Kiełah: Na pieramovach u Stambule buduć pradstaŭniki ZŠA, Hiermanii, Vialikabrytanii i Francyi
Pieraškodaj dla praviadzieńnia pieramoŭ Kiełah nazyvaje adsutnaść rasijskaj viersii tak zvanaha «miemaranduma».
Śpiecyjalny pasłańnik prezidenta ZŠA Donalda Trampa hienierał Kit Kiełah paviedamiŭ, što na nastupnym raundzie mirnych pieramoŭ pamiž Ukrainaj i Rasijaj, jakija zapłanavanyja na 2 červienia ŭ Stambule, čakajecca ŭdzieł daradcaŭ pa biaśpiecy z ZŠA, Francyi, Hiermanii i Vialikabrytanii. Pra heta Kit Kiełah skazaŭ u intervju ABC News.
Kiełah paviedamiŭ, što na pieramovach u Stambule da ŭkrainskaj i amierykanskaj delehacyj dałučacca daradcy pa biaśpiecy z Hiermanii, Francyi i Vialikabrytanii. Mienavita hetaja hrupa, pavodle jaho słoŭ, raniej udzielničała ŭ farmiravańni ŭkrainskaha varyjanta «miemaranduma» z 22 punktaŭ padčas sustreč u Łondanie i Paryžy.
Adnak pieraškodaj dla praviadzieńnia pieramoŭ Kiełah nazyvaje adsutnaść rasijskaj viersii tak zvanaha «miemaranduma».
«Kali prezident Tramp havaryŭ z Pucinym, toj skazaŭ, što na praciahu tydnia pieradaść svoj miemarandum. Ale my dahetul jaho nie bačyli. Ukraincy jaho nie bačyli. Ja spytaŭ u kiraŭnika aparata prezidenta Ukrainy Andreja Jermaka, ci bačyŭ jon jaho. Jon adkazaŭ, što nie. Ja taksama havaryŭ z hałoŭnym ukrainskim pieramoŭščykam — Rustemam Umieravym, jaki budzie vieści pieramovy ŭ Stambule na nastupnym tydni. Jon taksama nie bačyŭ miemaranduma», — skazaŭ jon.
Kiełah taksama padkreśliŭ, što pieršačarhovaja meta pieramoŭ — dasiahnieńnie ŭsieachopnaha spynieńnia ahniu ŭ pavietry, na sušy, mory i ŭdaraŭ pa hramadzianskaj infrastruktury.
Kamientary