U Biełarusi druhi miesiac zapar padajuć prodažy novych aŭto. Čamu tak adbyvajecca

Pośpiechaŭ 2024 hoda paŭtaryć nie atrymajecca

Za ŭvieś 2024 hod aficyjnyja dylery pradali 53 178 novych aŭto, ź jakich 49 636, ci 93,3%, prypała na lehkaviki, što akazałasia najlepšym vynikam za apošnija piać hadoŭ. Lepš spravy ŭ dyleraŭ išli tolki ŭ rekordnym 2019 hodzie, kali było pradadziena 64 504 novyja aŭto. 

Pryčyna takoha rostu — novyja abmiežavańni z boku ES na ekspart mašyn u Biełaruś.

U vyniku prodažy aficyjnych dyleraŭ akazalisia na 20 tysiač aŭto bolšymi, čym prahnazała Biełaruskaja aŭtamabilnaja asacyjacyja.

Adnak u 2025 hodzie adbylisia źmieny ŭžo nie ŭ jeŭrapiejskim zakanadaŭstvie (jakoje zabaraniaje ekspart u Biełaruś mašyn z abjomam ruchavika, bolšym za 1,9 litra, a taksama hibrydaŭ i elektrakaraŭ), a ŭ biełaruskim. 

Pavialičyć

Uśled za Rasijaj ź lutaha 2025 hoda ŭ Biełarusi pieraličyli staŭki ŭtylizacyjnaha zboru. Heta pryviało da rostu cen na novyja aŭtamabili, jakija pastaŭlajuć u krainu jurydyčnyja asoby.

Utylzbor vyras u dva razy. Dla mašyn z abjomam ruchavika ad 1 da 2 litraŭ (samy raspaŭsiudžany varyjant) — z 11 645 rubloŭ da 23 575 rubloŭ. Dla lehkavych aŭto z abjomam ruchavika ad 2 da 3 litraŭ utylzbor pavialičyŭsia z 32 727 rubloŭ da 66 248 rubloŭ. 

Pavyšeńnie stavak nie ŭpłyvała na prodažy ŭ lutym, pakolki dylery mieli zapas mašyn, uviezienych pa starym taryfie. 

Jak źmianilisia prodažy

Ale ŭžo ŭ sakaviku prodažy ŭ dyleraŭ pačali prasiadać. U pieršy miesiac viasny było pradadziena na 6,9% mienš novych aŭto, čym u lutym, jaki tradycyjna nie samy lepšy miesiac dla prodažy mašyn.

Pa vynikach krasavika prodažy novych aŭto aficyjnymi dylerami skaracilisia jašče amal na 10%. 

Takim čynam, kali ŭ lutym dylery pradali 4598 aŭto, to ŭ krasaviku — usiaho 3859.

Mienavita novyja staŭki ŭtylizacyjnaha zboru ŭpłyvajuć na prodažy mašyn aficyjałami, bo ŭ zaležnaści ad abjomu ruchavika sabiekošt mašyn z trecich krain (za vyklučeńniem elektrakaraŭ) vyras na 4-11 tysiač dalaraŭ.

Belgee znoŭ u vyjhryšy?

Jašče adzin čyńnik, jaki taksama ŭpłyvaje na popyt — umacavańnie biełaruskaha rubla adnosna dalara. Cenaŭtvareńnie ajčynnych Geely/Belgee rost stavak utylzboru nijak nie zakranuŭ, bo mašyny biełaruskaj vytvorčaści nie abkładajucca ŭtylizacyjnym zboram. 

Ale pry pieraliku ŭ dalary ceny ŭ aficyjałaŭ taksama vyraśli. Naprykład, krasovier Belgee x70 pradajecca pa cenach ad 77 640 rubloŭ (kala 25 900 dalaraŭ). Roŭna hod tamu heta było kala 24 250 dalaraŭ.

Na druhasnym rynku ci ŭ šerych dyleraŭ pryviazki cany da rubla niama, tamu ich prapanovy vyhladajuć bolš pryvabnymi.

Na prodažy taksama ŭpłyvaje zabarona na zaklučeńnie damovy lizinhu ŭ valucie. Bolš za 80% fizičnych asob, jakija afarmlali aŭto ŭ lizinh, rabili heta ŭ valucie.

• 2
• 1
• 3
• 1
• 1
• 0
• 0
• 0