Pašynian paabiacaŭ uznačalić vyzvaleńnie Armianskaj carkvy ad «antychryścijanskaj, antynacyjanalnaj, antydziaržaŭnaj» hrupoŭki
Premjer Armienii paabiacaŭ asabista ŭznačalić vyzvaleńnie Armianskaj carkvy ad «antychryścijanskaj, antynacyjanalnaj, antydziaržaŭnaj» hrupoŭki, paviedamlaje RBK.
Pavodle jaho słoŭ, u kiraŭnika carkvy Armianskaj apostalskaj carkvy (AAC), katalikosa ŭsich armian Harehina II, kiraŭnika Šyrakskaj jeparchii Mikaeła Adžapachiana i inšych vysokapastaŭlenych śviataroŭ «poŭnaja adsutnaść suviazi» ź Isusam.
Pašynian zajaviŭ, što «vyskazvańni Harehina II śviedčać pra jaho padtrymku płanaŭ vajennaha pieravarotu i hvałtu», paviedamlaje Panarmenian.com.
Na svajoj staroncy ŭ Facebook Pašynian napisaŭ, što kali katalikos ličyć aryšt archirejaŭ Vazhiena Hałstaniana i Hievorha Adžapachiana niezakonnym, to tym samym jon «padzialaje płany vajennaha pieravarotu i ideałohiju hvałtu».
«Kali Ktryč Niersisian [śvieckaje imia Harehina II — NN] ličyć aryšt Vazhiena Hałstaniana i Hievorha Adžapachiana niezakonnym, značyć, jon padzialaje ideałohiju i płany hetych asob, nakiravanyja na arhanizacyju vajennaha pieravarotu, rasstreły kala ścien i stvareńnie chaosu ŭ krainie», — zajaviŭ Pašynian.
Vykazvańni Pašynina stali praciaham jaho zaciažnoha kanfliktu z armianskaj carkvoj. Jaje pradstaŭnikoŭ i ich prychilnikaŭ (rasijskaha biźniesmiena Samvieła Karapieciana, jaki padtrymaŭ carkvu, aryštavali) premjer-ministr abvinavačvaje ŭ sprobie zachopu ŭłady.
Tym časam u armianskich ŚMI, jakija krytyčna nastrojenyja da Pašyniana, paviedamlajecca, što armianskija ŭłady rychtujucca da štrumu Ečmijadzina — rezidencyi AAC.
Naprykład, Pašynian padkreśliŭ nieabchodnaść «pradprymać aktyŭnyja kroki pa vyzvaleńni rezidencyi Katalikosa i arhanizacyi novych vybaraŭ Katalikosa». Jon taksama abviaściŭ pra stvareńnie Kaardynacyjnaj hrupy dla vyrašeńnia arhanizacyjnych pytańniaŭ i adznačyŭ, što asabista voźmie na siabie adkaznaść za vybar pieršych dziesiaci jaje členaŭ.
Raniej Ečmijadzin raspaŭsiudziŭ zajavu, u jakoj zaklikaŭ ułady Armienii «nieadkładna vyzvalić duchoŭnych bratoŭ, nacyjanalnaha dabračyncu i źviazanych ź imi suajčyńnikaŭ i dziejničać vyklučna ŭ miežach zakona».
Kamientary