«Čakaju aficyjnych prabačeńniaŭ». U biełaruski zhareŭ adpačynak u Pakistanie z‑za pamyłki ŭ vizie

— Ja pracuju ŭ AAE, atrymała tut dazvoł na žycharstva. Častyja kantakty z pakistancami, jakija mnie i prarekłamavali svaju krainu. Chvalili dobruju pryrodu, kamfortnuju tempieraturu. A ŭ nas ciapier vielmi horača, voś ja i padumała: pajedu ŭ adpačynak u Pakistan, — raskazvaje Natalla.

U minułym hodzie Pakistan istotna spraściŭ praviły ŭjezdu dla hramadzian Biełarusi. Nie biaźviz, ale niešta blizkaje da jaho: na sajcie pakistanskaha MZS treba tolki zapoŭnić nieskładanuju ankietu i paźniej spampavać elektronnuju vizu. U dadatak da asabistych danych Natalla dasłała kopiju pašparta i pracoŭnaha dahavora, a taksama brani žylla i biletaŭ na rejs Šardža — Isłamabad.

Tut jość važny niuans: usio heta Natalla rabiła 9 lipienia, tady jak vylet u Pakistan u jaje byŭ pryznačany na 12-je. Chvalavańnia z nahody ciesnych terminaŭ nie było: e‑visa robicca na praciahu sutak, to-bok zapas času zastavaŭsia.

Prajšli adviedzienyja 24 hadziny, Natalla i jaje dačka atrymali hatovyja vizy. Ale nie paśpieŭšy abradavacca, žančyna vyjaviła, što ŭ jaje dazvole na ŭjezd ukazana całkam niapravilnaja data naradžeńnia. Z zapaŭnieńniem ankiety dapamahali ahienty z hrodzienskaj kampanii «Studyja adpačynku» — turystka adrazu źviarnułasia tudy.

Pavialičyć

— Jany dasłali infarmacyju pra toje, što viza pryjšła z pamyłkaj. I pačałasia niejkaja vaźnia. Akazałasia, što prosta tak vypravić datu naradžeńnia niemahčyma, treba całkam anulavać hetuju vizu, paśla čaho rabić novuju. Dobra, kažu, anulujcie, rabicie novuju. Ale dahetul pytańnie tak i nie vyrašana.

Zajaŭka na admienu vizy pa-raniejšamu adznačana statusam «U pracesie». Ale ŭ pracesie čaho, darujcie? U pieršapačatkovaj zajavie ŭsio było zapoŭniena pravilna. Da taho ž u ich byŭ moj skan pašparta, dzie vyrazna vidać data naradžeńnia. Navošta tady ŭvohule vysyłać usie hetyja dakumienty, kali nichto nie źviaraje danyja?

Dziaŭčynki z ahienctva źviazvalisia z pasolstvam Isłamskaj Respubliki ŭ Biełarusi, adtul vyjšli na suviaź z hetym vizavym centram. Heta ŭžo było ŭ piatnicu, i tam prosta spasłalisia na skaročany dzień, skazaŭšy, što zojmucca majoj prablemaj u paniadziełak. Vyletać ja pavinna była ŭ subotu. U vyniku ŭ nas prosta zhareli bilety, jakija nie padlahali viartańniu, koštam kala $400.

Pa čyjoj vinie adbyłasia pamyłka — nie vielmi jasna. U turahienctvie «Studyja adpačynku» nam paćvierdzili słovy Natalli i spasłalisia na banalny techničny zboj u vizavaj sistemie MZS Pakistana. Techpadtrymka adrazu papiaredziła, što na anulavańnie vizy moža spatrebicca da 7 dzion. Turystka vyrašyła ryzykavać, raźličvajučy, što pakistancy ŭličać haručy dedłajn i pojduć joj nasustrač — ale nie.

— My źviartalisia ŭ pasolstva Isłamskaj Respubliki ŭ Biełarusi, i jany sa svajho boku taksama sprabavali heta vypravić, — dadała śpiecyjalist «Studyi adpačynku». — Sakratar pastajanna byŭ sa mnoj na suviazi. Jany navat byli hatovyja nadzvyčaj apieratyŭna zrabić novuju vizu, chaj i za niejkuju dadatkovuju sumu. Ale ŭsio ž heta akazałasia niemahčymym, pakul dziejničała staraja viza — admienić jaje moh tolki MZS.

Zaraz ahienctva sprabuje vyrašyć pytańnie ź viartańniem hrošaj za avijabilety: farmalna jany nie padlahajuć viartańniu, ale, padobna, na praciahu 90 dzion pasprabavać možna. Natalla ž emacyjna zajaŭlaje, što navat kali viernie patračanaje, «u Pakistan dakładna ni nahoj», a viza joj «bolš nie treba». Biełaruska ŭžo dasłała skarhu ŭ MZS, paviedamiła pra situacyju pasolstvu Biełarusi ŭ Pakistanie i čakaje aficyjnych prabačeńniaŭ.

• 0
• 0
• 5
• 3
• 0
• 0
• 1
• 0