści adnaho vydańnia. Mienavita tamu VEHA pačynaje pracu nad druhim tomam «Ruin Biełarusi». Vybar architekturnych abjektaŭ znoŭ budzie adbyvacca ŭ niepasrednym uzajemadziejańni ź ludźmi, jakija dašluć svaje fatahrafii.

Jak i ŭ pieršym tomie, vakoł fatahrafij budzie stvorany korpus daśledčych tekstaŭ pra historyju i architekturu. Teksty buduć padrychtavanyja ź biełaruskaj pierśpiektyvy i apublikavanyja na troch movach — biełaruskaj, polskaj i anhlijskaj. Tak kniha znoŭ złučyć siamiejnuju fatahrafiju, vizualnuju historyju i daśledavańnie architekturnaj spadčyny Biełarusi.

Jak dasłać fatahrafiju?

VEHA zaprašaje dasyłać fatahrafii, zroblenyja na terytoryi sučasnaj Biełarusi da 1990 hoda, na jakich možna ŭbačyć ruiny histaryčnych budynkaŭ. Heta mohuć być zamki, siadziby, cerkvy i kaścioły, sinahohi, młyny, vakzały i inšyja budynki. Asablivuju vartaść majuć zdymki, na jakich ludzi pazirujuć na fonie ruin. Mienavita źmiaščeńnie fokusu z architektury na čałavieka stała adnoj z asnoŭnych rysaŭ prajekta. 

Archiŭ VEHA źbiraje tolki ličbavyja kopii, aryhinały zastajucca ŭ siamji. 

Kopii možna dasyłać na poštu [email protected] da 1 śniežnia 2026 hoda.

Da kožnaha zdymka, kali mahčyma, dadajcie: hod · miesca · chto na fota · vaša imia. Nie viedajecie dakładnaj daty ci miesca? Usio roŭna dasyłajcie — napišycie ŭsio, što vam viadoma. Usie fota, jakija adpaviadajuć kryteryjam prajekta, buduć apracavanyja, katałohizavanyja i dadadzienyja ŭ anłajn-archiŭ VEHA. Najbolš cikavyja fatahrafii buduć apublikavanyja ŭ knizie. 

U aficyjnych archivach historyja zvyčajna prezientujecca praź vialikija padziei i viadomych ludziej. Siamiejnaja fatahrafija pracuje inakš. Jana zachoŭvaje historyju haryzantalna, praz tysiačy asobnych uspaminaŭ, vypadkovych zdymkaŭ i paŭsiadzionnych scen. Hetyja frahmienty možna skłaści, jak pazły, u vialikuju karcinu vizualnaj historyi Biełarusi, a kniha zachavaje jaje dla budučyni. 

• 0
• 0
• 0
• 0
• 0
• 0
• 0
• 0