Rasija sprabuje skancentravać svaje vojski kala miažy z Ukrainaj u rajonie Charkava. Pavodle źviestak Uzbrojenych sił Ukrainy i zachodnich vajskovych analitykaŭ, heta moža być padrychtoŭkaj da letniaha nastupleńnia na Charkaŭskuju i Sumskuju vobłaści, piša Sky News.
Pradstaŭnik štaba ŭkrainskaj bryhady «Chartyja» paviedamiŭ, što rasijskaje kamandavańnie ściahvaje vojski bližej da linii frontu na Charkaŭskim napramku, ale sproby šturmu pakul biezvynikovyja.
Pavodle infarmacyi Sky News, niepadalok ad miažy raźmieščanyja reštki 50-tysiačnaj rasijskaj hrupoŭki, jakaja raniej dziejničała ŭ Kurskaj vobłaści.
Vajskovy analityk Majkł Kłark miarkuje, što Rasija rychtuje šyrokamaštabnaje nastupleńnie, u jakim mohuć udzielničać elitnyja padraździaleńni Pavietrana-desantnych vojskaŭ. Kali jany zastanucca na hetym učastku, to rasijski nastup vielmi vierahodny; kali ž ich pierakinuć u inšaje miesca, naprykład, pad Pakroŭsk — to vierahodnaść nastupu na paŭnočnym uschodzie źmienšycca.
Brytanski ekśpiert z Karaleŭskaha abjadnanaha instytuta abaronnych daśledavańniaŭ (RUSI) Džek Uotlinh ličyć, što rasijskaje nastupleńnie budzie pastupovym, z pavolnym pavieličeńniem kolkaści i maštabu atak, i što hety praces užo pačaŭsia.
Jon taksama adznačaje, što ŭ Rasii jość prykładna čatyry miesiacy dla dasiahnieńnia pośpiechu, bo zapasy jašče savieckaj techniki mohuć vyčarpacca da siaredziny vosieni. Potym Rasii daviadziecca abapiracca tolki na toje, što jana zmoža vyrabić sama.
Niadaŭna prezident Rasii Uładzimir Pucin zajaviŭ, što rasijskim kiraŭnictvam pryniata rašeńnie stvaryć «bufiernuju zonu biaśpieki» ŭzdoŭž miažy.
Kamientary