Łukašenka nazvaŭ siabie 17-m kavaleram ordena «Pieramoha». Prosta jak Brežnieŭ
Alaksandr Łukašenka pryniaŭ ad ministra abarony Rasii ŭ padarunak repliki savieckich ordenaŭ. I nie ŭstrymaŭsia ad taho, kab žartam «prymieryć» na siabie redkuju ŭznaharodu.
Siarhiej Biełavusaŭ pryvioz u Minsk padarunak dla Łukašenki — kopii savieckich bajavych ordenaŭ. Siarod ich i kopija ordena «Pieramoha» — najvyšejšaj vajskovaj uznaharody SSSR.
Rasijski ministr padkreśliŭ, što heta vielmi kaštoŭny i redki orden, za ŭsiu historyju jaho atrymali ŭsiaho 16 čałaviek.
«Ja siamnaccaty», — ci to žartam, ci to amal surjozna skazaŭ Łukašenka i zaśmiajaŭsia. Biełavusava taki žart krychu zaśpieŭ źnianacku, ale jon taksama pabłažliva paśmiajaŭsia ŭ adkaz.
Usie kavalery ordena «Pieramoha» ŭdzielničali ŭ Druhoj suśvietnaj vajnie. Byli siarod ich i inšaziemcy: amierykanski hienierał Duajt Ejzienchaŭer, brytanski fieldmaršał Biernard Manthomiery, rumynski karol Michaj, jaki naprykancy vajny pierajšoŭ na bok sajuźnikaŭ, polski hienierał Michał Rola-Žymierski i juhasłaŭski lidar Josip Broz Cita, u hady vajny lidar partyzan-kamunistaŭ u akupavanaj Juhasłavii.
Darečy, 17-y kavaler u ordena «Pieramoha» ŭžo byŭ. Jaho zvali Leanid Brežnieŭ. Saviecki kiraŭnik, jak viadoma, vielmi lubiŭ kalekcyjanavać uznaharody, to jamu ŭručyli i hety najvyšejšy orden. Ale ŭ 1989 hodzie Brežnieŭ byŭ paśmiarotna pazbaŭleny ŭznaharody, bo jana jamu była nie pa čynu.
Łukašenka niaredka namiakaje rasijskim aficyjnym asobam pra niejkija ŭznaharody. U minułym hodzie jon atrymaŭ ad Pucina najvyšejšy rasijski orden Andreja Pieršazvanaha. Jaho histaryčna ŭručajuć asabliva addanym i łajalnym Rasii ludziam. A ŭ adnym ź intervju Łukašenka, znoŭ ža ci to žartam, ci to surjozna prasiŭ Pucina dać jamu zvańnie pałkoŭnika.
Pavietranaja himnastka pakazała zakuliśsie pracy ŭ Biełdziaržcyrku7
Kamientary
Za miedalki putina, zahonit biełarusov v russkije okopy.....