Muzykanty vydalajuć svaju muzyku sa Spotify, bo jon spansaruje kampaniju, jakaja vyrablaje tysiačy dronaŭ dla Ukrainy

26 červienia aŭstralijski hurt King Gizzard & the Lizard Wizard abviaściŭ, što vydalić usie svaje zapisy z muzyčnaha stryminhavaha servisu Spotify, piša vydańnie «Mieduza»

Takim čynam udzielniki hurta vystupili suprać suviazi servisu ź niamieckaj kampanijaj Helsing, jakaja vyrablaje drony ŭ tym liku dla Ukrainy. Aŭstralijcy — nie pieršyja muzykanty, jakija vyrašyli pakinuć płatformu pa hetaj pryčynie. Raniej pra takoje ž rašeńnie paviedamili amierykanskija hurty Xiu Xiu i Deerhoof.

«Hienieralny dyrektar Spotify Daniel Ek układvaje miljony ŭ technałohii vajennych dronaŭ z štučnym intelektam. My tolki što vydalili našu muzyku z płatformy. Ci zmožam my nacisnuć na hetych technabro ŭ styli Doktara Zła, kab jany stali lepšymi? Dałučajciesia da nas na inšaj płatformie».

Takoje paviedamleńnie apublikavaŭ aŭstralijski hurt King Gizzard & the Lizard Wizard na svajoj staroncy ŭ Instagram 25 lipienia. Akramia žyvych zapisaŭ i duetaŭ, havorka idzie pra vydaleńnie ŭsich 27 albomaŭ kalektyvu.

Pryčynaj takoha rašeńnia stała inviestycyjnaja palityka hienieralnaha dyrektara Spotify Daniela Eka. Jaho fond Prima Materia spansiruje abaronnuju kampaniju Helsing. Sam Ek zajmaje pasadu staršyni savieta dyrektaraŭ Helsing, u jaki jon ustupiŭ u 2021 hodzie.

Mieniedžar łejbłu Joyful Noise Džejk Sonders vykazaŭ padtrymku rašeńniu hurta:

«King Gizz — paśpiachovy hastrolny hurt, jakaja moža dazvolić sabie zaniać pazicyju. Ich rojałci ad Spotify — heta kropla ŭ mory ŭ paraŭnańni z tym, što jany zarablajuć na turach. […] Ale dla maładych artystaŭ i łejbłaŭ Spotify pa-raniejšamu zastajecca pryjarytetam u mnohich siektarach industryi. Adzinaja nadzieja — kab Spotify staŭ nastolki «niekrutym», što ludzi pačnuć adkryvać dla siabie muzyku na inšych płatformach — pažadana takich, jakimi nie kirujuć ludzi, što ŭkładvajuć miljony ŭ vajennuju industryju».

King Gizzard & the Lizard Wizard — nie pieršy kalektyŭ, jaki pačaŭ vydalać svoj muzyčny katałoh z Spotify. 24 lipienia pra razryŭ adnosin z płatformaj paviedamiŭ amierykanski hurt Xiu Xiu, jaki napisaŭ u Instagram:

«My ciapier pracujem nad tym, kab vydalić usiu našu muzyku z hetaj śmietnicy, z hvałtoŭnaha partała Armahiedonu pad nazvaj Spotify».

U kamientary dla Pitchfork zasnavalnik hurta Džejmi Stiuart praz svajho pradstaŭnika paviedamiŭ, što kalektyŭ užo na praciahu miesiaca zajmajecca vydaleńniem svajoj muzyki sa stryminhu: «Jość nadzieja, što ŭsio budzie vydalena na nastupnym tydni». Jon taksama adznačyŭ, što łejbły, ź jakimi jany supracoŭničali — Polyvinyl, Kill Rock Stars i Graveface — padtrymlivajuć ich u hetym rašeńni.

View this post on Instagram

A post shared by Xiu Xiu For Life (@xiuxiuforlife)

Na pytańnie, ci buduć jany vydalać muzyku ź inšych płatformaŭ, Džejmi Stiuart adkazaŭ:

«Chacia finansavyja praktyki ŭsich stryminhavych servisaŭ nadzvyčaj varožyja da muzykantaŭ, dziejańni Spotify — vykarystoŭvać prybytak, atrymany, pa sutnaści, ad kradziažu muzyki, kab zabivać ludziej dziela jašče bolšaha prybytku — heta amal pa-za miežami razumieńnia».

Pra namier vydalić svaju muzyku z Spotify 30 červienia taksama abviaściŭ amierykanski hurt Deerhoof:

«My nie chočam, kab naša muzyka zabivała ludziej. My nie chočam, kab naš pośpiech byŭ źviazany z bajavymi technałohijami z vykarystańniem ŠI».

• 5
• 18
• 3
• 72
• 0
• 0
• 8
• 2