Maskva zrabiła z hetaha vialikuju temu dla svajoj prapahandy.
Skončyŭsia čarhovy etap pieradačy ciełaŭ zahinułych vajskoŭcaŭ Rasijaj Ukrainie. Ahułam rasijanie za pieryjad paśla apošnich pieramoŭ u Stambule pieradali 6000 ciełaŭ. Ukrainski bok kaža, što navat upieramiežku: rasijan i ŭkraincaŭ. Ukraincy nie pieradali nikoha. Čamu tak?
Tamu što ŭkrainskaja armija z vosieni 2024 hoda tolki abaraniałasia i adstupała. Havorka ž pra tych achviar, cieły jakich paśla bajoŭ zastajucca na raniej niejtralnaj pałasie abo na novazaniatych linijach. A kali linija frontu pavoli-pavoli źmiaščajecca va ŭkrainski bok, to i suadnosiny adpaviednyja.
Straty pry nastupie ŭ pazicyjnaj vajnie, jakoj jana ad kanca 2022 hoda, našmat bolšyja ŭ tych, chto nastupaje, — asabliva z ulikam taho, što pole boju ciapier «praśviečvajecca» dronami.
«Heta novy typ vajny. 15 km ad linii frontu — ciapier zona sucelnaj śmierci», — adznačyŭ niadaŭna hienierał Valer Załužny.
Ukraina vybrała taktyku hłuchoj abarony, tamu što jana słabiejšy bok.
Rasijskaja i łukašenkaŭskaja prapahanda pieradačy ciełaŭ nadali vialikuju ŭvahu. Takim čynam jany spadziajucca zapeŭnić nasielnictva: my pieramahajem, vorah niasie vializnyja straty, treba tolki jašče paciarpieć. Miadzinski navat pravioŭ paralel z Paŭnočnaj vajnoj, jakaja doŭžyłasia 21 hod.
Adnak praporcyi pieradadzienych ciełaŭ nie adpaviednyja realnamu ŭzroŭniu strat bakoŭ. Straty rasijan našmat vyšejšyja mienavita tamu, što jany viaduć nastupalnyja dziejańni, a ŭkraincy tamu i siadziać va ŭmacavanaj abaronie, što majuć mienš žyvoj siły i bierahuć jaje.
Rasijskija «Miedyjazona» i Bi-bi-si z dapamohaj vałancioraŭ viaduć padlik kolkaści zahinułych na asnovie adkrytych krynic. Pa hetym padliku na siońnia viadomyja imiony 112 tysiač zabitych. Prajekcyi ž ahulnaj ličby rasijskich strat, zroblenyja na asnovie kolkaści spraŭ ab spadčynie, vyvodziać na ličbu kala 180 tysiač achviar.
Straty ŭkrainskaha boku dakładna nieviadomyja. Jany taksama vializnyja, ale, chutčej za ŭsio, prykładna na tracinu mienšyja za rasijskija.
Ciapier čytajuć
Biaspałaŭ namalavaŭ ludziej sa ściahami ŭ centry Minska i adpraviŭ fota ŭ milicyju. Źjechalisia try mašyny ź mihałkami30
Kamientary