Tehieran haryć. Izrailskija źniščalniki praciahvajuć udary, pakul SPA Irana biaśsilnaja
Izrail atakavaŭ budynki siłavych struktur Irana, u tym liku raźviedki Korpusa vartavych Isłamskaj revalucyi.
Siońnia, 15 červienia, Izrail nanios udar pa Tehieranie, stalicy Irana.
Vybuchi prahučali ŭ roznych častkach horada, avijaŭdarami źniščanyja abjekty ministerstvaŭ i siłavych struktur. Izrail atakavaŭ budynak raźviedki Korpusa vartavych Isłamskaj revalucyi. Pad zavałami šukajuć kiraŭnika vyviedki Machamada Kaziemi i jahonaha namieśnika Chasana Machakieki.
Źniščanyja budynki siłavych ministerstvaŭ i Ministerstva justycyi, udary nanosiacca taksama pa vajskovych bazach i damach, dzie pražyvajuć znakavyja asoby režymu.
Na kadrach z Tehierana bačnyja patoki vady na vulicach z razburanaha vadapravoda i zabityja darohi na vyjezd.
Izrailskaja avijacyja mietadyčna źniščaje abjekt za abjektam, iranskaja SPA biaśsilnaja.
Izrailcianie źniščyli samalot-zapraŭščyk na avijabazie ŭ Miešchiedzie, samym addalenym horadzie na paŭnočnym uschodzie Irana, za 2300 km ad Izraila.
Prajšli niepaćvierdžanyja paviedamleńni i pra hibiel kiraŭnika palicyi Tehierana, jaki ŭznačalvaŭ padaŭleńnie niadaŭnich pratestaŭ u horadzie.
Iranskija ŭłady paviedamlajuć pra 128 zabitych u hetyja dni i kala 900 paranienych.
Premjer-ministr Izraila Bińjamin Nietańjachu ŭ intervju Fox News zajaviŭ:
«Ciapier ja mahu paviedamić vam, što niekatory čas tamu, kiraŭnik i namieśnik kiraŭnika raźviedki KVIR byli atakavanyja ŭ Tehieranie».
Jon vykazaŭsia taksama, što Izrail poŭny rašučaści zaviaršyć zadaču pa likvidacyi «dvajnoj pahrozy» Irana, źniščalniki znachodziacca ŭ niebie nad pałajučym Tehieranam.
Nietańjachu dadaŭ, što pavodle źviestak izrailskaj vyviedki Iran chacieŭ pieradać chusitam jadziernuju zbroju. Izrailskaja armija, kaža Nietańjachu, źniščyła reaktar u Isfachanie, bieź jakoha niemahčyma stvaryć jadziernuju zbroju, a taksama hałoŭny jadzierny abjekt u Natanzie.
«I zrobim bolš, kali spatrebicca», — zajaviŭ izrailski premjer.
Prezident ZŠA Donald Tramp u apošnija paru dzion nakłaŭ vieta na izrailski płan zabojstva Viarchoŭnaha lidara Irana, paviedamiła ahienctva Reuters sa spasyłkaj na dvuch amierykanskich čynoŭnikaŭ.
Sam Tramp u sacsietcy Truth Social napisaŭ, što Iran i Izrail pavinny zaklučyć ździełku.
Kamientary
Brava ZŠA !