Jeŭrasajuz rychtuje poŭnuju zabaronu apieracyj ź biełaruskimi bankami

18-y pakiet sankcyj nakiravany na dalejšaje abmiežavańnie vajskova-pramysłovaha patencyjału Rasii, jakaja ad 2022 hoda viadzie poŭnamaštabnuju vajnu suprać Ukrainy. Biełaruś uklučanaja ŭ pakiet sankcyj, bo padtrymlivaje rasijskuju ahresiju.

U padrychtavanym pakiecie sankcyj fihurujuć čatyry biełaruskija kampanii, što dziejničajuć u halinie abarony i vajskovaj pramysłovaści. Ich publična nazavuć paźniej. Jeŭrakamisija prapanuje zamarozić ichnija aktyvy i zabaranić vieści biznes u miežach ES.

Akramia hetaha, Jeŭrakamisija taksama prapanavała pašyryć siektaralnyja abmiežavańni dla Biełarusi. Siarod ich poŭnaja zabarona na apieracyi ź biełaruskimi bankaŭskimi strukturami, jakaja raniej tyčyłasia tolki finansavych paviedamleńniaŭ (de-SWIFTing — adklučeńnie ad mižnarodnaj sistemy bankaŭskich miždziaržaŭnych raźlikaŭ SWIFT, jakoje istotna abmiažoŭvaje mahčymaści bankaŭ pravodzić apieracyi za miažoj), a ciapier pieratvarajecca ŭ poŭnuju zabaronu tranzakcyj.

Taksama ŭpieršyniu pad zabaronu traplaje impart uzbrajeńniaŭ ź Biełarusi ŭ ES.

Kab uzmacnić kantrol za mahčymym abychodam abmiežavańniaŭ, ES prapanuje pašyryć śpis tavaraŭ i technałohij, što mohuć vykarystoŭvacca dla ŭmacavańnia biełaruskaj vajskovaj i pramysłovaj bazy. U pryvatnaści, idzie havorka pra mašyny, chimikaty, asobnyja vidy mietałaŭ i płastykaŭ. Zabaraniajecca taksama tranzit šerahu tavaraŭ praz terytoryju Biełarusi.

Jak tłumačyć jeŭrapiejski redaktar Radyjo Svabodnaja Jeŭropa / Radyjo Svaboda Rykard Juźviak, raspracavany Jeŭrakamisijaj 18-y pakiet sankcyj musiać uzhadnić pradstaŭniki ŭsich 27 krain Jeŭrasajuza. Pryniaćcie dakumienta čakajecca ciaham červienia.

U papiarednim, 17-m pakiecie, zaćvierdžanym Radaj ES sioleta 20 traŭnia, u pryvatnaści, byli ŭviedzienyja sankcyi suprać Minskaha zavoda kołavych ciahačoŭ (MZKC). U abhruntavańni havaryłasia, što «Minski zavod kołavych ciahačoŭ — biełaruskaje vajskova-pramysłovaje pradpryjemstva, jakoje raspracoŭvaje vajskovuju techniku dla Uzbrojenych siłaŭ RF i padtrymlivaje abaranazdolnaść Rasii».

Uletku 2024 hoda Jeŭrasajuz abviaściŭ pra siektaralnyja sankcyi suprać Rasii i Biełarusi. Tady ŭžo byŭ uviedzieny šerah abmiežavańniaŭ suprać biełaruskaj finansavaj sistemy:

• abmiežavańnie dostupu da SWIFT dla Biełahraprambanka, Banka Dabrabyt i Banka raźvićcia Respubliki Biełaruś, a taksama ich biełaruskim daččynym strukturam;
• zabarona apieracyj z Nacyjanalnym bankam Biełarusi, źviazanych z kiravańniem reziervami abo aktyvami, a taksama dziaržaŭnym finansavańniem dla handlu ź Biełaruśsiu i inviestycyj u Biełaruś;
• zabarona listynhu i akazańnia pasłuh stasoŭna akcyj biełaruskich dziaržaŭnych arhanizacyj na handlovych placoŭkach ES;
• istotnaje abmiežavańnie finansavych pastupleńniaŭ ź Biełarusi ŭ ES, zabarona prymać depazity, jakija pieravyšajuć 100 000 jeŭra, ad biełaruskich hramadzian abo rezidentaŭ Biełarusi, trymać rachunki biełaruskich klijentaŭ u centralnych depazitaryjach kaštoŭnych papier ES, a taksama pradavać kaštoŭnyja papiery, naminavanyja ŭ jeŭra, biełaruskim klijentam;
• zabarona pastaŭki ŭ Biełaruś banknot jeŭra.

• 22
• 9
• 2
• 11
• 3
• 2
• 0
• 0