Lubuju nieznajomuju źmiaju ekśpierty rajać pa zmoŭčvańni ličyć jadavitaj. Parady pa akazańni pieršaj dapamohi pry ŭkusie hadziuki vydańniu «Minsk-Naviny» pierakazaŭ sudovy ekśpiert Jaŭhien Maluk.
Źmiainy jad zdolny nie tolki zabivać, ale i vylečvać, adnak u jakaści lekaŭ jaho vykarystoŭvajuć tolki ŭ apracavanym vyhladzie. Naprykład, jad kobry dapamahaje zdymać bol i spazmy.
«Ukus hadziuki — jaje achoŭnaja reakcyja. Reptylija nanosić udar, šyroka raskryŭšy pašču. U momant ukusu atrutnyja załozy vyłučajuć porcyju jadu, i jon prachodzić u skuru čałavieka pa asablivych kanałach z unutranaha boku zuboŭ źmiai.
Heta doŭžycca nie bolš za siekundu. Na ciele zastajucca dźvie maleńkija, amal nieprykmietnyja dzirački-pahłybleńni. Hadziuka moža kusać da 4-5 razoŭ zapar», — kaža Maluk.
Jad hetaj źmiei davoli mocny, ale nie śmiarotny. Jon nie ŭtrymlivaje niejrataksinaŭ, jakija ŭpłyvajuć na hałaŭny mozh čałavieka, adnak akazvaje hiemarahičnaje i niekratyzujučaje ŭździejańnie.
U miescy ŭkusu adbyvajecca razbureńnie formiennych elemientaŭ kryvi. Pastupova heta dziejańnie raspaŭsiudžvajecca na bližejšyja tkaniny — litaralna na vačach raście puchlina, jakaja trymajecca 1,5-2 tydni.
Časta na jad źmiei arhanizm reahuje nieadkładnaj reakcyjaj: raźvivajucca anafiłaktyčny šok, aciok Kvinkie. Vielmi niebiaśpiečna, kali hadziuka kusaje čałavieka ŭ vobłaść serca abo šyi. Kali svoječasova nie budzie akazana mieddapamoha, možna pamierci ad udušša — aciok u vobłaści šyi ściśnie trachieju. U hetym vypadku treba terminova źviarnucca ŭ lačebnuju ŭstanovu.
Čałavieku, jakoha ŭkusiła źmiaja, nieabchodna akazać nieadkładnuju dapamohu:
- abiezruchomić kaniečnaść pry dapamozie paviazki abo łanhiety;
- pradezynfikavać ranu pierakisam vadarodu, chłorhieksidzinam abo słabym rastvoram marhancoŭki;
- nakłaści na ranu paviazku z čystaj tkaniny abo bintu, umierana ściskajučy ŭsiu kaniečnaść (palec pavinien svabodna pranikać pad jaje pavierchniu i nie stvarać dla paciarpiełaha dyskamfortu);
- astudzić miesca ŭkusu;
- dla źnižeńnia simptomaŭ intaksikacyi paciarpieły pavinien jak maha bolš pić;
- pry spynieńni dychańnia i sardečnaj dziejnaści vykanać štučnaje dychańnie i niepramy masaž serca.
Pry ŭkusie źmiai kateharyčna zabaroniena:
- razrazać miesca ŭkusu kryžapadobna abo vyrazać paškodžany ŭčastak;
- prypalvać ranku raspalenymi na ahni pradmietami, vuhlami ad vohnišča abo poracham;
- nakładvać tuhi žhut vyšej za miesca ŭkusu;
- prymać ałkahol (jon zapavolvaje vyviadzieńnie jadu z arhanizma).
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary