Dźmitryja Łukašenki nie było z baćkam i bratami na adznačeńni 3 Lipienia
Pres-słužba Alaksandra Łukašenki adsutnaści siaredniaha syna pakul nijak nie vytłumačyła.
Uračystaje ŭskładańnie viankoŭ da Kurhana słavy ŭ Minskaj vobłaści adbyłosia ŭranku 3 lipienia. Jaho tranślavali dziaržaŭnyja telekanały.
Pieršym ad Alaksandra Łukašenki levaruč stajaŭ Kola Łukašenka, druhim — Viktar. Zaŭsiody raniej ź imi byŭ i siaredni syn Dźmitryj, kiraŭnik Prezidenckaha spartyŭnaha kłuba, praź jaki źbirajuć hrošy ź biznesu na prapahandysckija patreby i pravodziać biznes-apieracyi vialikich maštabaŭ. Siońnia Dźmitryja nie było z bratami.
Raniej takoha nikoli nie byvała. Z ulikam taho, što Alaksandr Łukašenka nadaje vyklučnuju ŭvahu ŭračystym rytuałam ułady, takaja adsutnaść vielmi niezvyčajnaja.
Respublikanskamu dziaržaŭna-hramadskamu abjadnańniu Prezidencki spartyŭny kłub na 45% naležyć, siarod inšaha, «Handlovy dom BiełAZ». Heta klučavy dyler adnaho z samych prybytkovych zavodaŭ Biełarusi. Raniej «Naša Niva» ŭ svaim rasśledavańni vyśvietliła, što sistema vybudavanaja tak, što pryvatnyja dylery BiełAZa atrymlivajuć z prodažu karjernych samazvałaŭ prykładna stolki ž, jak sam dziaržaŭny BiełAZ ź jaho 9600 supracoŭnikaŭ. Raskošnyja dachody ad Handlovaha doma BiełAZ atrymlivała i asabista paetka-piesieńnica Hanna Łukašenka (Siałuk).
Hanna Łukašenka (Siałuk) — heta žonka Dźmitryja, jakaja atrymała ŭ dziaržańnie biełaruskuju estradu. Jana piša pieśni, arhanizoŭvaje kancerty i atrymlivaje premii jak aŭtarka najlepšych tvoraŭ.
U svajoj pramovie Alaksandr Łukašenka raspalvaŭ nianaviść da narodaŭ Jeŭropy i ZŠA.
«Vy bačycie, što adbyvajecca vakoł nas. Zachad znoŭ vyrašyŭ usie svaje daŭhi i prablemy spalić u suśvietnym pažary. I adnačasova spalić niekalki miljonaŭ žycharoŭ našaj płaniety, — śćviardžaŭ Alaksandr Łukašenka. — Zadača ŭsich ludziej dobraj voli i ŭ pieršuju čarhu moładzi — abjadnacca i spynić varjataŭ».
«Kali my razvažajem na temu, chto paciarpieŭ bolš u hetaj vajnie, my pavinny pamiatać: źniščeńnie savieckaha naroda pačałosia tut, ź Biełarusi. Tut pačałosia źniščeńnie tych, chto žyŭ u Savieckim Sajuzie. My siońnia adkryta nazyvajem heta hienacydam biełaruskaha naroda», — skazaŭ Łukašenka.
Ciapier čytajuć
Minsk, Varšava, Vilnia — paraŭnoŭvajem, dzie praściej kupić kvateru čałavieku ź siaredniaj zarpłataj1
Kamientary