Лукашэнка назваў сябе 17-м кавалерам ордэна «Перамога». Проста як Брэжнеў
Аляксандр Лукашэнка прыняў ад міністра абароны Расіі ў падарунак рэплікі савецкіх ордэнаў. І не ўстрымаўся ад таго, каб жартам «прымерыць» на сябе рэдкую ўзнагароду.
Сяргей Белавусаў прывёз у Мінск падарунак для Лукашэнкі — копіі савецкіх баявых ордэнаў. Сярод іх і копія ордэна «Перамога» — найвышэйшай вайсковай узнагароды СССР.
Расійскі міністр падкрэсліў, што гэта вельмі каштоўны і рэдкі ордэн, за ўсю гісторыю яго атрымалі ўсяго 16 чалавек.
«Я сямнаццаты», — ці то жартам, ці то амаль сур'ёзна сказаў Лукашэнка і засмяяўся. Белавусава такі жарт крыху заспеў знянацку, але ён таксама паблажліва пасмяяўся ў адказ.
Усе кавалеры ордэна «Перамога» ўдзельнічалі ў Другой сусветнай вайне. Былі сярод іх і іншаземцы: амерыканскі генерал Дуайт Эйзенхаўэр, брытанскі фельдмаршал Бернард Мантгомеры, румынскі кароль Міхай, які напрыканцы вайны перайшоў на бок саюзнікаў, польскі генерал Міхал Роля-Жымерскі і югаслаўскі лідар Ёсіп Броз Ціта, у гады вайны лідар партызан-камуністаў у акупаванай Югаславіі.
Дарэчы, 17-ы кавалер у ордэна «Перамога» ўжо быў. Яго звалі Леанід Брэжнеў. Савецкі кіраўнік, як вядома, вельмі любіў калекцыянаваць узнагароды, то яму ўручылі і гэты найвышэйшы ордэн. Але ў 1989 годзе Брэжнеў быў пасмяротна пазбаўлены ўзнагароды, бо яна яму была не па чыну.
Лукашэнка нярэдка намякае расійскім афіцыйным асобам пра нейкія ўзнагароды. У мінулым годзе ён атрымаў ад Пуціна найвышэйшы расійскі ордэн Андрэя Першазванага. Яго гістарычна ўручаюць асабліва адданым і лаяльным Расіі людзям. А ў адным з інтэрв'ю Лукашэнка, зноў жа ці то жартам, ці то сур'ёзна прасіў Пуціна даць яму званне палкоўніка.
Цяпер чытаюць
Гістарычныя +40,4°C у Пінску — гэта толькі разагрэў. Беларусь уваходзіць у новую кліматычную эру і на вачах стане лесастэпам10
Каментары
За медальки путина, загонит беларусов в русские окопы.....