U ciahniku Viciebsk—Minsk pjany pasažyr udaryŭ spadarožnika nažom u šyju
Žorstki napad adbyŭsia ŭviečary 12 lutaha ŭ ciahniku, jaki ruchaŭsia ź Viciebska ŭ Minsk.
Na pierahonie la stancyi «Barysaŭ» 36‑hadovy žychar Viciebskaj vobłaści, budučy pjanym, udaryŭ nažom u šyju 45‑hadovaha spadarožnika, piša «Minskaja praŭda».
Mužčyna jechaŭ u trecim vahonie. Majučy bilet na vierchniuju palicu, jon samavolna zaniaŭ bakavoje miesca i z samaha pačatku pavodziŭsia zadzirliva: čaplaŭsia da zamiežnika, adpuskaŭ pachabnyja kamientary ŭ adras maładoj dziaŭčyny, piŭ ałkahol, dadajučy jaho ŭ harbatu.
Prykładna praz paŭtary hadziny šlachu pamiž im i susiedam uspychnuła svarka. Pjany pasažyr pačaŭ abražać mužčynu i pahražać raspravaj.
Na stancyi «Barysaŭ» abodva damovilisia vyjści i razabracca na vulicy. Ale, nie čakajučy prypynku, mužčyna raptam dastaŭ składny nož i ŭdaryŭ u šyju apanienta.
Vidavočcy nie razhubilisia i adrazu pačali akazvać paciarpiełamu pieršuju dapamohu. Na nastupnaj stancyi — u Žodzinie — mužčynu ekstranna špitalizavali ŭ reanimacyju, a napadnika zatrymali.
«Miedyki dyjahnastavali ŭ jaho kołata-rezanaje ranieńnie šyi z paškodžańniem sonnych arteryj, a taksama jaremnych vien», — udakładnili va USK. Traŭmy adnosiacca da katehoryi ciažkich.
Zaviedziena kryminalnaja sprava.
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary