«Biełaruś zdarovaha čałavieka» nie padychodzić». Čamu i kudy ajcišniki źjazdžajuć z Polščy

Uzajemnaje zachapleńnie biełaruskich ajcišnikaŭ i bližejšych dla ich krain rełakacyi, zdajecca, zastałosia ŭ minułym. Spačatku Litva mocna paniziła svaju pryvabnaść dla mihrantaŭ z RB, pačaŭšy anulavać VNŽ z-za «pahrozy biaśpiecy», potym antymihranckuju estafietu padchapiła Polšča (admiena PBH, antymihranckaja rytoryka, biaskoncaje čakańnie DNŽ u šerahu vajavodstvaŭ, prapanovy padoŭžyć šlach da hramadzianstva i h. d.).

I chacia mnohija biełarusy pa-raniejšamu ličać Polšču vielmi kamfortnym miescam dla žyćcia (a dzie zaraz lohka?), jość i takija, što vyrašyli źjechać. Spytali ŭ ich, čym jany kiravalisia i kudy dalej.

Polšča — Tajłand. «Vielmi ciažka pieranosicca varšaŭskaja zima»

Ja pracavała ŭ biełaruskaj IT-kampanii na pazicyi midł-raspracoŭščyka. Paśla padziej [2022] hoda kampanija vyrašyła pašyracca: adkryła niekalki ofisaŭ u ES i pačała pieravozić tudy klučavych supracoŭnikaŭ, pry hetym biełaruski ofis praciahvaŭ pracavać.

Potym źjavilisia ciažkaści z atrymańniem hrošaj ad amierykanskaha zakazčyka. Z-za hetaha moj najmalnik pačaŭ aktyŭna prapanoŭvać rełakacyju ŭžo ŭsim žadajučym. Ja taksama vyrašyła pasprabavać.

Pierajazdžała adna, pa prahramie PBH, dla žyćcia vybrała Varšavu. Adtul ja praciahvała pracavać jak B2B na svaju «staruju» biełaruskuju kampaniju. Adnačasova pastupiła ŭ palicealnuju škołu, kab chutčej vyvučyć polskuju movu. Praz dva hady ja płanuju źjechać.

Voś pryčyny:

1) Materyjalnaja. Pry tym, što ŭ Polščy ja darasła da sieńjora i maja zp bruta vyrasła, nieta-dachod (z ulikam arendy, vydatkaŭ na buchhałtara i h. p.) dahetul nie nabliziŭsia da taho, što ja mieła ŭ Minsku (tam u mianie była svaja kvatera). Tak i ŭ cełym žyć u Polščy i praciahvać pracavać na biełaruskuju kampaniju dla mianie adčuvajecca jak «pierapłata». Usie hetyja materyjalnyja dabroty ja i tak mieła ŭ Biełarusi.

Sprabavała znajści pracu ŭ kampanijach ES, ale ničoha nie vyjšła, praŭda šukała nie vielmi aktyŭna.

2) Staŭleńnie palakaŭ da pryjezdžych. Na žal, šmat razoŭ sutykałasia ź niehatyvam ad palakaŭ prosta ŭ suviazi z tym, što moj pašpart siniaha koleru (asabliva va ŭžondach).

Apošnim časam adčuvajecca, jak Polšča «najełasia» pryjezdžymi i pačynaje z kožnym hodam uskładniać naša žyćcio (admiena PBH vizy, padvyšeńnie ŭznosaŭ ZUS kožny kvartał, pavieličeńnie terminaŭ čakańnia dakumientaŭ, niezalik palicyjalnaj škoły jak paćviardžeńnia viedańnia polskaj movy i h. d.).

Šmat čaho źmianiłasia ŭ zakonach za čas majho žyćcia ŭ Polščy, i ništo mianie jak mihranta nie paciešyła.

3) Klimatyčnyja ŭmovy. Vielmi ciažka pieranosicca varšaŭskaja zima. Ciamnieje ŭ 15 hadzin. Pastajanny doždž, adsutnaść śniehu i ahulnaja šeraść na vulicy. Błakitnaje nieba zimoj bačyła paru razoŭ na miesiac.

4) Košt žyćcia. Nie adčuła, što žyvu ŭ ES, tamu zdajecca, byccam pierapłačvaju za ŭsio ŭ 2-3 razy. Adčuvajecca jak bolš darahaja i «biazdušnaja» Biełaruś. Pasłuhi na horšym uzroŭni, čym u RB. Miedycyna niedastupnaja, choć i płaču ŭ ZUS 250-300$ u miesiac. Košty na ŭsio vyšejšyja. Tak, možna kupić pa adekvatnym košcie niejkija tavary, jakija ŭ RB ciažka dastać. Ale płacić 1000$ za arendu kvatery, kab raz u 2-3 miesiacy kupić sumku ci abutak za 100$ zamiest 300$ zdajecca vielmi niełahičnym rašeńniem.

U roznyja pieryjady daminavała to adna z hetych pryčyn, to druhaja.

A apošniaj kroplaj stała mocnaje niežadańnie viartacca ŭ Polšču z pajezdki ŭ Tajłand.

Tak, za hetyja dva hady ŭ Polščy ja niekalki razoŭ jeździła da siabroŭki Tajłand na 1-2 miesiacy, pracavała adtul addalena. Paśla atrymańnia tajskaj DTV vizy (na 5 hadoŭ) vyrašyła pasprabavać pierajechać: vielmi mnie zajšło žyćcio tam.

Źjazdžaju ŭ žniŭni. Začyniać polskaje IP pakul nie budu. Pasprabuju praciahvać vieści dziejnaść u Polščy z Taja, pakul dziejničaje DNŽ, kab u vypadku čaho mieć mahčymaść viarnucca i prydumać alternatyŭny płan dla «ruchu dalej».

Polšča — Kipr. «Zasmučała toje, što heta vielmi padobna da Biełarusi»

Ja žyŭ u Polščy bolš za dva hady, zaraz užo amal dva hady žyvu na Kipry. Kali ŭ 2021 źjazdžaŭ z RB, to śviadoma vybraŭ krainu bližej, bo dumaŭ, što chutka viarnusia.

U Polščy ŭsio było dobra. Kraina vielmi pryjemnaja, mnie šmat što padabałasia.

Ale byli niekalki «ale»:

1) Tak jak ja čystakroŭny biełarus, biez karty palaka ja pavinien čakać hramadzianstva bolš za 8 hadoŭ. Kali dadać čas na razhlad usich dakumientaŭ, atrymajecca kala 10 hadoŭ.

2) U mianie była ciažkaja depresija paśla emihracyi. Jana pieraškadžała žyć i pracavać. Situacyju paharšała toje, što Polšča vielmi padobnaja na Biełaruś.

Hulaješ pa starych rajonach Varšavy, jakija budavalisia pry kamunistach, i bačyš, jak jany padobnyja na minskija chruščoŭki i brežnieŭki. Klimat anałahičny. Tvary ŭ ludziej na vulicach takija ž, jak u RB.

Što ja maju na ŭvazie? Voś u Danii pa vulicach taksama chodziać «biełyja jeŭrapiejcy», ale pa tvarach vidać, što jany — «inšyja», a ŭ Polščy nie tak. Heta značyć u narmalnych umovach heta, viadoma ž, nie drenna, ale ŭ tym maim depresiŭnym stanie navat minaki-palaki nahadvali pra Biełaruś, i ad hetaha rabiłasia tolki horš.

Druhaja pryčyna, chutčej za ŭsio, była asnoŭnaj dla pierajezdu. Ja vybraŭ Kipr.

Čamu Kipr:

1) Tam vyjšaŭ zakon, jaki paskaraje atrymańnie hramadzianstva dla IT-śpiecyjalistaŭ.

2) Tam šmat sonca — vydatnaje miesca dla mientalnaha spakoju.

3) U mianie byli znajomyja na Kipry, jakija dapamahali ź pierajezdam.

4) Tak jak ja nie tolki prahramist, ale i kofaŭndar, pa hrašach mnie było ŭsio roŭna — Kipr ci Polšča. Albo tannaja Polšča z vysokimi padatkami, albo darahi Kipr ź nizkimi padatkami na dyvidendy.

Na dadzieny momant ja zadavoleny žyćciom na Kipry. Liču jaho dobrym miescam dla biahučaha etapu žyćcia. Depresija prajšła na praciahu hoda paśla pierajezdu. Praz hod płanuju pačać vučyć hreckuju movu, kab zdać na A2 i padacca na pašpart praz try hady.

Adnak Kipr ja rekamienduju ŭ jakaści novaj łakacyi tolki ŭ tym vypadku, kali vy faŭndar ci kofaŭndar kampanii. Kali vy raspracoŭščyk i vaša žonka biez pracy, to, chutčej za ŭsio, vam budzie składana paciahnuć žyćcio na vostravie.

Polšča — Niderłandy. «Kraina ŭsio jašče chutčej «Uschodniaja Jeŭropa» pa vajbu»

Čytač nie raskazaŭ, kolki pražyŭ u Polščy i ŭ jakim horadzie, ale kanstatavaŭ, što źjechaŭ u Niderłandy. I voś pa jakich pryčynach:

1) U Polščy niecikavy miascovy rynak (hrošy i zadačy), biełaruskija halery navat razhladać nie varta.

2) [Prymalny] varyjant adzin — pracavać pa B2B na zachodnija krainy. Adnak pry hetym padatki i adličeńni pa IP buduć takija ž, jak u raźvitoj Jeŭropie. Imcho, kali vybiraješ być kantrakcieram, to treba ruchacca kudyści ŭ Aziju.

Jość i jašče niekalki minusaŭ u vyhladzie:

— ksienafobii mnohich palakaŭ (ale niekatorym našym heta, naadvarot, zachodzić),

— vidavočna budučych uzmacnieńniaŭ žorstkaści ŭ častcy atrymańnia hramadzianstva i navat PMŽ (zanadta šmat pryjechała inšaziemcaŭ, buduć adsiejvać),

— tak sabie klimatu, drennaj ekałohii,

— prablem ź miedycynaj (a dzie ich niama?),

— nieapraŭdana darahoha žylla (pry hetym pracentnaja staŭka pa kredytach — jak u krainach treciaha śvietu).

U cełym kraina pa vajbu ŭsio jašče chutčej «Uschodniaja Jeŭropa», chacia patencyjał raźvićcia i ekanamičnaha rostu vielizarny i z kožnym hodam stanovicca ŭsio bolš.

Plusaŭ u Polščy taksama poŭna, nie skažu, što kraina «žach-žach», ale jana bolš padychodzić dla tych, chto nie choča asimilavacca na Zachadzie i ŭsio jašče šukaje «Biełaruś zdarovaha čałavieka». Albo dla takich jak my, chto prajšoŭ jaje tranzitam u 2020-2022. Usialak lepš i pierśpiektyŭniej Hruzii i Sierbii.

• 8
• 4
• 2
• 4
• 0
• 2
• 0
• 0